BCM Mission rawngbawlna chanchin tlangpui

1. MIZORAM CHHUNGAH

1.1. BRU Mission: 1939-ah Bru hnam zingah kan thawk tan. Pathian malsawmna kan dawng nasa hle. Chhim lama Bru-ho zinga kan rawngbawlna huam chhungah ngat phei chuan Kristian lo pawh an awm tawh lo.  Mahni kut leh kea an din theih nan May 2009 atang khan  Bru Baptist Church kan dinpui a. Kha tih lai khan BCM enkawlna hnuaiah Bru kohhran 28 leh member 4129 an awm a. Tunah hian Mizoram pumah Kohhran 84 leh member 16000 kan lo nei ta a ni. Sikul 13 leh zirlai 900 kan nei. An zingah hian missionary 40 leh a ram mi 19 ruaiin hma kan la mek.

1.2. Chakma Mission: Chakma zinga kan rawngbawlna pawh Lalpan mal a sawm nasa hle. An zinga kan luh tan kum hi 1939 bawk a ni. Assembly 2011 chuan Planning Commission ruahmanna angin Mission Field pakhat angin buatsaih ni tawh se, Director hran neia awm turin a lo rel ta a. Nikum April thla atang khan Chakma Mission Director thar kan lo nei ta. Tunah hian Chakma Kohhran 37 leh fellowship 15 leh member 5000 kan lo nei ta, Sikul 14 leh zirlai 1218 kan nei bawk. An zingah hian missionary 82 leh a ram mi 16 thawk lai mek kan nei.

1.3. Non-Mizo Mission: Kum1969 atang khan Mizorama hnam dang kan ram pawn atanga lo lute zingah rawng kan bawl tan. Tunah hian  Evangelist 8 Non-Mizo zinga thawk lai mek kan nei a, Fellowship 8 leh Non-Mizo Service 5 leh Preaching Station 5-ah member 800 chuang kan nei mek bawk. Kumin April atang hian Non-Mizo Pastor incharge atan Rev. TC Vanlalmalsawma ruat a ni.

2. MIZORAM PAWN – INDIA-AH

2.1. Rabha zingah:  Rabha hnam zingah hian 1968-ah Rev. Rokhamate nupa tirh an ni a. Kohhran pathih leh ringtu baptisma chang 60 vel zet an lo awm tawh. Missionary dangte pawh tirh belhin a ram mite pawh kan rawih belh zel a. Pathian Malsawmna kan dawng nasa hle. Tunah hian Rabha zingah ringtu 12,344 leh Kohhran 59 leh fellowship 9 kan lo nei ta reng mai. An tawngin Thuthlung Thar lehlin zawh tawh a ni. Thuthlung Hlui lehlin mek a ni. Hla bu tha tak an nei tawh.

2.2. Tripura-ah: Tripuraa hnam mawl ber leh rethei ber kristian leh kohhran mumal pawh la awm lohna Halam-Kuki hnam zingah 1971-ah kan thawk tan phawt a, chumi hnuah Jamatia, Noatia leh Debarma zingah pawh thawk tura sawm kan ni ta zel a. Tunah hian Tripuraa hnam hrang hrang BCM thawhnaah hian Kohhran 270 leh member 40,000 vel an awm tawh a ni. BCM hian Class X thleng zir theihna School tha tak tak pathum kan enkawl mek a ni: St. James’ High School, Gongarai, Yakhily Academy, Kumalung, Tiperah Academy, Sadar North leh St. Pauls’ School, Agartala te an ni.

2.3. Assam-Dhubri-ah: 1973-ah Rev. R.K. Khuala chu tirh a ni a. A retire hnuah Rev. C. Zatawnan a thlak a, missionary dangte pawh tirh belh an ni ta zel a ni. Kan thawh tan tirh hian kohhran 1 leh member 23 chiah an nei a. Tunah hian Kohhran 10 leh member 850 kan nei. Bethel Baptist Mission sikul tha tak kan nei bawk.

2.4. West Bengal-Birpara-ah: Birpara-ah hian 1975 khan BCM-in hma a la tan a. Rev. V. Ngunkhara chu tirh hmasak ber a ni. Kan thawh tirhin kohhran pakhat leh ringtu 25 chiah an awm. Tunah hian Kohhran 14 leh member 1100 kan nei. ZoramBaptistMissionSchool, Class X thleng zir theihna tha tak kan nei.

2.5. Assam-Boro hnam zing-ah: Boro-ho hi maktaduai telin Assam rama district paruk laiah an awm a. Kan thawhna area bikah hian kan luh tirhin Kohhran 11 leh member 458 an awm. 1988-ah Rev. F. Sangvela leh missionary thenkhat tirh an ni ta a. Tunah chuan Assam Bengal Field-ah an awm. Tualchhung Kohhran 23 leh ringtu 1600 kan nei.

2.6. MP & MH-ah: Kurku ho hi Madhya Pradesh leh Maharashtra ramri hrulah an awm a. 1979 khan Rev. F. Rammawia leh Rev. U.P. Prabhakar-te chu tirh chhuah an ni a, Rev. V. Vanlalchhunga te, rev. Israel lalremtluanga te Field Directorin an lawm leh a, missionary dang leh a ram mi-te pawh kan rawih belh ta zel a. Tunah hian Rev. T. Lalsangvung chu F.D. nilai mek a ni. Tualchhung Kohhran 7 leh member 824 chuang zet kan nei.

2.7. ARUNACHAL PRADESH: Arunachal-ah hian hnam hrang hrang zingah kan thawk a. Kan thawh hmasak dan indawtin lo en ta ila:-

2.7.1. A.P. East: Adi hnam zingah: 1990 khan  Adi Baptist Union (ABU) sawmna chhangin Rev. F. Sangvela tirh a ni a, a hnuah Rev. V. Laldinglianan a thlak a. Missionary dangte pawh tirh belhin a ram mite pawh kan rawih belh zel a. Tuna kan thawhpui te chu ABU, DLBCA, GBU, UGBC te an ni. An zinga kan thawhna huam chhungah hian Kohhran 149 leh member 24,800 an awm tawh.

2.7.2. Arunachal West Field-ah: Nisi hnam zingah: 1993 khan Subansiri Baptist Christian Association sawmna chhangin Upa Saingenga-te chhungkua chu kan missionary niin Argentina Baptist Convention-te nen thawhho a ni. Moinhapa, Itanagar hmunah CalvaryEnglishMediumSchool an din a. Missionary dangte pawh tirh belh an ni. Tunah chuan Nisi Baptist Christian Councilin an la tawh. Tunah hian Nirjuli-ahHutoEnglishSchool din sakin Music Teachers pawh khaw hrang hrangah engemaw zat kan tir. Nisi hnam zingah hian Kohhran 278 leh member 40,000 vel awm tawhin an insawi.

2.7.3. Apatani hnam zingah: 1994-ah Apatani Christian Fellowship chuan an zinga thawk turin ngenngawl takin min rawn sawm ve leh ta tlut tlut a. Rev. K. Lalrinthanga leh a nupui Pi Chawngthanpari chu kohhran dinpui tur leh Mission English Medium School din turin tirh an ni ve leh ta a. Missionary dangte pawh tirh belhin a ram mite pawh rawih belh zel an ni. Kan thawh tirh khan baptisma chang member 40 vel chauh an la awm kha a ni a, tunah chuan Kohhran 10 leh member 4500 zet kan nei ta reng mai. Class X thleng zir theihna Sikul tha tak Midland Education Centre pawh kan nei.

2.7.4. East Kameng District-ah: Nisi hnam zingah kan thawk a, F. Lalhmuchhuaka (Music Teacher) a thawk mek.  Kohhran 7 leh Fellowship 5 kan nei.

2.8. Missing hnam zingah: Assam ram Dhemaji district huam chhunga awm an ni. Tualchhung Kohhran 33 neiin member 1200 an ni. Dhemaji Christian Association an din tawh a, Silapathar hi an khawpui innghahchhan ber a ni. 2005 hian Pu R. Lalsangzuala-te nupa leh Zoramchhana Music teacher te tirh an ni. Kumin 2011 hian Pu H. Liantluangate nupa tirh belh leh an ni a, Demaji-ah an awm mek. A ram mi 4 kan ruai bawk.

2.9. Jharkhan State-ah: 2006 June-ah kan lut a, kan missionary hmasa ber chu Pu H. Hrangchhuana a ni a, native worker 5 kan ruai bawk. Fellowship 9 leh member 350 kan nei. Pu C. Lalremruata-te chhungkua pawh May 2012 khan an thleng thla.

2.10. Assamese zingah: 2005 atang khan North East India a hnam lian ber leh mihring tam ber Assamese zing-ah pawh kan lut leh ta tlat mai. Assam Baptist Convention te nen MOU kan signed tawh a, Good News Mission te nen kan signed leh mek. Tunhnai mai khan baptisma chang thar pawh 30 lai kan nei.

2.11. Sikim: 2006-ah kan lut a. Pu Daniela Hnamte chu kan missionary hmasa ber a ni. Rinchengpong-ah Kohhran pahnih kan enkawl mek. Member tlemte kan nei. Biakin kan sakpui, Pulpit pawh kan siampui. Tunah chuan Pu Daniala-te chhung kua pawh Rinchengpong-ah insawnin hma an la chhunzawm zel.

2.12. Andaman & NicobarIsland: Kan thawhna te hnam hi Karen hnam an ni, an population chu 3000 vel chauh an ni. Pu F. Lalsangzuala chu 1st June 2010 atanga thawktu ngheta lak a ni. Kristian an ni deuh vek tawh, mumal zawka kohhran din pui leh relbawlpui tum a ni. A ram mi tak tak Jarawas phei chu an la mawl em em a, silhfen pawh la inbel mumal vak lo an ni. Sorkarain an hnena chanchin tha hril a phal lo nain kan missionaryte hian thianah siam an tum mek a ni.

3. INDIA RAM PAWN – FOREIGN-AH

3.1. Bhutan: 1975 atangin Rev. K.D. Siamliana te nupa Leprosy Mission hnuaiah rei tak an lo thawk tawh a, tunah chuan an thawk tawh lo. TBZ nen kan thawka, Rev. Zirsangliana Ralte chu FD-in a awm mek. Aram mi thawk tu Jikme Zangpaw Evangelist kan ruai bawk (Samruk Jongkharah a awm). Native worker rawihbelh zel kan tum. Tunah hian kan Field Director-te hian ngawrh takin tawng an zir mek. Engtikah emaw chuan Lalpan Bhutan rampumpui hi BCM mission hmang hian a lalna ramah a la siam dawn a ni.

3.2. Tailand-ah

3.2.1. Akha hnam zingah: 1985 atang khan Akha hnam zingah Rev. Lalthanzauva te nupa an thawk tan a. Chanchin Tha hril leh Kohhran din lamah Pathian malsawmna an dawng nasain an hlawhtling hle. Akha khaw tinah Kohhran din a ni tawh. An tawngin Bible lehlin zawh tawh a ni. Kan missionaryte hi an retire a lo hun ta bawk a, tunah chuan Akha hnam chu kan chhuahsan ta.

3.2.2. Karen hnam zingah: 1984-ah January 24-ah Pi Zothansiamin Karen zingah a thawk tan. A rawngbawlna Pathianin nasa takin mal a sawm. Tunah hian naupang 500 dawn lai hostelah a enkawl a. Heng naupangte hi Krista hnenah hruaia a rawngbawl turin a buatsaih mek.

3.2.3. Thai zingah: Rev. Vanlalmuana te nupa pawhin December 2000 khan  Thai thingtlang (Budhist) khuaah an thawk tan, an rawngbawlna Pathianin mal a sawm hle a, kohhran din tumin hma an la mek. Ring thar pasarih vel lai an nei tawh. Pu Dema te chhungkua pawh Banluangah an awm tan ve ta. Rev. R. Marina te chhungkua pawh Thai Ethnic zinga thawk turin an inbuatsaih mek. May 2012 hian an kal theih beisei a ni.

3.3. Nepal: 1993 atang khan Nepal-ah kan thawk tan a. kan missionary-te Upa P. Lalringa te chhungkua, leh Rev. V. Kapenga te chhungkua chu  (2009) khan Penson-in an lo chhuak tawh a, tunah hian Pu Laltlankima te chhungkua leh Pu Rodinglianate chhungkua an awm mek. A rami evangelist Pastor 8 kan ruai a, an BibleCollege pawh kum tin Rs. 60,000.00 in kan tanpui. Kohhran 10 member 829 nei kan enkawl mek.

3.4. China: Kum 2001-ah kan missionary hmasaber Pu Dema chuan China khawpui Xian a thleng. Nl. Lalhlupui-in Xian International Study University-ah a zirtira, Pu Rema’n University of Architechture and Technology, Xian-ah a zirtira, Nl. Jenis hian Xijing University-ah a zirtir bawk. Tunah hian Pu Remsangpuiate nupa hi Yinchuan khawpuiah a insawn. An rawngbawlna te hnam hi Hui (Muslim) an ni. Tunah chuan Nl. Jenis L. Bawihtlung chuan pasal a neih avangin a thawk chhunzawm ta lova, Nl. Lalhlupuii Sailo pawh kan kohhran atangin bang tawh mahse a la thawk chhunzawm zel a, BCM recognized missionary a la ni reng.

3.5. Bangladesh: Mire hnam zingah 2003 atangin kan thawk tan. Rev. Lalhmunsanga chu missionary hmasa ber a ni. Kohhran 8 leh member 900 vel kan nei. Primary school 3 leh thawktu 9 kan nei. Visa neih te a harsat avangin Rev. Lalhmunsanga hi a lo chhuak leh tawh a, tunah chuan Pu Rosanglura Fanai chu kan missionary niin Mire field enkawltu ber a ni.

3.6. Bangladesh Chakma: Bangladesh-ah hian Chakma zinga rawngbawltu Evangelist pahnih Kanti Chakma leh Kiran Chakmate ruaiin hma kan la mek bawk a ni. Chakma Bible Translation lamah an tangkai hle.

3.7. Africa: Ghana – Lo chu khawvel a ni, Lal Isuan a tih ang khan khawvel hmun hrang hranga a lo-ah hian thawk turin min ko ve tlat si a, a kohna chhan zel hi kan mawhphurna a ni. Kum 2010 khan Rema chu Ghana rama Dangbanli (Muslim) zinga thawk turin Serving in Mission (SIM) nena tang tlangin kan tirchhuak ve leh ta a ni.

3.8. Africa: Kenya –  Kum 2010 vek hian Kenya rama Somali (Muslim) zinga thawk turin Rev. VL Bs-a chu SIM nen bawk tang tlangin kan tir chhuak ve leh ta bawk a. Nl. Maria Hnamte pawh Somali refugee zingah bawk thawk turin lak a ni leh ta bawk a.

3.9. Indonesia: Kum 2011 khan Rev. Lalfakzuala te chhungkua pawh Indonesia Muslim zinga thawk turin Global Interaction nen tangtlangin kan tirchhuak ve leh ta.

Kan nihna:

Baptist Kohhrante hian kohhran pawl dangte aia kan danglam bikna kan sawi fo dan chu, “Keini chu missionary rilru pu, thlarau bo vei kohhran kan ni” tih hi a ni. I nihna sawi fiah nan I hmang ve ngam dawn em?

Tunah hian mizoramah tualchhung kohhran 537 kan nei a, baptisma chang chin hi nuai khat pawh kan tling lova. Mission field-ah erawh chuan kohhran 1000 aia tam member 200,000 vel kan enkawl mek a ni.

Leave a Reply