Aug 16 2012
Theological Education Sunday
August 19, 2012 Pathian Ni hi BCM ni pawimawh, Theological Education Sunday a ni a. He Ni hi 1956 atangin “Serampore Collage Ni” tiin kan Kohhran Calendar-ah dah a ni thin. Rev. Dr.C.L.Hminga chuan Serampore College atangin 1955-ah B.D. a zo va. College atanga an lo chhuah dawnin Serampore College hian tanpui an ngaihzia mahni Kohhran theuhva sawi darh turin an inchah a. Ani pawh hian a sawi thin a. 1956 Assembly-ah (Chutih lai chuan Presbytery tih a ni) Phawngpui Bial atangin Serampore College puala chawlhni vawi 1 hman rawtna a lo lut ta a, Assembly pawhin a lo remti ta a ni.
Serampore College dintu William Carey piancham hi August ni 17 a ni a, chumi hnaih ber Pathianni apiang chu he mi ni atan hian ruat a ni thin. He mi ni hi Serampore College tangkai zia sawi nan te, tawngtaisak nan te hman a ni a. Pathianni zing thawhlawm chu headquarter-ah thawn a ni a. A hlawmin Serampore College tanpui nan pek a ni thin.
Hun a lo kal zel a, tunhma angin kan Pastorte Serampore-ah vek Pathian thu zirin tirh theih leh tirh sen an ni ta lova; India ram chhung Theological College hrang hrangah an lo zir ta hlawm a. Chuvangin Serampore College Ni tih chuan a huapzo tawk ta lova; a hming hi College dang pawh huap vekin Theological Education Sunday tih a lo ni ta a. A hun thuah pawh a changa Pathianni vawi 2-na, a changa Pathianni vawi 3-na hman thin ai chuan Assembly chuan Pathianni vawi thumna hi a ruat nghet ta a. Thawhlawm pawh hmun khata chhun luh vek a rem tak loh avangin Headquarters-a thawn kher lovin Chawlhni tuk dang thawhlawm ang bawkin a zalen ta a; tualchhung Kohhran in a duhnaa a hman theihin a awm ve ta a ni.
Tunah chuan keimahni (BCM) ngeiin Theological College (Academy of Integrated Christian Studies) kan neih tak avangin Pathian thuzir pawimawhna inzirtir nan leh kan College din atana thahnemngai taka Kohhranhote thawk zaho tura infuih tharna ni atan hman a ni ta a ni.
Pathian hruaina zarah Academy of Integrated Christian Studies tluang takin kan kal zel a, October 18, 2010 khan kum 10 a tling a, ropui leh hlimawm taka lawmna kan nei a. Tunah hian AICS kum 12-na kan hmang mek a ni. Hemi hun thlenga Pathian min hruaina hi a makin a ropui hle a, kan thupui, Hei hi Lalpa tih a ni, kan mithmuh-ah a mak a ni, kan ti lo thei lo a ni. Heng kum chhung zawnga harsatna leh lawmna kara min hruaitu leh engkima min thawhsak zeltu Pathian hnenah lawmthu awm rawh se.
AICS Report tlangpui
Kan Lalpa Isua Krista hmingin Kohhran member zawng zawngte Theological Education Sunday pualin chibai ka buk e. Theological Education Sunday atan chhiar chhuah tur report a tawi thei ang berin ka han ziak a, kohhran tinin in lo chhiar ka ngen a ni.
Pathian hruaina zarah AICS pawh tluang takin kan kal zel a. Kumin 2012 October hi a kum 12 tlinna tur a ni a, tun thlenga Pathian min hruaina hi a ropui hle a, Hei hi Lalpa tih a ni, kan mit hmuh-ah a mak a ni, tih hi kan thupui ber a ni reng fo a, min hruaitu leh kan mamawh zawng zawng min petu Pathian hnenah lawm thu awm rawh se.
1. AICS graduates -
Kum 2011 April thlenga AICS atanga M.A, M.Div, B.A., Missionary Orientation leh Pro Pastor leh Pastor Refreshers Course zir chhuak tawh zat chu 246 an ni a, Dip. in Mission studies 12 –in April khan an zir zo bawk.
2. Zirlai
Kumin June, 2012 ah hian Pro Pastor 5, Dip Mission studies 5, Music students 6, B.D. 94 leh, M.Div 11 zirlai kan nei a, an zavaiin zirlai 121 kan nei. Kan zirlai te hi Kohhran pawl hrang hrang Baptist, Presbyterian, Methodist, Salvation Army, UPC, IKK, LIKBK leh Rinna Kohhran an ni a. State hrang hrang -Arunachal Pradesh, Assam, Manipur, Nagaland, Tripura, Meghalaya, West Bengal, Myanmar and Bangladesh atanga lo kal te an ni.
3. Foreign exposure Student:
Princeton Theological Seminary, USA atangin Miss Kelsy Pagh, Field Education (Practical ministry) tiin June ni 4 khan a lo thleng a, English class te a la thin. Kohhran-ah te pawh thusawina hun a nei thin bawk. Ani hi USA atanga zirlai lo kal 4-na a ni. USA-a theological college hming thang tak mai nena inlaichinna kan nei thei hi kan lawm hle a ni.
4. Doctorate Degree la thar:
Kumin February thla khan Serampore Convocation New Theological College, Dehradun-a kan neihah chuan kan lecturer te pahnih Rev. Vanlalchhawna Khiangte leh Rev. Thongkhosei Haokip-te chuan docotorate degree an dawng a, a lawmawm hle. Rev. R. Zolawma pawhin nakum Serampore Convocation, AICS-a kan neih turah doctorate degree a dawng dawn a, a lawmawm hle. Mr. Senti Aier pawh doctorate zir zovin a lo haw a, nakumah an pahnihin an dawn kan beisei. Rev. C.Vanlaldika pawhin doctorate degree a dawng hmanin a rinawm.
Tuna M.Th zirlai kan enkawl mekte chu Rev. R.Lalmuanzuala leh Rev. K.Lalzarliana te an ni a. An ni bakah hian Basic sponsorship kan pekte Vanlalpeka, Joseph Lalrammuana leh one time scholarship pea kan enkawl Jame Lalnunhlua, Lalhmingmawii leh Johny Lalhmingmawia te an ni.
Tin, doctorate zir mekte chu Rev. R.Lalthanmawia, Rev. Rodinmawia, Rev. H.Lalthlamuana leh Pu Andrew Lalhmangaiha (USA-ah) te an ni. a
5. Faculty members awm zat chu 15 kan ni a. Zirtirtu thar Joel Zoramthanga leh Mr. Lalsiamkima (Music) kan nei bawk. Office leh Library Staff 6 kan nei.
6. Probationary Pastors 5-te K.Vanlalzika, K.Lalsanglura, Hmangaihvulluaia, David Lalmalsawma leh Malsawmzuala te n Orientation Course tiin AICS-ah an awm mek.
7. Lay leadership Training:
Lay leadership Training hi May 2012 thleng khan vawi 21 kan nei tawh. Kumin April -May thla khan Theiriat Bial leh Cherhlun Bialah kan nei. Leadership Training zo tawh hi Kohhran hruaitu 1780 an ni.
8. Pastor Refreshers Course
Pastor Refreshers Coursehi tum thumna November 2011-ah neih a ni, Pastors 21-in Refresher’s Course an zo tawh. November 2012-ah hian Pastor Refreshers’ Course kan nei leh ang.
9. Result:
Kumin hian B.D. pahnih chauh B.D graduate kan neih tum a ni, kum thum atanga kum li Course-ah kan inthlak kum a ni a, heng pahnih te hi B.Th atanga lo kal niin anni chauh hi kum hnih an zir a, chuvangin an tlem a ni. Senate result pawh a chhuak tawh a, Second Class-ah an passed ve ve a, Class dang pawh an passed tha e. Pathian hnenah lawmthu kan sawi a ni.
10. Thlarau lam nun:
Thlarau lam nun tihhmasawnna-(Spiritual Formation)hi college tam ber tlakchham a ni thin. AICS-ah hian zir thiamna bakah rawngbawltu tha leh mipuite thlarau lam nun kaihruai thei turin zirlaite thlarau lam nun tihhmasawnna atan kawng hrang hrangin tan kan la a, Pathian biak (Worship) activities chi hrang hrang kan nei a, Pathianin kan Pathian Biak program hrang hrang hi a tinung a, thlarau lam nun tihmasawntu pawhmawhtu tak a ni.
11. Hnatlang:
Kohhranten theih tawp chhuahin hnatlang an rawn nei thin a, kan lawm hle a ni. Kumin February 2012 atanga lo hnatlang tawhte chu: Luangmual Bial BKHP (20/2), Bawngkawn Bial leh Durtlang BMP (3/3), Bawngkawn Bial BKHP (19/5) Zotlang Bial TKP, (19/5), Aizawl East Bial TKP (6/7). An zavaia chungah lawmthu kan sawi a ni.
12. Serampore Convocation:
Nakum February 6-10, 2013-ah hian Serampore Convocation hi BCM-in AICS-ah a thleng dawn a nih kha. Hemi atan hian kohhran leh mimal thahnemngaite leh FOD ten sum in rawn thawh tawh a, a lawmawm hle a. Thawh tawhtute leh thawh zat te a hranpain hun dangah tarlan a ni ang. Convocation hmaa peih hman turin building pathum Women Hostel, Mission Building, leh Tuizem lian kan sa mek a, a hautak hle. Theihtawpa kohhran leh mimal leh Pawlho sum thawhtu zawng zawng chungah lawmthu kan sawi a ni. Serampore Convocation-a hman hman ngei tura kan tih avangin kan insakte hi December-a sak zawh ngei ngei tura ruahman a ni a, tan lak nasat a ngai hle a, thawhlawm thawh, hnatlang leh tawngtaia min tanpui zel turin memberte kan ngen a ni.
Lalpan kohhran member tinte malsawm che u rawh se.
