I tanpuina an nghak reng e

A Brief History of Baptist Church Orphanage

– Rev. Sangliankhuma Chinzah BA, BD, MSW

Kan pi leh pute hun lai khan mizote hi kan lo  mawl em em mai a, Nu Raicheha a thih chuan a fasen fuke kim leh pian tha tak pawh kha a damchhuak zo chuang lovang tiin a nu an lo delh hlum tir mai  thin a. Nausen thi chu a nu ruang bula dahin a nu phum rual chuan thlanah an lo phum tel ve mai thin. Chutiang chuan nausen tam tak kan pi leh pute khan an lo ti hlum tawh a ni. Missionaryte Mizorama an lo chhuah khan mak  leh rapthlak an tih em em chu nausen  a nu a thih a vanga an lo tihlum ve mai thin leh  a nu ruang bula an lo phum tel thin kha a ni. Mizorama missionary hmasa ber Pu J.H.Lorraina nupui Pi Dari khan heng nausen a nu thihsan te hi an thi tur a ni lo tiin, kum 1918 vel a tang khan BCO hi a lo intan tawh a ni. Pi Dari chuan a fahrah lak nausen hmingah pawh a khawngaih em a vangin Khawngaihbula a lo ti a ni. Kan missionary hrang hrang Pi Zirtirite, Pi Dawkite leh midang te chuan fahrah nausen enkawl chu an chhun zawm ta zel a, anmahni puitu a tan Mizo hmeichhia Pi Thangchhumi  Pathianin a lo ruat  leh zel a ni.

Kum 1923 atang chuan Pi Thangchhumi chuan Fahrah enkawlna tak tak chu a lo din chho ta zel a. Nausen an lo tam hnuah chuan mahni maia enkawl a lo harsa ta a, Kum 1951 khan Motherless Baby Association a lo ding a. Chung mi tlawmngaite chuan tuna BCM Pastor Quarter Chanmari Lungleiah hian Hnuchham in an lo sa a, chutah chuan fahrah nausente chu an enkawl chho ta zel a ni. Ram a lo buai khan harsatna tam tak mizoramah a lo awm a, Motherless Baby Association te pawh chuan fahrah nausen enkawl zel chu an tan a  lo harsat tak em a vangin an committee chuan Baptist Church Of Mizoram hian enkawl tawh mai se tiin 5th July 1966 a tang in   Baptist Church Of Mizoram chuan Motherless Baby Association chu  a enkawl chho tan ta a, a hming pawh thlak in  “Baptist Church Orphanage” tih a lo ni ni ta a ni. BCM in a lak ni a tang khan Christian Hospital Serkawnin a enkawl chho ta zel a ni. Chanmari BCM Pastor Quarter a tang chuan Christian Hospital Serkawn Nurses Hostel chhunga Pu Murray a building Kohhranin a leiah chuan an in sawn chho a, Chumi hnu 4th June  kum 2004 ah tuna an awmna Ramzotlangah hian an in sawn chho leh ta a ni.

Christian Hospital Serkawnin  kum 47 zet  Baptist Church Orphanage a enkawl hnuin Dt 12th April 2013 atang khan BCO chu Department tharah a lo ding ve ta. Department thar a a lo din  ni a tang hian  sum leh pai tam tak a ngai nghal a. Office tur siam a ngai a, computer kan nei lova, nurse thar nausen enkawl tu tur a ngai nghal a, tih tur atam hle mai, Nausen te chaw ber  Lactogen, Nestogen leh bawnghnute etc  thla tin  case li/nga lei a ngai ziah a ni.

Kohhran member  tam zawk hian BCO hi Ramzotlangah a awm tih pawh kan  hre tawh lo. Chu mai chu ni lovin mi tam zawk hi chuan BCO a sen so zawng zawng motherte hlawh, nausen bawnghnute leina leh an Lactogen etc man zawng zawngte hi Baptist Church of Mizoram hian a tum vek a lawm an ti. Mahse hei hi an hriat chian loh vang a ni. Kum 3013-2014 a BCO Budget pumpui chu Rs 16,94200/- a ni a, heta tanga Kohhranin a tum chu 75% vel a ni a, 25 % hi Public  Contribution atanga hmuh tur a tih a ni a, Chumi awmzia chu Rs 12,90,500/- hi BCO enkawl nan BCM in a tum anga, a bak zawng Rs 4,03,700/- hi Public  contribution a tanga hmuh tur a beisei a ni. Motherte, nurse hlawh tur leh an damdawi leh an bawnghnute mante  thlatin cheng tam tak sen ziah a ngai a ni.

Tun kumah hian Nausen 25 an awm a, 13 la chhuak tawhin tunah hian 12 an awm a ni. Nausen engzat nge tunkumah hian an lo dah belh leh dawn kan hre lo. Nausente hi an nute thihsan ngei khawngaih thlak tak takte an ni. Nausen thenkhat an pian a tanga reilote a an nuten an thih san an nute hnute vawikhat pawh hne lote, nithum lek an nih a, anu tuia tlahlumte leh an nute an at etc a vanga enkawl ngaite BCO ah hian kan enkawl a ni.

Kan Kohhran Member zawng zawngte hian Kan Missionary hmasaber Pu Buanga (Rev J.H.Lorrain) nupui Pi Darin kum 1918 a a lo din daih tawh BCO hi i hre thar leh teh  ang u, Pastor Bial hrang hrang, unit leh FOD te khan BCO tan hian budget leh planning te siamin in fehchhuahnate, in Sunday zing thawhlawm etc te khan  BCO hi han  tanpui  thei ula a va lawmawm dawn em. A bik takin MBKHP, Bial  leh Unit BKHP te pawh hian BCO lamah hian in mit lo len ve tawh ula kan va lawm dawn em. In sum leh pai leh tawngtai puina kan mamawh a ni. Malsawmna tam tak i dawn a tang khan BCO tan hian engzat nge i pek ve dawn? A tam lua leh tlem lua awm lovin BCO hi han tanpui ve teh. BCO a naupang khawngaih thlak tak takte hian i tanpuina an lo nghak reng e.

Tanpuina hi Executive Secretary Office Aizawl, Executive Secretary Office Lawngtlai, Christian Hospital Serkawn Bill counter, BCM Main Office leh BCO Office Ramzotlangah engtik lai pawhin a pek theih reng e. BCO Account a pe duhte tan, Mizoram Rural Bank Serkawn Baptist Church Orphange Account No 25019018093 a ni e.

Nang  Malsawmna ni ang che.

Read More Article/Sermon : Click on this link : Articles/Sermon

Leave a Reply