INNEIH (Marriage)

Thlir zauna:

– Rev. C. Lalbiakzama

Mihring dam chhung hunah hian thil pawimawh zual tak tak pathum a awm tia sawi thin a ni a. Chungte chu Pianni, Inneihni, Thihni-te hi an ni. Heng zinga chiang taka kan hriat leh hman ve theih chu Inneihna hi a ni. BCM Constitution chuan inneihna chung chang hi chipchiar tha takin Kohhan mite hman turin a buatsaiha. BCM-in inneih dan chi hnih a neihte chu – Kohhran Dan Puitlinga Innneihna leh Kohhran Dantea Inneihnna te hi an ni. He mi bakah hian India Kristian inneih dana inneih leh Civil Court-a inneihna hi BCM chuan a pawm a ni( BCM Rules Part 111 bung 24: 122:7). Innei turte hi Kohhranin a duh duh kan inneihtir mai bik lova, Sawrkar in kum tlinga a pawmte chauh neih tir turin kan Dan pawh hian min khuap ve tlat a ni. Rules Part111 bung 20:118,4-na-ah hetiang hian kan hmu ‘Sawkarin kum tlinga a chhiar chinte chu inneih tir theih a ni ang. Heta kum tling a tih hi mipa kum 21 leh hmeichhia kum 18 tling chin a ni. Amaherawh chu, mipa kum 21 leh hmeichhia kum 18 tling lote pawh ram danin inneih an phalsakte chu phalsak theih an ni ang’, tiin kan in hung ve tlat a ni.

Inneihna dangte hi:

BCM hian eng angin nge a ngaih i lo en teh ang.

1. Kohhran inneih dan puitling emaw Dan te emaw a, innei thei rengin Kohhran dan an pawisak lovanga a eng zawk mah hmang lova, an inneih chuan Kohhran hriatpui theih a ni lo. Nupa an nihna pawh Kohhranin a pawm lovang.

2. Kawlawka lut tur inneihna chu Kohhranin a hriatpui thei lova, Kohhran Upa leh Rawngbawltute palai pawh a phal lo a ni. ( Rules Part 111 bung 20:118, 1-3)

3. Innei ve ringawtte hi phuarphelh an nih hunahte leh Kohhran member puitling la ni lo, an nih hmaa inneite Kohhranah member puitling an lo nih hunah an duh chuan Nupa a pawmna Certifate Kohhranah an la thei ang. (Rules Part 111 bung 23 121: 1, 4).

Same sex marriage hi:

Tunlaia khawvel buaipui tak mai Mipa leh mipa, hmeichhia leh hmeichhia inneihna (Same sex marriage) hi BCM hian engnge a ngaih dan ni ang? BCM hian ngaihdan fel tak a nei sa daih tawh a, kan BCM Rules Part 111 Bung 24 :9 ah hian hetiang hian dah a ni; Mipa leh mipa emaw Hmeichia leh hmeichhia emaw nupa anga inkawp hi Pathian thu kalh a ni a. Kan kohhran mite chuan tih loh tur a ni.Chutiang mi an lo awm chuan kohhranin a zilh tur a ni a, thunun thlengin an chungchang thu ngaihtuah theih a ni ang, tiin a dah a ni. Khawvel a kohhran tam tak he thilah hian an rilru a nem duai daui lai hian, keini BCM chuan ngaihdan mumal tak neiin inkaihruaina bu ah hian a dah hial a ni tih hi kohhran miten kan hriat a tul hle mai.

Kohhranin inneih sawngbawl a duh dante:

Mite lawmni leh hlim huna mi inhuamna lo hupbeh sak leh a nep zawnga in kalpui tumna lam ni lovin, BCM chuan kohhran mite inneihna hi mitinin an tlin theihna tur leh hrutrual thei turin hautak lutuk lo zawnga buatsaih a duh avangin Rules Part111 Bung 24:122 ah hian kohhran mite hman turin Dan-ah a dah a ni.

Incheina (Mo thuam) hi:

Inneih ni a incheina (Mo thuam)hi apawimawh hle a, kan damchhunga hun pawimawh a nih avangin zahawm leh mawi taka inchei chu kan tih tur a ni. Kohhran hi chuan mawlte zahawm tak si hmang thiam turin min duh hle a ni. Incheina a hau tak hian inneih sum hman a ti sanga, kohhran dan anga inneih an hrehphah thin a ni. Chuvangin a nei deuhte pawhin insum thiama, kohhran duh dan an zawm tlan hian a neilo zawkte chhawk zangkhaina a ni tih hi ngaihtuah thiam a tha khawp mai. Tin, Inneih incheina hautak lutuk hi a rem ti lova, Mo incheina pawh mipain an tum sak hi Kohhran chuan a phal lo ( Rules Part 111 bung 24na), a chhan chu he mi denchhen hian mithenkhatin mipate hnenah incheina hau tak pui pui phutin phurrit an siam theih avangin a ni.

Thuam thil chhawm hi:

Hindu Culture-a chhungkaw tam tak lungngaihna thlentu chu inneih thuamchhawm (dowry system) hi a ni. Thuamchhawm hian an pasalte chhungkaw lawmna leh lawm lohna a thlen thin avangin hmeichhe tan chuan an pasalte chhungkua a tlaktlum nan a ngai a ni. An pasala chhungte beisei ang an chhawm loh chuan sawisak leh tihlum hial hmeichhia ten an tawk thin. He chin dan(culture) hlauawm tak hi Kristiante zingah pawh kan inneih thuam chhawm duh dan atangte hian zawi zawin kan hriat loh hian min hnuk lut thei a ni. BCM chuan ‘thuam thil chhawm hautak hi a rem ti lo a ni’ (Rules P-111 bung 24-na) Kristiante inneih hi chu thuamchhawm tam avanga inneia chhungkhata insiamna a ni lova, kan tlin lohna leh fellohna te pawh dah thaa hmangaihna tak tak parchhuahna a ni zawk a ni.

Ruai hi:

BCM Rules Part 111 bung 24-ah bawk khan ‘Ruai hautak buatsaihte chin loh tur a ni’ tiin a dah a. Tunlai hian inneih ni a ruai siam mai ni loin man hlan niah pawh hmeichhe lam hian ruai pui thamtak kan ti ta deuh zel mai te hi kan ngaihtuah ngun a tha hle ta mai.

Ruai siam hi a hautak ngaihtuahin mo lawmte a huapzo tawh em tih erawh chu kan ngaihtuah chian a tul ta hle mai. Veng hla office kal leh ngai avanga chaw ei tura intlar chhung rei tak atana hun hmang hman lote thingpui in tur awm mai silo min ngaipawimawha hun leh sum rawn sengte Mo lawmna thil ei miah lova haw leh ta hi an tam a ni tih hi inneite hian kan hriat a tul ta hle.Awlsamtea kan chan tlan theih tur tuihnai si ka ngaihtuah thiam hi a fin thlak hle zawk ang.

Man ei hi:

Man ei hi chu kohhran dan lama en chi a ni lova, Mizo Hnam Dan (customery law) lam a ni thung a ni. Mizoin man ei tur kan sem thina, chung man eitu tur kan Mizo danin a sawi angia kan in eitir hian hmeichhe man 420-ah hian Rs 220 a la bang thei a ni. Man ei tur kan tih tam hi laina hnai siam nan kan ti a nih hmela,emaw phungthlukna atan emaw a ni ang., mahse sum a heka, miretheiin kan ti ve lo thei lova, inneih phurrit siamtu zinga miah a chang thei a ni. Man ei tam ai chuan a ei tur tak tlem deuhin an ei hian a zahawm zawk ta.

Tlangkawmna:

Mi hlimni leh lawmni a lo fekfawn sak viau i ti mai theia, kohhran chuan mitin rethei leh hausate khairual thei ang ber hi a thlir thin a ni. A nei deuhte pawh an insum hlek khan miharsa zawkte tan kawng an siam saka, min chang rengtu intluktlanna thai bo thei Class System hi kohhran chuan a veng reng a ni tih hriain kohhran duh dan hi zawm hram hram ila kan khawtlang leh chhungkua kan him ang.#

Read More Article/Sermon : Click on this link : Articles/Sermon

Leave a Reply