MISSIONARY DAY – Geneeral Secretary

1. “Missionary Day”(January 11).

January Ni 11 hi Sapram khaw pakhat Leeds khaw pa hausa Robert Arthingtona’n Sap Upa (F.W Savidge) leh Pu Buanga (JH.Lorrain) Mizorama Chanchin Tha hril tura a rawn tirhte’n Mizoram an rawn luh ni-January Ni 11.1894 kha a ni. Kum tin he ni hriatrengna tur hian Mizoram Sorkar chuan  kum 1994 atang khan Public Holi Day(Sorkar Chawlh)ah a puang ta nghe nghe a.

2. Golden Jubilee: (Kum 1894-1944=50)

Kum 1944 January 11 khan Mizorama Chanchin Tha lo thlen kum 50-na Golden Jubilee chu Mizoram Baptist Kohhran leh Mizoram Presbyterian Synod chuan mahni hmun ve ve-ah lawmna hun hman a lo ni tawh bawk.Mizoram Baptist Kohhran chuan he Golden Jubilee hriatrengna atan tiin “Jubilee Bible School” (Pathian Thu zirna a din hial a ni.

 3. Gospel Centenary: (Kum 1894-1994=100):

Kum 1994.January 11 khan Mizoram Kohhranhote chuan Gospel Centenary (Chanchin Tha thlen kum 100-na) lawmin Aizawl khawpuiah leh Lunglei khawpuiah chuan urhsun takin hun kan hmang a. Khawpui dangah leh Thingtlang khaw tinah phak tawk theuha uarin he ni hi Mizorama Ni Special bikah ngaiin kan hmang theuh a ni. Aizawl khawpuiah chuan Mizoram Baptist Kohhran leh Presbyterian Kohhran te chuan mahni puala lawm tuma an inbuatsaih hran ve ve laiin Mizoram Chief Minister, tuna kan C.M  Pu Lal Thanhawla chuan Kohhran hrang hrang Hruaitute, a CM Office Chamber-ah ko khawmin Kohhran zawng zawngte chuan inlungrualin Mizoram Sorkar pawh a tul anga telin Hmun khata lawm tha a tih thu a sawipui a. Chu rawtna chu Kohhran hrang hrang Hruaitute chuan Tha tiin Sipai Lammualah Ropui takin kan lawm a ni. Lunglei lamah pawh Kohhran zawng zawng infinin ropui taka lawm a ni bawk.

4. Mizoram Presbyterian Synod:

Kum 2012 Mizoram Presbyterian Synod chuan Mizorama Chanchin Tha thlen ni chu Ni 15.March.1891 a ni e tiin a puang thar ve leh ta a. Welsh Calvinistic Methodist Foreign Mission-chuan kum 1887 khan Khasi rama Missionary tur mi 8 a la a; chung zingah chuan Nanternis khua, kum 1859 Feb Ni 11-a piang William Williams pawh a tel a. William Williams hi a thiante 3, Benjamin Aitken, Kashinath leh M.Khanai (U.Khana) te nen Mizoramah an rawn zin a. Kum 1891 March Ni 14-Inrinni-ah Lawngin Kutbul Lui chhuah,Mizoram an rawn lut a; A tuk Ni 15 March chu Pathian ni a ni a, Mualvum naupangho tuicheng tur ?te an hmuh hnenah Bible milem an pe a; Hlate pawh an sa awm e. Hei hi Mizorama Chanchin Tha thlen hmasak berna niin an puang ta  a ni.

5. Mizorama Krismas Hmasa ber, Tlabungah:

William Williams leh a thian ten Mizoram an rawn luh ve hma kum 20 zeta hmaah khan Kum 1871-ah TH.Lewin (Thangliana) Lt Colonel leh a ho te’n Mizo lalte bei turin Tlabung chhuahsanin Mizo khaw tam tak an han hneh a;.Dec 21.1871-ah Kristmas hmang turin Headquarters-ah an kir leh a, Hmar chhak lama kalte pawhin Sial 24 an mansakte nen Headquarters- lamah lo kirin Kristmas Ni chu Ruaipui nen an hmang ta a ni. Kum 1871 hi Mizorama Krismas hmanna hmasa ber a ni. A lawmtute hi Britist sipaite an ni a, Mizo Kristian an la awm lo. Tin, Headquarters hi Tlabung a ni.

(The Lushai Expedition pp 133-134, Zoram Vartian.pp 104-105).

 Kum 1871-a Tlabung khuaa Britist Sipai te’n Krismas an hman tum hian an hotupa ber TH.Lewin nena englai maha inthen thei lo, ral rel leh thubuai hlabuai leh  tinrenga a thian tha ‘Khawthlang lal ropui,’ an tih Rothangpuia (Tangka Rothangpuia an ti bawk), Khawthlang khaw 15 zet awptu leh a thian thenkhatte chuan he Krismas ruai hi an kilpui nia sawi a ni. Mizote chuan a awmzia an hriat ve lem loh avangin Krismas awm chhan an sawite pawh chu barah an khawn lem lo. Rothangpuia hi Lt Colonel TH Lewina’n Mizo lal Bengkhuaia In atanga Zoluti a lak chhuah tum pawh khan a tel ve nghe nghe.(Lalzara)

6. Zofate Puala Missionary Hmasa berte:

Hetiang hian Mizoram chhunga lo zin-sipai an ni emaw, Pathian rawngbawltu an ni emaw, Pathian thu an sawite chu pawm loh sak ngawt tur pawh a ni bik love. Heng kan sawilante aia hmaah hian tute emaw chuan khawii laiah emaw chuan lo sawi pawh an awm thei bawk, chungte pawh chu kan la hre chhuak zel mahna. Britist Sipaiho chu Mizo lal helte rawn tudai tur leh Zoluti rawn hruai tura lo kal an ni a, Chanchin Tha rawn thlen kha an mission a ni lo. Tin, William Williams te thian zaho pawh Mizoram rawn zina, rawngbawlna hmun atana rawn thlithlai pawh an ni ang, mahse Mission Board tirha Mizorama thawk tura rawn kal an nih rih loh avangin an sulhnute chu rin tih belh deuh mai lo chu eng han sawi tur em em an hnutchhiah love. Pathianin Mizoram leh Zofate pual liau liau tura Arthington Aborigin Mission hmanga a rawn tirh Missionary-te: Mizorama riahbuk rawn sual ve tak tak a, Chanchin Tha Mei mit lova vawiin thlenga chit ên a la nih zelna bul tak hi chu Sap Upa leh Pu Buangate niin, anni 2 hi Pathianin Mizoram tana min pekte an ni a. Mizoram an rawn luh Ni, January 11.1894 kha Chanchin Tha thlen Ni atan Mizo mipui te’n kan puan tawh kha a la dik reng a; a Ni cham kum tina Mizoram Sorkar rorelna sang berin Public Holi Day-a a puan pawh hi a lawmawm tak zet a ni. Pathian tih mi Ram Hruaitu kan la nei zel hi Mizoram vanneihna a ni.

 6. Mi tin ta tur Chanchin Tha:

Mizorama Chanchin Tha rawn thlentute (Missionary hmasa ber Sap Upa leh Pu Buanga) hi Kohhran mal tirh an ni lova, Pathianin Zofate tan a rawn tirh an ni. Mizoram Kohhran zawng zawngte zingah pawh inti-ta bik tur leh inti mikhual bik tur tumah kan awm lo. Pathian tak kan hriat theih nan Pathianin Mizo mipuite tan Chanchin Tha, anmahni leh an hnu-a Missionary dangte hmangin min rawn pe a ni. Sap Upa leh Pu Buamga emaw, William Williams-a emaw, Lt Col.TH Lewin emaw kan chawimawi a hun tawh lovang a, Pathian kan Fak leh Chawimawi a tul zawk a ni. Chuvang chuan January ni 11- hi:-

  1. Zofate Chanchin Tha min pek avang leh Chanchin Tha avanga kan Ram leh Hnam chawikana kan awm avangin Pathian hnena lawmthu sawina Ni atan i hmang ang u..
  1. Chanchin Tha min petu Pathian Chibai bukna ni atan hmang ila, Inkhawm leh Zaikhawmin Nilengin Pathian Fak leh Chawimawina hun atan i hmang ang u.
  1. A Thlawna kan hmuh Chanchin Tha hi a Thlawn veka pe chhuak ve leh tur kan nih avangin nasa taka Mibote Krista hnena hruai tura kan Inhlan Thar lehna Ni atan i hmang ang u.
  1. Lalpa pakhat, Rinna hmunkhat, Baptisma hmunkhat changtute kan nih avang hian Mizoram Kohhranhote Inpumkhata inunauna tih ngheh nan leh thawhhona tha kan neih theih nan he ni hi i hmang ang u.

“ In hotu, Pathian thu lo hrilhtute che u chu hre reng ula, an awm dana thil chhuak chu ngaihtuahin an rin dan zir rawh u.”(Heb 13:7 ).

Posted in BCM News.

admin