Missionary Sunday – July 5

Mission Map 2012(Small)Tunkar Pathianni, July 5, 2015  hi Mizoram Baptist Kohhran ni pawimawh, “Missionary Sunday” a ni a. He ni hi kum tin, July Pathianni hmasa berah hman thin a ni. Kuminah pawh he ni pual hian Mizoram Baptist Kohhran chuan Biak In tinah Programme kan hmang leh dawn a ni. Kuminah Missionary Sunday thupui-pahnih neiin Pathianni chawhma inkhawm-ah  Chanchin Tha Mi tin Tan tih leh Zan lam Inkhawm thupui-ah “Tawngtai leh Thipek-a Mission rawngbawlnaa tel hi kan vaia mawhphurhna a ni”  tih a ni thung ang. Sunday School lamah pawh Missionary Sunday Pualin thuzir inang tlang, Puitling leh Naupang lam Department-ah then a ni ang a, Tin, Pathianni chawhnu-ah Tualchhung Kohhran a thei apiangin Mission lam pualin Inpawlhona hun buatsaih tura beisei an ni bawk.

Hun hman dan tur:

1. Chawhma Inkhawm thupui: Chanchin Tha Mitin Tan (1Timothea 1:15-16, 2:4, Mathaia 28:18-20, Marka 16:15)

2. Kohhran Zaipawl, KNP, BMP leh BKHP ten hla rem se.

3.   Kohhran pumpui huapin Chawhnu inpawlhona programme siam ni se: BCM Mission rawngbawlna chanchin zirho ni se.

4.   Zan Inkhawm thupui: Tawngtai leh Thipek-a Mission rawngbawlnaa tel hi kan vaia mawhphurhna a ni (Mathaia 9: 37, Ephesi 6: 19, Philipi 4:14-18, Mathaia 25:35,40).

5.   Chawhma inkhawm, chawhnu inpawlhona leh zan inkhawmah te hian kan missionary te tan leh khawvel pumpui huapa missionary te tan tawngtai rualna neih ni se.

 6.  Inkhawm leh Inpawlhona programme chipchiar chu Tualchhung Kohhran kutah dah a ni.

Missionary Sunday lo chhuah dan :

Mizoram Baptist Kohhran hian Missionary hming chawi vek Ni pawimawh pathum kum tin kan hmang ziah a. Chungte chu Missionary Day (January 11), Missionary Thlen champha (March 08) leh Missionary Sunday (July first sunday) te hi an ni. Heng ni pawimawh pathum zinga pahnih hi eng ni pawh a ni thei a, Missionary Sunday chiah hi khel lova Pathiannia kan hman thin a ni.  He ni lo chhuah dan chu hetiang a ni:

Kum 1939 atangin Tuikuk Takam zingah rawngbawlna a lo tan tawh a. Tirhkoh Kawha’n a thawk a. Tuikuk Takam puala thawhlawm chuan a hlawh tur a daih loh avangin 1944 Presbytery chuan Easter Sunday ni-a thawhlawm hi Tuikuk Takam pual atan a hauh ta a. Thawhlawm a lo pun lehzual theihna tur a nih beiseiin 1949 Presbytery chuan July Pathianni hmasa ber thawhlawm hi Ramthim rawngbawln nan pek ni se tiin a rel leh ta a.

Ramthim lama kan thawhna hi hma zauh zel tum a ni a. Chuvangin Tuikuk Takam Pathian ni ti lovin Ramthim Pathian ni tiin kan dah leh ta a. Sunday School-ah te he mi ni hian Missionary chanchin zir duhna a awm ta a. 1970-a Assembly chuan General Commi-ttee rawt angin Missionary Sunday tih ni tawh se a ti a. Calender-ah pawh Missionary Sunday tia dah a ni ta a ni.

Hemi ni hi Kohhrante Missionary rilru pu thar lehzual tura infuihna ni atan hman a ni a; Headquarters atangin thupui thlan sa hmangin Tualchhung Kohhran tinah sawi thin a ni a; Sunday School-ah pawh pawl tinin Missionary Sunday-ah hian Missionary mimal chanchin zir a ni thin a. Thawhlawm erawh chu Headquarters-ah thawn a ni ta lo.

 ……………………………………

Related Links
Mission reports – June, 2015
Missionary Day 2015 : Thuchah
Zoram Baptist Mission to bul 
BCM Mission Map