Sual haw rawh u

-Evan. Upa R.L. Thianghlima

Sual haw rawh u”, tih hi thupek a ni. Zoram ringtute hian Pathian thu hi kan awih dawn a nih chuan sual hi kan haw tur a ni. Mahse Zoram ringtute zingah hian sual pawm zam, sual huatna leh sual pawisakna reng reng nei lo kan tam hle mai. Chuvangin Kristian ram kan intih mek lai hian Kristian ni lo zawk ten an hmuhsit kan ni.

Kan rama sualna chi hrang hrang titute hi ringtu inti vek kan ni a, heng thil tha lo titute hi ringtu inti lo pawh kan awm hek lo. Mahse Lalpan ringtu min ti ve ang em? Pathian thu hi a then a zar leh kan duh lai chauh ni lovin a vaiin Pathian thu zawng zawng hi kan zawm tur a ni. Sual haw lo leh sual pawmzam thin tu i nih chuan Pathian hi ila hmu lo va, i la piangthar lo a ni tih inhria ang che.

Hman deuh atang tawh khan MLTP Act hnawksak ti a sawisel leh hlih duh kan mi thiam te zingah tam tak an awm a. Ram changkang zawk te leh ram dangte tih dan sawi mawiin zu zawrh leh a tha zawk tia sawi mawina chanchinbuah te, TV-ah te kan hmu kan hmu ta a, sawrkar pawhin hlih tumna a nei ta hial a, hei hian ngaihtuahna a ti thui hle. He thu hi ngawisan mai mai a hun lova, kan tlai hma hian sawrkarah aw kan neiha kohhran hote nasa taka kan tawngtai a ngai. “Tho la, i Pathian ko rawh” (Jona 1:6) A tlai hnuah chuan sawi sawi leh a pawi tih hian awmzia a nei lo vang. Zu zawrh leh hi kan thatpuina tur aiin kan thatpui lohna tur leh kan chhiat phahna tur a tam hle zawk ang.

Tin, zu khap a vanga hnam changkang lo ber a indah ringawt hi a dik lo. Sap zu zawrh avanga changkang taa inngaih hi a dik lo. Phalna kan sawrkar in a pek lai a, zu a tam em em a, a tlawm bawk lai khan kan ram leh khawtlang nun rapthlakzia kha kan theihnghilh ta em ni? A that loh em avangin MLTP Act hi siam a nih kha i hre reng ang u.

Zu in dan thiam, damdawia hmang chu an awm ngei a, mahse za a pakhat pawh an awm kher lo ang. Keini Mizo zingah hi zawng in thiam tak tak hi kan vang a nih hi. Zu leh drugs avanga nupa inthenna, khawtlang buaina hrang hrang- insual, inrawk, inthah, rukruk, motor accident, hriselna chhiat phah, piansual phah, thihphah kan tam zia te hi. Kan thlarau nunin a tuar a, kohhranin a chhiat phahzia te camp leh crusade a piangthar te pawhin an daih rei theih lohna chhan a nih zia te hi a hretute kan ni. Zu khapna dan hi hlih a nih chuan kan ram chhungkua leh kohhrante hian kan tuar nasat dan tur hi a rapthlak hle dawn a ni.

Kan khap bet tak tak thei chuang si lo tih hi tehna dik ber a ni lo. Kan khap chung leh sawrkar leh NGO ten theihtawp chhuaha kan do chung pawha kan chhiat phah zia hi hria ila, ingaihte, uire te, tualthah te, rukruk te kan khap thei chuang si lova tiin phalrai ila a dik ang em? Europe ram leh USA state thenkhatah, neih inang te inneih an phalrai a, mahse kan Pathian thu (Bible) chuan, ‘Mawngkawhur ten Pathian ram an luah lo ang’ a ti (I Kor 6:9)

Thufingte 3:7 ah chuan Lalpa chu tih la, sual kalsan rawh a ti a, hei hi a pawimawh hle. Mizoram hi ram dang ang kan ni lo va, Lalpa zawn chhuah ram kan ni. Hebrai 12:5 sual dovin thisen chhuak khawpin in la tang lo a ti. Habakuka 2:15 a thenawm hnena zu in tur petu chu a chung a pik e’ a ti bawk. Chutih laia kristian ram inti si a zu kan zawrh leh si chuan kan ti dik hauh lo vang a, zu zawrh hi Pathian pawikhawihna lian tak a ni tih hre reng ang u. Aw Lalpa hmangaihtute u, sual haw rawh u (Sam 97:10)

Read More Article/Sermon : Click on this link : Articles/Sermon

Leave a Reply