Sual tlenfaina hmangaih Tui

– Dorema Pachuau

Pu Suakliana hla phuah, ‘Kan nghak reng che kan lalber’ tih hla hi ka hla duh em em zinga mi a ni a. He hlaah pawh hian a chang 3-na hi ka duh zual hle a. Kristian Hla bu 18th Edition 2nd reprint 2008 buah khan number 453 na a ni. A phuahtu Pu Suakliana chanchin hi ka hre lo va, a hla atang hian Lalpa a hriatna thuk leh rilzia erawh chu a hriat theih. Kan Lalpa Isua lo kal lehna nghakhlel em ema thlirtu a ni bawk tih a hriat theih a ni.

Pu Suakliana hian a thil hriatchian duh tak chu a chhan-damtu Isua hnenah a zawt a, khawiah nge zion tlang ralmuanna chu a innghah a, sual tlenfaina hmangaihtui chu khawiah nge a luan, Sual dan chahna kulhpui chu khawiah nge a lo awm a, sual dan chah sak tawhte chu eng tin nge maw lawm taka an len theihna chu tih hi a zawt a ni. He hla ka sak apiang hian zion tlang ralmuanna kulh chu khawia innghat nge a nih thi hi ka ngaihtuah thin. He zion tlang ralmuanna hi hmangaihna (agape) hi a ni. Khawi ram pawh khawi khua pawh hi hmangaihna a awm loh chuan ral a muang lova, nun a nuam ngai lo. Phuba inlak tawnna ram chu ramnuam a awm ngai lo reng reng. Roreltuin ro a relsakte a hmangaih chuan rorelsakte chu an thla a muang thin a, hmangaihna tellova rorel chu a kha a, tuar a hrehawm thin a ni.

Zion tlang ralmuanna chu a inhumhimna kulhbang ah a innghat lova, a tichhe turin ral an awm lo. Khawpui hian beitu ral a neih loh vang mai hian a ralmuang ngawt ngai lo. A chhungah in itsikna, lungruallohna, inneksawrna avang hian ralmuanna a bo thei. He zion tlang/vanram/van lalram (kohhran hovah) hi chuan hmangaihna a awm tlat avangin a ralmuang a ni. He leiah hi chuan he khawpuiah hian ral a lian fo thin a, sualin a tichauvin a hliam fo mai. Mahse, he khawpui rorelna hmunpui, a kulh kawngkhar chu van nen a inzawm tlat a tihchhiat theih a ni lo. He khawpui hi sual danchahna kulh chu a ni a, misual dam lehte chen khawmna a ni. Rukru, uire, bumtu, sual chi hrang hrang khawihtu dam lehte an ni a, mahse an chhandamtu hmangaihna hria a hmangaihna salman an ni. Hmangaihna chuan an sual nen a then hrang a, khawvel tan khenbeh an ni. Chu khawpuia an luh a chin chu sual nei rengin an awm thei lova, chu khawpui chu sual dan chahna khawpui a ni.

Khawvelah hi chuan hrehawmin kan awm thin a, a chang chuan hmangaihna hian ro a rel thei lova, kohhran hovah in ei loh tawnna a lengin lungrualna a tlak chhiat chang a awm thin. Lemchang tam tak awmna leiah hi chuan thawk rimtuin rah a seng lo va, mi vervekten chan ha an chan ni a awm fo thin. Mahse khawvel hi a ral ang a, kan lal leh chhandamtu Isua hi a au vang a, tichuan lei ram hi kan pel mai dawn a ni. Chu hunah chuan Krista hmangaihtute chuan chanvo an chang ve tawh dawn a ni.

Unau duh tak, thu dang ka ziak thei lo a ni. Khawvel hi thenkhat chuan nuamin hre mah se an duh zawng engkim hi nei mah se, hlimna a kumhlun lohna ram a ni tih a hre thuai ang. Kan hlimnate an ral zelna ram hi thlakhlelh tlak a awm lo. Kan Lalpa hi a lo kal ngei dawn avangin sual tlenfaina hmangaih tuiah i intlengfai ang u. Tu pawh chu thisen lui a inbual chu an sual vur angin a var ang. Kan sual nei reng chung hi chuan kan ralmuang thei lo va, kan nun a zalen thei lo. Kan sual hian min ti ngui a, Lalpa lakah min ti i tlat si a, kan harh thei lo a ni. Lawmna thar kan neih theih nan, sual tlenfaina tui, hmangaihna luiah i kal ang u. Kan sualte thupha kan chawi chuan min lo ngaidam ang a, zion tlang ralmuanna ber hmangaihna chu kan hre chiang zel ang.

Read More Article/Sermon : Click on this link : Articles/Sermon

Leave a Reply