Mission Sunday

Tunkar Pathianni, July 2, 2017 hi Mizoram Baptist Kohhran ni pawimawh, “Mission Sunday” a ni a. He ni hi kum tin, July Pathianni hmasa berah hman thin a ni. Kuminah pawh he ni pual hian Mizoram Baptist Kohhran chuan Biak In tinah Programme kan hmang leh dawn a ni. Kumin Mission Sunday thupui atan   “In êng chu Mi mithmuhin êng rawh se” Mathaia 5:16″ tih ni ang.Sunday School lamah pawh Mission Sunday Pualin thuzir inang tlâng zir a ni ang. Tin, Pathianni chawhnu-ah Tualchhung Kohhran a thei apiangin Mission lam pualin Inpawlhona hun buatsaih tura beisei an ni bawk. Pathianni zîng leh  Pathianni zân  inkhâwmah a hnuaia thupui thlan sa hmang hian tawngtairual tur a ni ang:-

Tawngtairual Thupui:

  1. Pathianin Missionary ropui takte min pêk avângin lâwm thu sawi ila, An hnathawh ropui tak leh kan tâna an thiltih zawng zawngah lâwm thu sawi ila.
  2. Vawiin thlenga Chanchin Tha pe chhuak ve thei dinhmuna Lalpan min la dintîr ve avâng pawhin lâwm thu sawi bawk ila.
  3. BCM Member zawng zawngte Thlaraubo chhandam nâna thawk zêl thei tûrin Pathian hnênah chakna dîl ila.
  4. Kan Motto Chanchin Tha Mi tin tân tih hi a taka nunpui zêl thei tûrin thawhhona tha dîl bawk ila
  5. Mahni inhlantharna nei theuh bawk ila.

 

MISSION FIELD REPORT JANUARY – JUNE 2017
Sl/No  Mission Field/Station Ringthar zat Kohhran / Fellowship thar
1 Bru Mission  –
2 Chakma Mission 62 2
3 Non Mizo Mission 86  –
4 Tripura Field 769 8
5 MP & MS Field 47
6 Bengal Field 42 1
7 Assam Field 106 1
8 Arunachal East Field 195 1
9 Arunachal West Field 57
10 Arunachal Far East Field 50 2
11 Jharkhand Field 77 3
12 North India Field 162 1
13 Bhutan Field 5 1
14 Nepal Field  –  –
15 Kolkata Field  –  –
16 Miria Field 4 1
17 Arakan Field  –
18 Cambodia Field 7
19 Go0d News Mission 24
20 Andaman & Nicobar 11
Total 1704 21

Mission Sunday hman a lo nih dan:

Kum 1939 atangin Mizoram Baptist Kohhran chuan Mission rawngbâwlna hi Tuikuk Takam zîngah a tan a. He rawngbâwlna hi a lo chak zâwk zêl theih nân kum 1944 atang khân Kohhran rorêlna chuan July Pathian ni hmasa ber inkhâwm thawhlâwm chu Tuikuk Takam puala Mission rawngbâwl nân dah a rêl ta a ni. He mi hnu hian Tuikuk Takam Pathian ni ti lovin Ramthim Pathian ni tia dah a ni leh ta a. Kum 1970 Assembly chuan Missionary Sunday tiin a lo thlâk leh ta a ni.  Kumin atangin Mission Sunday tiin dah a lo ni leh ta a ni. Mission Sunday-in a tum ber chu Mission rawngbâwlnaa infuih thar lehna hun atâna hman hi a ni.

BCM Mission tobul:

Mizoram Baptist kohhran hi a dintirh atangin Chanchin Tha hrilh hi a pianpui ani kan ti thei awm e. Ringthar hmasate pawhin a tirte atangin ringlote Krista hnêna hruai hi thupui berah an nei tlat a. Thlarau Thianghlimin a thuam a, Mizoram chhung chang ni lo, an chhehvêl-a mizo hnahthlak awm Bangladesh leh Tripura a awmte an vei êm êm a ni. Ringtu hmasate zinga ami,  Rev. Zathanga pawhin  Miria, Bâwm, Pâng leh Lau awmna ram a fan thu a thih hma khan a sawi thin. Kum 1918 khan Chanchin Tha hril tura inpete chuan Tripura-ah lutin kohhran nghet tak an phun a, tun thlengin Tripura hnam hrang hrang tiêng turin an pawimawh hle a ni.

Tichuan hnam dangte veina a lo lian zêl a, Mizoram chhûnga Tuikuk –Takam-te veina pawh a lo lian zêl a, kum 1939 Chapchâr Assembly, Thiltlanga neih chuan a ngaituah ta a, chutah chuan tirhkoh pahnih rawih rêlthluin  Easter Sunday zing thawhlawm hi mission bik atan dah a rêl nghal a. Tuikuk – Takam puala thawhlawm hmasa ber tlingkhawm hi Rs.244/- chiah a ni. Tirhkohte hlawh atan Rs.11Pm an fixed nghâl bawk.

Ramthim veina a lo len zêl tak avangin 11-12 July 1962-a Assembly Executive Committee chuan Ramthim Sub-Committee a din ta a. Kum 1963 June Executive Committee chuan Sub-Committee chu ding chhunzawm zêl tura rêlin 1966 thleng a ding chho nghe nghe. Kum 1966 chuan Account pawh a hrana vawng turin a rêl zui a.

Damdawi lama rawngbawlna pawh tula hriat a nih avangin June 1963 khan Rotlang (W) Tuikuk zinga thawk turin Nurse Lianzami chu tirh a ni a, 1964 khan amah thlak turin Nurse Vanlalnghaki tirh thlak leh a ni.  Ramthim rawngbawlnaah hian Education, Direct Evangelism leh Medical lam hmangin thuang thuma rawngbawl a ni.

Pastor bial hrang hrang atangin Ramthim lam ngaihtuahtu bik Committee din tulzia sawi a nih avangin 17 -18 June 1966 Executive Committee chuan “Zoram Baptist Mission” (ZBM)  chu a din ta a ni.

 

Posted in BCM News.

admin