Missionary Day/Gospel Quasquicentennial lawm dawn

Naktuk, January 11, 2019 (Zirtawpni) hi Mizoram-a Missionary hmasa ber lo thlen champha phak,  vawi 125-na “Missionary Day (Mizoram Gospel Quasquicentennial)” a ni a.  He Ni hi Mizoram Baptist Kohhran chuan awmni khamin Tualchhung Kohhran tinah Programme siamin an hmang dawn a, Kohhran tam zawk chuan he Ni-ah hian Pathian hnena lawmthusawina leh Missionary Day lawmna ruai  an buatsaih dawn a ni. Kumin Missionary Day thupui chu “Isua Krista Khawvel Chhandamtu   tih a ni ang. 

Zanin, January 10, 2019 atangin Mizoram Gospel Quaquicentennial lawmna hi hman tan a ni dawn a. Tualchhung Kohhran tinin zanin hian Mizorama Chanchintha lo mthlen champha phak vawi 125-na lawm nan Jubilee mei det a ni ang a, chumi zawhah Tualchhung Kohhran ruahman angin Inkhawm emaw, Zaikhawm Programme  neih a ni ang.

January 11, 2019 (Zirtawp) zing dar 7:00 ah Headquarters ruahman angin Tualchhung Kohhran tinah Jubilee lungphun hawn leh Jubilee dar vawi 125 vuak a ni ang a. Heng bakah hian Distrct Heeadquarters tin-ah Mizoram Gospel Quasquicentennial hriatrengna (Monument) BCM Assembly-in a buatsaih chu hawn a ni ang. Heng monument hawng tur hian Headquarters hotute hetiang hian ruat an ni:-

1. Rev. Lalbiaksanga Chinzah, President: Lunglei Dist (Lunglei, Serkawn-ah)
2. Rev. Pc. Liandula President Elect, Aizawl Dist.(Aizawl-ah)
3. Rev. F. Ramdinmawia, Gen. Secretary: Kolasib Dist (Kolasib-ah)
4. Rev. Dr. C. Vanlaldika AGS, Mission Mamit Dist. (Mamit-ah )
5. Rev. R. Zohmingliana, AGS Service: Champhai Dist. (Champhaiah)
6. Rev. Dr. K. Lalrinthanga, ES Aizawl: Lawngtlai Dist. (Lawngtlaiah)
7. Rev. R. Lalbiakliana ES Lawngtlai: Serchhip Dist.(Serchhip-ah)
8. Rev. V. Vanlalchhunga, Padtoral Coordinator: Siaha Dist.(Siahaah)

Chawhma dar 10:30-ah Inkhawm awmin, chawhnu lamah Inpawlhona/Zaikhawm leh Tlai lamah Missionary Day ruai kilho a ni ang a, zan lam Inkhawma awm leh ang.

Tawngtai rualna atana Thupui: Missionary day inkhawm-aha hnuaia tarlan thupui hmang hian Tawngtairualna neih a ni ang.

  1. Pathianin Chanchin Tha min pek avang leh Chanchin Tha rawn thlentu Missionary-te avanga lawmthu sawina
  2. Mizoram atanga Missionary kal chhuak zawng zawngte tan.
  3.  Mizoram hi Lal Isua Krista lalna ram a lo nih zel theih nan.

…………..

Rev. FW Savidge (Sap Upa) leh Rev. JH Lorrain (Pu Buanga)te chuan January 11, 1894 khan Sairang lo thlengin “Missionary Day” tiin Mizo Kristian zawng zawngin pawmin January 11, 1994 khan Chanchin Tha thlen champhaphak vawi 100-na (Gospel Centenery) chu kohhran pawl hrang hrangin hlim leh lawm taka lawm ho a ni. Mizoram sawrkar pawhin sawrkar chawlh (Government Holy Day)-ah a puang ta nghe nghe a ni.

 ………….

MISSIONARY DAY THUCHAH

Sap Sipai Officer, Thomas Herbert Lewin (Thangliana) chuan 25th. December 1871 khan a nupui Dari leh a hote nen Belkhai atanga mel 6 Tuikawi khuaah Krismas hman puiin ngaihnawm takin Lal Isua pian thu hi a lo sawi tawh a. Kum sawmhnih a vei hnu 1891 khan, The Welsh Calvinistic Methodist Foreign Mission hnuaia Khasi Hills Missionary  thawk lai Rev. William Williams pawh a thawhna hmun atangin Mizoramah rawn zinin Bible milemte pawh a sem ni awm a sawi a ni. Mizote chanchin a lo hriat thawi tawh avangin missionary intirh nan a tha dawn awm em? tih enthlithlai tura lo kal a ni. Thla khat chauh Mizorama awm phalna pek a ni a, a thawhna hmun panin a haw leh ta a ni.

January 11, 1894 khan kan rama Missionary hmasa ber Sap Upa leh Pu Buanga-te chuan Sairang an lo thleng a. Heta tanga chhiar tana a kum za-na, Mizoram Gospel Centenery chu Mizoram kohhran lian pahnih Baptist Kohhran, Presbyterian Church of India, Mizoram Synod leh kohhran dangte chuan lungrual takin Mizoram pum pui huapin 1994 khan an lawm a ni. Kan pioneer missionary-te lo thlen champha vawi 122-na January 11, 2016  Pathianin min lo hruai thleng leh ta a ni. He hun pawimawh takah hian Sap Upa leh Pu Buanga ten Mizo hnam tana an thawh nasat zia leh Mizo hnam tana an hnathawh hlut zia hi hun reilo te chhunga sawi sen pawh a ni lovang.

Isua Krista Chanchin Tha min hrilh a, Chhandamna kawng min kawhhmuh a, Kohhran min dinsak a. A AW B leh lehkha chhiar tur min siamsak bakah  zirna sikul min dinsakin, lehkha min zirtir bawk a. Kan taksa, rilru leh thlarau tihdamna rawngbawl hna thawkin nun dan mawi leh tha min zirtir a. Kan hnam hmasawnna lungphum phumtute an ni. Ramhuai biakna leh hlauhna lak ata Lal Isua Krista Chanchin Tha-in min chhan chhuak a, chatuana nunna min pe a. Silh leh fen mumal tak pawh la inbel nachang hre lo, saruak deuh thaw a awm thin kha an rawngbawlna avangin khawvel pum pui huapa inchei dan pangngaiin kan lo inchei ve ta a.

A, AW, B  nei lo kha India ram hmar chhak state pariat zingah ziak leh chhiar thiam tamna ber kan lo ni ta reng mai. India ram zau takah pawh a berte zinga mi kan ni ta.  Maurap in chhe te te-a khawsa thin zofate kha tunah chuan in tha tak tak mawi leh nuam tak takah kan lo khawsa  ve ta. Ei leh in tur tuihnai engmah nei ngai lo khan Sap Upa leh Pu Buangate rawngbawlna avangin ei tur tuihnai leh tha tak tak kan lo eiin kan lo in phak ve ta. Mizo mipuite chhim leh hmar, chhak leh thlanga miten tun dinhmun kan lo thleng ta hi kan zosapte vang liau liau a ni. Lalpan kan pioneer missionary Sap Upa leh Pu Buanga-te hmangin thil ropui tak min tihsak avangin Pathian hnenah  lawm thu i sawi ang u.

Kan ram sorkar, kohhran leh mipui zawng zawngte hian January 11, Missionary Day hi hlut nachang hria ila, kohhran tin ten Pathian hnena lawmthu sawia inkhawmna hun atan i hmang theuh ang u. He hun ropui leh awmze nei takah hian lam thei lam ila, a lawm nan ruai hial pawh theh thei chuan theh ila, kan missionary-te rawngbawlna avanga Lalpa fak leh chawimawi nan i hmang theuh ang u. Kan ram sorkar-in chhuti ni atan a lo puang hi a lawmawm hle a, zofate khawvela kan awm ve chhung chu tidanglam lovin hmang chhunzawm zel thei ila a va lawmawm dawn em

Posted in BCM News.

admin