2021 MBKHP Rorel hun leh hmun sawn a ni.

Mizoram Baptist Kohhran Hmeichhe Pawl (MBKHP) Executive Committee Meeting, January 14, 2021 –a BCM Chanmari(Lunglei), Committee Room-a neih chuan Feburary 20, 2021, MBKHP Rorel, S. Vanlaiphaia neih tura ruahman tawh chu, Hrileng avangin February 25-ah BCM Biak In,  Zotlang North a neih turin a rel fel.

Hun pangngai-ah chuan kumin, 2021 hi BKHP Inkhawmpui neih kum a ni a. A hmun atan South Vanlaiphai Pastor Bial pawh ruat fel tawh a ni a. Covid-19 hri leng avangin BCM Administrative Committee chuan kumin-ah chuan BKHP Inkhawmpui hi nei lova, Rorelna kalpui mai tura thurawn a pek angin, MBKHP Inkhawmpui hi nei lo a, Rorelna erawh chu South Vanlaiphai ah hian neih tho ni se, tiin ruahman a lo ni tawh a.

Chutih laiin kan boruak tawn chhoh mek-ah hian khawtlang tan harsatna awm palh thei a nih dan leh palai kal khawm turte dinhmun te thlir nawn lehin, MBKHP Executive Committee meeting chuan Rorel hi Lunglei-ah neih ni mai se tiin a rel leh ta a, a hmun atan BCM Biak In, Zotlang North pawh be nghalin ruat fel nghal a ni a, Rorel hun atana February ni 20 lo ruat sa pawh February 25, 2021-ah sawn ni se an ti a. Sorkarin Covid – 19 hrileng avanga punkhawm phal chin a bithliah angin Rorel palai tur pawh tih tlem ni bawk.

FOD Inkaihhruaina-in MBKHP Rorel palai tur chian a sawi – Bial aiawh pahnih theuh bakah Unit tin aiawh pakhat  a nih lain, kumin bik atan Bial tin atangin aiawh pakhat chauh kal ni se, Unit aiawh chu in tirh loh mai ni se tiin an rel bawk.

BKHP Organiser, Lalhmingmawii Chongthu-in report-a a tarlan danin –  December 19-20, 2020 khan  Missionary pual, ram tan, ruihhlo ngaite leh zuartute tana tawngtai rampum huapin Tawngtai khaidiat neih a nih thu Unit engemawzat a huhoa hmang thei an awm laiin, Unit tam zawk ten mahniin  he hun hi an hman thu a tarlang a, kum 2020 MBKHP rorelna-in  Mirethei kuttualleichham te tanpui leh ni se ti a thu a dah angin hemi puala tanpuina chu Bial 62 atangin mi 101 hnenah Rs.3200/- theuh pek an nih thu leh hemi atana sum hman hi a vaiin cheng Nuaithum, singhnih, sangthum, zahnih (Rs.3,23,200) a nih thu a tarlang bawk.