Administrative & Admn. Working Committee Meeting

Tunkar Thawhlehni, April 27, 2020 khan Mizoram Baptist kohhran, Administrative Committee leh Administrative Working Committee chu Sap Upa leh Pu Buanga Hall, Serkawn-ah an thukhawm. Meeting hi Chairman Rev. Dr. K. Lalrinthanga, BCM President-in a kaihruai a. Rev. F. Ramdinmawia, General Secretary-in report tlangpui pe-in, Covid-19 hrileng avanga National Lockdown chhunga ruahmanna hrang hrang leh hmalak dan te a sawi.

Meeting chuan hrileng avanga Inkharkhipna kal meka hmalak dan te ennawnin, Kohhran Inkhawm leh programme hrang hrang te kalpui zel dan tur chu Sorkar hmalak dan ngaichang chungin Puipate’n lo ruahman se an ti a.

Tin, tunlaiin Social media (Facebook, Whatsapp leh Telegram) kaltlang a BCM hminga Group siam thin te chu BCM thuchhuak a nih leh nih loh hriat hran theih loh khawpin a lo tam ta a, thu dik tawk lo te pawh awm thei a nih avangin BCM hminga Group siam hi tih tawh loh ni se, a lo siam tawhte pawhin a hming thlak turin Administrators te ngen leh hriattir ni se tiin a rel a. Amaherawhchu ABC, Bial leh Tualchhung Kohhran huam chhunga anmahni Committee remtihnaa group siam te chu a huam lovang tiin an rel bawk.