Administrative Committee-in Covid Hospital  din tura a rel bawhzuina leh  ruahmanna:

BCM Administrative Committee-in Covid Hospital din tura a rel chu engemawchen bawhzuiin, ruahmanna te pawh siam a ni tawh a. Chung bawhzuina leh ruahmannate chu Rev. F. Ramdinmawia, General Secretary hnen atanga kan dawn angin  kan han tarlang a ni e.

“Kan hriat theuh angin Covid-19 hripui leng hi India ram state dang tam berah chuan Sorkar chauhvin a enkawl seng lo va, Private leh NGO, Corporate Hospital te pawhin an buaipui vek a, Mizoramah chuan tun thlengin Sorkar chauhvin a la enkawl a ni.

Hrileng thawh hnihna, 2nd wave in min han nuai takah hian Mizoramah hri kai kan lo tam ve ta hle a, Covid hri kai, nunna chan ta pawh kan pung chho hle mai, Sorkar Medical & Health Department an hah hle a, an centre neih te pawhin min zo lo tan hle tih kan hre theuh va, a bik takin Mizoram chhim lam tan phei chuan inenkawlna a buaithlak leh zual a, Sorkar Medical lama thawktute an lu a hai tak zet a ni.

Hetiang a nih avang hian BCM Administrative committee meeting Dt 1.7.21 a neih chuan Kohhran hian Covid vei te enkawlna kawngah hma lo lak ve theih dan a awm em, tih ngaihtuahin kawng dap ni se, tiin a hmalatu tur Sub-Committee din a ni a, ‘Covid veite enkawlna kawnga lo chet chhuah ve hi thil tul tak ni mahse a theih em, tih lai hi thil awlsam lo tak a ni’, tih Committee pawhin a hria a, kawng zawn tur chauh a ni.

Tunah hian Covid hri kai vang hrim hrim pawh ni lova natna chi hrang hrang vanga inentir tur leh Hospital a inenkawl (Admit) tur, mahse test a lo posivtive reng si kan ngah chho zel a, Sorkar hmalakna ruangam (Framework)ah chuan Covid hri kaite dahna hi kan hriat theuh angin CCC , 4C leh DCHC te an ni a, mi tu pawh hri kai an nih tawh chuan CCC emaw, 4C emaw DCHC emaw te pan tur a lo ni ta, heng centre te hi an full thuai thuai avang leh Medical Facility a that tawk loh avangin chung mite lo enkawl ve a, Sorkar phur rit lutuk tur lo chhawk then ve hi rilruk ber chu a ni.

Sorkar hmalak mekna line pangngai a tel ve a nih loh avangin a hming tur a buai deuhva, Official a vuah chian a la ni lo va, CCC lo tih ve ngawt a dik si lo va, a project hmingah hian committee level a hman atan Covid Hospital, kan ti rih phawt a, Sorkar hian hetia hma lo lak ve hi min phalsak em, tih hi zawhna pawimawh a ni a, min phalsak a, hma kan la dawn a nih chuan a Official hming pawh la phuah a ni ang.

Sorkar CCC nen a danglamna chu man chawi a awmna tur a ni, tih  te medical lam ah tuna kan CCC neih laite aia ngawrh zawk deuhva vil tur a ni, tih te hi a ni.

Covid natna serious chin (Complicated Covid Pneumonia) ang chin chu hetiang centre a enkawl theih chi a ni lo tih kan hria a, kan hma lak tumna hi chu inenkawlna  tha ber  leh sang ber han tling lo mahse  tangkaina thui tak nei tur a ni.

Emergency lian thamah, reilote atan hma lakna a ni a. Hospital thar din tur anga ngaihtuah a ni lo va, Emergency relief tih ang chauh a ni, building thar sak tur a ni lo va, R & D hmunhma, Ramzotlang a awm te tih fai a hman mai tura beisei a ni, thawktu pawh BCM worker awm sa, Medical leh department dangte pawt khawm a kalpui tum a ni a, Budget lian a ni lo va, a kal chhoh zelna ah pawh amah leh amah intum thei vel tura ngaih a ni.

Tun dinhmunah chuan Sorkarin min phalsak em, tih ngaihchan a ni a, min phalsak a nih chuan a kaldan tur chipchiar kan tarlang thei chauh dawn a ni.”

Rev. F. Ramdinmawia
General Secretary,
Baptist Church of Mizoram

………………

Video  hi Rev. R. Lalbiakliana, AGS (Service), Chairman, Covid Hospital Sub-Committee-in BCM Covid Hospital chungchang hriattur pawimawh a sawina a ni e.