Administrative Comtt. Meeting neih a ni:

May 27, 2021 khan Mizoram Baptist Kohhran, Administrative Committee Meeting chu Sap Upa leh Pu Buanga Hall, Serkawn-ah an thukhawm a. Meeting hi Rev. V. Laldingliana, BCM President-in a kaihruaia, thurel langsar zual te kan han tarlang ang e.

Tawngtai Beihpui. Kan ramah Covid-19 hripui leng a lo ziaawm a, a lo reh thuai theih nan June thla chhung hian Tawngtai beihpui neih ni se an ti a.  Tawngtai neih dan tur chu – Inrinni apiangin zan dar 8:00 ah BCM chhung tin leh mimal ten he tawngtai beihpui neih thin ni se la, Tawngtai Thupui leh tul dang chu a rang lamin Kohhran Chhungtinte hman theih tura hriattirna pek chhuah a ni ang.

Covid-19 Relief Fund. Covid-19 2nd Wave avanga Kohhrana thawktute pawh damdawiin hautak tak takah te an awm lo thei lo va. Hetih rual hian Lockdown avanga chhungkaw hrang hrangin harsatna kan hmachhawn chin tur pawh hriat lawkhleih theih a ni lo va. Hengte avang hian Administrative Committee chuan Covid-19 Relief Fund  siam ni se tiin a rel a. Hemi atan hian BCM hnuaia thawktu leh Pensioner zawng zawngte, a thei apiang nikhat hlawh thawh tura ngen ni se tiin a rel a ni.

Cheng Nuai 2-a UTC Relief. United Theological College (UTC) chuan Covid -19 hrileng avanga Lockdown kalpui a nih avangin sum leh paiah harsatna nasa tak an tawh thu leh BCM chu Board member pakhat kan nih ve avanga tanpuina an rawn dilna chu ngaihtuahin  cheng nuai 2-a tanpui ve ni se tiin a rel a. Sum pek dan tur hi Finance Department-in a bawhzui tura ruahman a ni.