Area Baptist Council (ABC) Rorelna neih tan a ni ta.

Mizoram Baptist Kohhran Area Baptist Council (Rorel) chu, October ni 24, 2020  chawhma dar 10:00 hian ABC hrang hrang-ah neih a ni dawn ta.

Kuminah hian Hrileng avanga Inkhawmpui pangngai ang a kalpui theih a nih tak loh avangin October 24-ah ABC rorel hi neih a ni ang a, Pathianni (October 25) zing Inkhawm hun pangngaiah Kohhran upa nemnghehna Inkhawm (Ordination Service) hi buatsaih a ni ang.

ABC thenkhat ah chuan Rorel hi vawiin, October 23 (Zirtawpni) hian neih mek a ni a, Tutthlang, Buarpui leh Phawngpui ABC te chuan Upa nemnghehna chu  Pastor Bial-ah an buatsaih thung dawn a ni.  Kumin ah hian kohhran upa ordain tur hi an vaiin mi 140 an ni. Hetiang hi ABC hrang hrang rorelna hmun leh Ordination neihna tur a ni.


Kohhran hruaitu ten Mizoram sawrkarah ngenna an siam ang in ABC Rorel leh Nemnghehna inkhawm hi mi 120 chin kalkhawm phalsak niin, hemi zulzui hian rorel leh nemnghehna inkhawm te buatsaih a ni ang.

Area Baptist Council pakhat zel ah hian Pastor Bial 4-7 an awm tlangpui a, ABC lian ber Aizawl West ABC-ah Pastor Bial 7 awm in, Tualchhung Kohhran 52 a awm a, ABC te ber Lunglei West leh Lunglei S ABC-ah Pastor bial 4 awm in, Tualchhung Kohhran 17 an awm a ni. Tichuan a pum pui ah ABC 15-awm in Pastor Bial 88 an awm a, Tualchhung Kohhran 470 an awm mek a ni.

ABC Rorelna-ah hian Mizoram Baptist Kohhran inenkawlna hrang hrang atana rawtna Assembly Executive Committee (AEC)-a thlen tur leh Assembly-a thlen tur agenda te ngaihtuah thin a ni.