Assembly Committee lian pathum zawh fel a ni ta:

Kar hmasa lama kan tarlan tawh ang khan tunlai hian kumin chhunga Assembly Committee lian pathum Mission Committee, Service Committee leh Central Committee thutkhawm hnuhnung neih a ni a, Committee leh Service Committee hi kar hmasa lamah khan an lo zo tawh a. Central Committee pawh tunkar thawhleh ni November ni 26 khan thukhawmin tluang takin an zo ve leh ta bawk.

Mission Committee thurel leh report te kar hmasa lamah kan tarlang tawh a tun tumah hian Service leh Central Committee thu te kan lo tarlang ve dawn a ni. 

November 21 leh 22 chhung khan, Service  Committee hi Sap Upa leh Pu Buanga Hall, Serkawn-ah neih a ni a, Committee chuan Mizoram Baptist Kohhran-in Nau Hnuchham a enkawlna, Baptist Church Orphanage(BCO) kal zel dan tur chungchang ngaihtuahin Sorkara innghat lova, BCM-in a puma enkawl mai ni se tih thu chu Executive Committee-ah thlen chhoh ni se tih a ni a, BCO tana Firm & Register hran neih chungchang thu pawh zir chian phawt ni se, chumi hnu-ah la ngaihtuah that leh ni se tih a ni bawk.  Committee chuan Lunglei South lamah BHSS Junior Section Extension siamchungchang a ngaihtuah a, Planning Commission kutah dah ni se tiin a rel bawk.

Central Committee Meeting hi President, Rev. PC Liandula’n a kaihruai a, General Secretary Rev. F. Ramdinmawia’n report tlangpui khaikhawmin a pe a, Department hrang hrang Director ten ziakin report an tarlang bawk.

He Meeting a an thurel langsar zingah Pastor Bial thar siam tura rawtna– Thorang Pastor Bial ni thin chu Thenhlum Pastor Bial ti-a thlak leh Republic Pastor Bial chu Central Pastor Bial tia thlak rawtna te chu pawm a ni a.Motor hlui tih ral leh a thar lei dilna te, Hospital Centenary Project atan Building thar leh Room leh Furniture siam chu remtih a ni a, Mizoram BMP thuvawn siam that rawtna pawh pawm a ni bawk. Heng bakah hian hian Central Committee hnuaia Department hrang hrangte plan leh Budget 2020-2021 pharhin an thlirho bawk.

General Secretary report-in a tarlan danin Kolkatta Baptist House atana Building lei thar chu October 25 atang khan luah a ni a, tunah hian thuam that mek a nih thu leh December thlaah zawh hman tum a nih thu tarlan a ni.

Assembly-in a lo passed tawh Pathianni zing leh pathianni zan-a ‘Kohhran Inkhawmah Inkhawm hruaitu thutna inang tlangin Tualchhung Kohhran tinah kalpui ni se’ tih thu bawhzuiin BCM Worship & Music Department-in Tualchhung Kohhran tin-ah Pathianni zing leh Pathianni zan Inkhawm hruaitu te chu Pulpit-ah Thuhriltu dinglamah thut ni se tiin a a rel chu Kohhrante hnenah ziaka hriattirna pek a nih tawh thu a tarlang bawk.

Kum 2019-2020 BCM Target April-October chhungin cheng Nuai 308, Sing 5 leh Sang 4 hmuh a nih tawh thu tarlangin BCM Health care-ah Workers Contribution leh Budget atangin cheng nuai 43, sing 3 leh sang thum, 215 (4,333,215/-) hmuh a ni a, heta tang hian RS. Nuai 40, sing 9 leh 290 hman ral a nih thu a tarlang bawk.

July-November 2019 chhungin Aizawl Area-ah Kohhran thar 5 din belh a ni a, chungte chu – meidum (Kolasib Bial), Thuampui Vengthar(Zemabawk Bial), Bethel Zualngtui (Zemabawk Bial), Kawrtethawveng (Kawrthah Bial) leh BCM venghlun (Thenzawl Bial) te an ni.

Pastoral Department atangin kumin chhungin Pastor tur mi 5 lak fel an ni a, Pro.Pastor I Year leh II Year exam buatsaih niin tha takin an passed vek bawk. Probationary Pastor 6 Minister atan Ordain turin Assembly Executive-ah thlan fel an nih tawh thu a tarlang bawk. Kuminah ABC hrang hrangah Kohhran Upa 143 ordination pek a nih thu te, tun dinhmunah BCM Recognised Evangelistic Team 57 an awm mekthu a tarlang bawk.

Central Committee-hian Department lian tak tak – Finance Department, Pastoral Department, Property Department, Worship & Music Department, Fellowship Organisations Department te bakah Pension Board te, Kohhran Upa Exam Board te, Health Care Scheme te a enkawl a ni.

BCM Assembly Committee lian pathum bak ah hian November ni 27 & 28 chhung khan Administartive Committee leh Nomination Committee te pawhin Meeting an nei a, chanchin kan buatsaih lai hian committee meeting reports leh thurel te kan hre hman rih lo a ni.

Posted in BCM News.

admin

Leave a Reply