Assembly Committee ten Meeting nei chho mek mek

Mizoram Baptist Kohhran hnuaia Department Committee hrang hrang ten October thla atang khan Committee meeting an nei chho a. Department te an in zial fel hnu-ah Assembly Committee lian pathum – Mission, Service  leh Central Committee te chuan tunlai hian Sap Upa leh Pu Buanga Hall, Serkawn-ah Meeting an nei veleh mek bawk. November 21, 2017 khan Mission Committee meeting neiin nikhatah an zo fel thei a, vawiin, November 23 hian Service Committee thukhawm lehin karlehah November 28-30 hian Central Committee leh Nomination Committee te an thukhawm leh ang.

Nimin-a Mission Committee Meeting hi Rev. H. Lianngaia, President, BCM-in a kaihruaia, Rev. Dr. C. Vanlaldika, AGS i/c Mission-in April November 2017 chhunga Mission report tlangpui a pe a. AGS Report-a tarlan danin Mission Field leh Station hrang hrang 19 atangin January – November 2017 chhungin ringthar 2,583 neiin Kohhran thar 37 an din bawk. Kum 207 April- November chhungin Missionary 12 lak thar a ni. Mission Committee thurel tlangpui hengte hi an ni.

  1. Post chhuahsan pahnih (Substantive Post 1 leh Temporary Post 1) hum dilna, Mission Board Committee atanga lut chu Assembly-a thlen chhoh remtih a ni.
  2. Mission to Muslim hnuaia Field Director dah chungchang ruahmanna kal mek chu la enzui leh ni se, a tul angin hotuten hma lo la rawh se tiin dah a ni.
  3. Mission Promoter ni lai mek Upa HL Liantluanga chu 2018-2021 term thar atan Mission Promoter ah ruat zui leh a ni.
  4. Recognise Missionary te leh Local Workers rawihte thawh hun chhung bithliah ni se tih rawtna chu ngaihtuah a ni a. Local Workers (native) te hi BCM thawktu dangte ang bawkin kum 62 an nih thleng rawih ve ni se. Recognise Missionary te recognition term chu kum 5 ni se la, chumi hnu-ah chuan kum thum atan zel recognition hi pek zawm theih a ni ang.
  5. Missionary zingah an rawngbawlna avanga Serh leh sang khawih theihna pek dilna chu ngaihtuah a ni a. Pu C. Lalfakzuala(Arunachal West) leh Pu Pc.Lalbiakzara (Arunachal far-East) te chu Serh leh sang khawih theihna pek turin Assembly Executive-ah thlen ni rawh se tih a ni.
  6. Kum 2018-2019 Mission budget leh Planning ruahmanna chu a tlangpuiin pawm a ni a, Finance lamin en fel ngai leh siam that ngai te lo umzui se la, Executive Committee-ah thlen chhoh ni rawh se tih a ni.

Mission Committee-ah hian Pastor Bial aiawh leh Assembly aiawh member 110 an awm a, tun tumah hian member 80 an tel thei a ni.

Posted in BCM News.

Leave a Reply

Your email address will not be published. Required fields are marked *