Assembly Executive Committee Meeting zo ta

Assembly Executive Committee August, 2019

28th August, Serkawn:

Mizoram Baptist Kohhran Assembly hnuaia Rorelna sang ber, BCM Assembly Executive Committee Meeting chu vawiin, August 28, 2019 (Nilaini) zing dar 10:30 khan  BCM Conference Hall thar, BCM Office, Serkawn-ah neih a ni. Meeting hi BCM President, Rev. PC Liandula’n a kaihruai a, General Secretary Rev. F. Ramdinmawia’n Department hrang hrang report tlangpui a pe.

General Secretary report-in a tarlan danin – Assembly 2019-in a rel Pay Commission ruahmanna anga BCM thawktu te pay thar siam a nih tawh thu te, Planning Commission 2020-in hma a lak mek thu leh Assembly 2020-ah rawtna thehluh hman tum a nih thu te ngaihthlak a ni a,  Baptist House Upper Khatla, leimin avanga building thenkhat thiah a, rauhsan tawh chu Mizoram sawrkar atanga cheng nuai 183 min pek hmanga siam that mek a nih thu te, Kristian te ni pawimawh Good Friday leh Christmas bawhbuai zawnga Sorkar hmalakna awm thin te ti tawp tura State sorkar kaltlanga Central Ministry-a thu an thlen tawh thu te, Kolkata-a BCM building lei tum mek thu leh September thla ral hmaa lei fel theih a beisei thu te a tarlang bawk.

Report ah hian Kumin August 2 khan Kohhran Upa Exam Board chuan Kohhran Upa thlan tlin te Exam a buatsaih thu leh Mi 149-in Kohhran Upa exam hi an neih thu te, BCM recognised Evangelistic Team 57 an awm mek thu leh kuminah Evangelistic Team 6 recognised thar an nih thu tarlan a ni bawk.

Financial year hman mek (April 2019-March 2020) chhungin Missionary 6 tirhchhuah an ni tawh a, Women Worker (Theologian) 2 leh LDC 2 lak thar niin, Pastor 5 lak thar tur atan advertisement chhuah mek a ni a,   Mizoram hmun hrang hrangah BCM ram (Biak In hmun) 10 leina atan Rs. nuai 158 hman phalsak niin, Kohhran harsa zualte  tanpuina (Relief to Churches) Budget atangin cheng nuai 41 sem fel a ni tawh bawk.

Kum in January-July chhung in Mission Field hrang hrangah ringthar 1863 neiin, Kohhran thar 13 phun a ni tawh a, Missionary Training tura lak thar mi 10  ten AICS-ah Training an nei mek bawk.

Vawiin-a an thu rel lanngsar zingah – DR LH Lallawmsanga MS (General Surgery) deputation a zir phalna pek thu te, BCM-in Prescribed Holy Bible neih chungchang te, Missionary Lalthlanawma Serh leh sang khawih theihna pek dilna Assembly-a thlen thu te, BMS Missionary Mizorama lo thawk tawh te thlân zawn chhuah chungchang te ngaihtuah a ni.

Assembly Executive Committee Meeting 28th August 2019

 

 

 

Posted in BCM News.

admin