Assembly vawi 121-na zanin atangin

Mizoram Baptist Kohhran Rorelna sang ber, BCM Assembly Rorel vawi 121-na March 8-12, 2017 chhunga Mizoram Baptist Kohhran Biak In, Chanmari, Lunglei-a neih tur chu zanin atangin tan  ni dawn ta. Mizoram chhung leh ram pawn atangin Rorel Palai member leh Delegates engngemawzat lo thleng tawhin vawiin hian a tam ber chu lo thleng tura beisei an ni. Sawi tawh ang khan kumin Assembly thupui tur chu “Rinawmna’  tih a ni ang.  Assembly-ah hian Rorel Palai kal thei tura beisei zat hi mi 1000-1200 vel an ni dawn a, heng bakah hian observers, Co-opted leh delegates dang engngemawzat an awm dawn a ni.

Zanin inkhawm hi Assembly hawnna inkhawm a ni ang a, Rev. Lalthangliana Hnamte, BCM President-in inkhawm kaihruaiin Assembly a hawng nghal ang. Rev. F. Ramdinmawia, General Secretary-in kum 2016 -2017 chhunga BCM Rawngbawlna report tlangpui a pein,  Rev. Dianne Tidball, President, Baptist Union of Great Britain-in chibaibukna (Greetings)a sawi ang a, Rev. Dr. C. Vanlaldika, AGS i/c Mission-in thuchah a sawi ang a, Zaipawl pali – Electric Pastor Bial Zaipawl, Lengpui Pastor Bial Zaipawl, Hauruang Pastor Bial Zaipawl leh Thorangte Pastor Bial Zaipawl te an zai dawn a ni.

Naktuk, March 9, 2017 zing dar 9:30 atangin Assembly Rorel Inkhawm neih tan a ni ang a. Kumin Assembly Rorel Agenda langsar zingah –

  • Mizoram-a Chanchin Tha thlen kum 125-na (Quasquicentenial) lawmna dan tur ruahmanna pawm tura thlen te
  • Assembly thu bawhzuina Thawktute tana Conduct Rules duan fel tawh pawm tura thlen te
  • Pathianni serh chungchang inkaihhruiana duan chhuah tawh pawmpui tura thlen te
  • Pu Buanga leh Sap Upa thlan, South Ealing Cemetery, London a mi chei that rawtna te
  • North India Mission ah chak zawka hma kan lak zel theih nan thawktu dah belh rawtna te,
  • Ram tana tawngtai rawtna ABC hrang hrang atang lo lut– (Ram pum huap chawngheia tawngtai, Awmni khama Rampum huapa tawngtai, Ram pum huap Tawngtai Inkhawmpui) te,
  • Ram pum huap awmni khama Missionary-te pual tawngtai rawtna te
  • Zu zawrh ti tawp tur te, Zu permit a pek te hnuk kir leh tura Mizoram Sorkara thlen rawtna te.
  • AICS Research Unit-in Kohhrante tibuai thei Zirtirna himlo lo awm thinte zir chiangin inkaihhruaina siam rawh se tih te
  • Political Education inzirtirna kawnga hma lak rawtna te,
  • CT Scan lei tura lo passed tawh tipuitling tura chak zawka hma lak rawtna te
  • Fa neih tam inzirtir ni se, BCM Assembly-in MTKP kutah inzirtirna hi dah se.
  • Baptist Boarding School, Kamalanagar hi Higher Secondary School-ah upgrade ni rawh se tih te a ni a.

Kumin-ah hian ABC hrang hrang atangin Agenda 39 a lut a, heng bakah hian Assembly Executive Committee, Nomination Committee, Mission, Service leh Administrative Working Committee a tang tein Report pawmpui tura thlen leh Agenda engngemawzat a awm bawk. Tin, Finance Department-in Kum 2017-2018 BCM Budget tur a pharh bawk ang.

……………………………………..

Related Links for this post:

Assembly 2017-Information:

 Assembly 2017 Programme
Asembly 2017 atan inpeih
Assembly Mikhual thlen dan tur

 Asembly Sawmna(Video Clip)

Posted in BCM News.

Leave a Reply

Your email address will not be published. Required fields are marked *