BCM hnuai a thawk lai Probationary Pastor te chuan vawiin, November 3 hian Annual Exam an nei.

Tun tumah hian Pro.Pastor 1st Year atangin  mi 5 in an Exam a, 2nd Year ah mi 8 in an Exam bawk. 3rd Year ho erawh chu Project Writing pek an ni a, mi 5 an awm. Heng 3rd Year ho te hi an Passed a nih chuan Assembly 2012 ah nemngheh an ni ang.

Rev.Samuel Lalremsanga Organiser leh Pu R.Lalrochama Assistant Secretary MTKP te chu November Ni 3 atanga ni 6 chhung a Kathmandu, Nepal-a  Asia Pacific Baptist Youth Federation Leadership Conference hmangin an kal a, karleh thawhtanni-ah an lo let leh ang.

APBYF hi Asia ram puma Baptist Thalai inzawmkhawm a ni a, ram 20 zet atangin Baptist Convention / Association engemawzat an tel a ni.  September 4th – 8th, 2012 khian Asia Pacific Baptist Congress vawi 8-na Kuala Lumpur, Malaysia-ah neih a ni dawn a. Mizoram Baptist Kohhran atang pawhin zaipawl tirh tum a ni a. Kohhran hruaitu engemawzat bakah mahni sensova kal tum engemawzat an awm a ni.

BCM Rorelna sangber dawttu Area Baptist Council a rual hmun 13-a hman  chu tunkar liam ta  Pathianni hmang khan zawh fel ani.

ABC hrang hrang te thurel langsar zingah Assembly 2012 a thlen tur engemawzat ngaihtuah zingah hente hi thu langsar zualte an ni:-

1)      Baptist Higher Secondary School tan BCM-in Bus lei rawh .

2)      BCM Assembly leh thildang a hman tur Hall lian tak Lungleiah buatsaih rawh se.

3)      BCM hian Kan ram India leh Mizoram tan tawngtai khaidiat buatsaih rawh se.

4)      Sual dona kan tih hi chhunzawm zel ni rawh se.

5)      Corruption hluar lutuk tireh turin Assembly-in hma lak ni rawh se.

6)      Mizo tawnga Bible zirna Assembly-in a siam turah hian Missionary training-na hmun siam tel ve ni rawh se.

Rev. Dr Raltawnga Chhakchhuak chuan tunkar liamta Oct. 14 khan Chawngte a BCM Building thar a hawng. BCM Property Committee in Rs nuai sawm

senga an sak BCM building thar hawnna Inkhawm hi Pu Victor Lalrinawma, BCM Property Manager-in kaihruaiin, Rev. R Lalrintluanga, Mission Co-Ordination in Technical Report a pe a. Rev. H Lianngaia General Secretary chuan thuchahtawi a sawi a, RM Chakma Ex-CEM CADC pawhin thu a sawi bawk.

He Building hi feet 84 a sei a vang lam ft.12 niin pindan 7 a then a ni a, pindan tin hi dawr a tan luah tir a ni, kaw khat hi Mission Dept in Damdawi dawr a tan an luah a, thlakhatah dawr luah man hi a vaiin Rs 24000 a ni, he building hi Kamalanagar bazar lunlai a awm a ni a, nakin zel a tan pawh BCM sum hnar thatak a la nih zel a beisei awm hle.

October 14 vek khan Chawngte Pastor Quarters thar chu Rev H Lianngaia, General Secretary chuan a hawng a. He hun hi Rev. H. Lalremtluanga Chawngte Bialtu in a kaihruai a, Upa Lalthansanga Secretary Chawngte Pastor Bial in report pein, Rev Dr Raltawnga’n thuchahtawi a sawi bawk.

Kar hmasa, October 15, 2011 (Inrinni) khan Lunglei Chanmari Biak inah Worship & Music Seminar hlawhtling taka buatsaih a ni.

He Seminar hi BCM Worship & Music Department buatsaih niin hemi ni hian Lunglei khawpui chhung Pastor bial 10 atangin Upa leh Rawngbawltu 260 vel an tel a ni. He Seminar-ah hian thupui pathum zirho a ni a. Chungte chu ‘Pathian chibai buk dan tha’, ‘Pathian chibai buknaa Music Pawimawhna’ tih leh ‘Worship-a kan tih dan tha leh tha lote’ tih a ni a. Resource person-ah Rev.R. Lalbiakliana, Pu Moses Lalrohlua Sailo leh Upa C. Hrangdula te hman an ni.

Dt 20-21 October 2011 chhung hian BCM Relief and Development buatsaihin Ranvulh lam training, R & D Hall, Ramzotlang, Serkawnah neih ani. 

He training ah hian Ar vulh, Sazupui vulh, leh Vawk vulh thatna leh a vulh dante, an tan a chaw tha leh a pek dante i zirtirna neih ani bawk. R&D chuan he training hi Simple Agro-Livestock Land Technology (SALT II) tiin a hming an vuah a. SALT II hian atum ber chu Mizorama ran vulh leh a chaw ngaihtuah kawnga mipuite zirtirna leh tanpuina pek ani.

He training hi Baptist World Aid Australia (BWAA) lamin an rawn sponsor ani a. A rawn sponsor tute pawh hi November thla chhung hian ni 12 chamin lokal a hma lak ho tawhna leh a kal lai mekte, kal zel dan turte thlir hona hun an rawn hmang dawn ani.

Ralvawng Kohhran chuan naktuk, Octoboer 21-23, 2011 hian an Kohhran Centenary lawmna leh Biak in an hawng dawn a. He hun hmanpui hian General Secretary, Rev.H.Lianngaia leh AGS i/c Service, Rev.C. Ngurhnema te an kal ang.

General Secretary, Rev. H. LIanngaia’n Centenary Monument a hawng ang a; Rev. C. Ngurhnema, AGS-in Biak in a hawng thung dawn a ni. Ralvanwg Kohhran Centenary thupui atan ‘Hei leh chen hi Lalpa’n min awmpui’ tih a ni ang. He Centenary lawmpui tur hian an khaw chhuak, hmun danga awm tawh zawng zawngte an sawm a ni.

Faina Hapta, 2011 denchhena Office fai thlannaah BCM headquarters Office chuan Lunglei khawpui chhunga Kohhran leh NGO Office fai ber lawmman a

dawng leh ta. Office Fai ber lawmman hian thuziak bakah pawisa fai Rs.2,000 a keng tel. Faina hapta denchhena Office fai thlannaah tun hma pawhin vawi eng emaw zat BCM Office hian fai ber nihna a lo hauh tawh thin a, nikum (2010) pawh khan he lawmman hlu tak hi a lo dawng tawh a ni.

BCM President, Rev.Dr.K. Thanzauva chu Asia chhim chhak lama Baptist Kohhran inrelbawl dan (How to be Baptist in Asian Contact) chungchanga a tul anga hma la turin Asia Pacific Baptist Federation (APBF) chuan a tir a; Ruahman lawk dan chuan Oct.17-22, 2011 chhung hian Vietnamah meeting an nei ang. Rev. Dr. K. Thanzauva hi Asia Pacific Baptist Federation(APBF) ah hian Vice President a ni lai a ni.

October 1 Inrini khan Salem Kohhran –ah nupa tuak 32 inneih that tir an ni.
Heng tuak 32 te hi bialtu Pastor, C. Vanlawma’n a invawn tir a ni. Salem Kohhran hian kumin kum tir atang khan an Kohhran Silver Jubilee lawmin Programme hrang hrang an hmang chho a. He Inneih programme pawh hi Silver Jubilee denchhena ruahman niin kan thu dawnna chuan a sawi. Heng Tual 32 innei tha te hi Kum engemawzat lo innei tawh leh Tu leh fa neih tawh te pawh an awm nual a ni.

October thla tir atang khan Pastor Bial hrang hrang ten Bial Inkhawmpui neiin FOD leh Kohhranpui Rorelna neih chhoh mek a ni. Kan hriat theih chinah heng Bial te hian tun Pathianni hmang hian Bial Inkhawmpui an nei ang. A tam zawk hian zanin atangin Inkhawmpui an tan dawn a ni:-

Hrangchalkawn bial, Thuathu-ah – Thupui “Isua Krista chu Lal ber a ni”
– Speaker: Rev.H. Lianngaia, General Secretary

Theiriat bial, Venglai-ah, Thupui “Kraws Pathian thiltihtheihna”
– Speaker: Rev.C. Ngurhnema, AGS i/c Services

Diltlang bial, Khawmawi Hmar veng-ah, Thupui “Isua Krista lo kal lehna”
– Speaker: Pu K.M.S.Dawngliana, Editor, Kohhran Beng

Damdep bial, Charluitlang-ah, Thupui “I ram lo thleng rawh se”
– Speaker: Rev.C. Lalbiaksanga, ES, Lawngtlai

|awipui bial, Mualcheng-ah, Thupui “Lalpa lo kal lehna”
– Speaker: Rev.C.Lalrochama, Bialtu Pastor

Pangzawl bial, Keltan-ah, Thupui “Tho la, i Pathian ko rawh”
– Speaker: Rev.C. Lalhungliana, Bialtu Pastor

Vahuampui bial, Chamdurtlang-ah, Thupui “I ram lo thleng rawh se”
– Speaker: Rev.C. Lalbiakzuala, Bialtu Pastor

Thingfal bial, T hingfal-ah , Thupui “I nunna turin tlan chhuak rawh”
– Speaker: Rev.H. Lengluta

Lawngtlai North bial, Thingkah-ah, Thupui “Lalpa hman tlak”
– Speaker: Rev.Lalhmunsanga, Bialtu Pastor

Muallianpui bial, Lungleng South-ah, Thupui “Lalpa lo kal lehna”
– Speaker: Rev.H.Lalengmawia, Bialtu Pastor

Hauruang bial, Hauruang-ah, Thupui “Lalpa lo kal lehna”
– Speaker: Rev. Samuel Lalremsanga, MTKP Organiser

Lunglawn bial BKHP, Kanaan-ah, Thupui “I Pathian ko rawh”
– Speaker: Pi B. Singpari, MBKHP Organiser

Lungsen bial BMP, Venglai-ah, Thupui “I rawngbawlna hlen rawh”
– Speaker: Rev.R. Lalbiakliana, Director, FOD

Bungtlang South bial, Bungtlang South-ah, Thupui “Pathian ram”

Serkawn bial, Serkawn-ah, Thupui “Isua krista lo kal lehna”

Zotlang bial (Lli), Zotlang North-ah, Thupui “Isua Krista lo kal lehna”

Bazar Bial, Bazar-ah, Thupui “Isua Krista thuhretu”

Assembly 2011-in a lo rel tawh angin BCM Headquarters Office-a hman tur Motor thar lei fel a ni ta a. He motor, Bolero hi tunkar thawhtanni khan Headquarters Office Serkawn thlenpui niin a tuk thawhlehni khan Pathian hnenah lawmthusawiin hlanna hun hman a ni. He Bolero thar hi cheng nuai 6 chuang hlek a ni a, tax leh insurance te tihfel ni tawhin Registration tih mek a ni. Hetih lai hian BCM Headquarters Bus hman lai chu Assam Bengal Dhubri field-a Bethel Baptist Mission School (BBMS) hman atan pek a ni tawh a. Headquarters-a hman tur Bus thar TATA (712) pawh Aizawl lo thleng tawhin, Aizawlah hian thuam that ngai eng eng emaw tih mek a ni a, tun kar chhung hian Headquarters, Serkawn lo thleng tura beisei a ni.