All posts by admin

Assembly atan inpeih ta

Mizoram Baptist Kohhran Rorelna sang ber – BCM Assembly vawi 116-na chu March 7-11 khian Electricveng Kohhran, Lunglei-ah  neih a ni dawn ta.  Kumin Assembly Thupui atan hian “Thianghlimna” tih hman a ni dawn a ni.  Assembly atana inpuahchahna leh inbuatsaihna hrang hrang a kal chho mek a – A dawltu, Electricveng Kohhran leh BCM Office te pawh an inpeih chhuak thawkhat ta.

 

March 7 hi thlenkim Ni niin  Registration tih nan chhun lam hun hman a ni ang a, Zan-ah Palai lawmna Inkhawm leh Assembly hawnna hun hman a ni ang. A tuk, March ni 8-10, 2012 (Ningani atanga Inrinni) thlengin chun lamah Rorel Inkhawm neih thin a ni ang. Assembly Rorel hi BCM President thar, Rev.Dr. Raltawngan a kaihruai ang.

 

Kumina rorel tur langsar zual zingah –  BHSS tana Bus lei rawtna te, Christian Hospital Lawngtlaia Doctor ngelnghet dah rawtna te, Thenzawl leh Zawlnuam bial Kanhmuna Guest House sak rawtna te, Kut hnathawkte chawikanna tur ruahmanna siam leh Corruption titlem tura hmalak rawtna te a awm a. Kum 10 dan zela Planning Commission din rawtnate a awm bawk.  Heng bakah hian ABC atanga thu lut Agenda engemawzat a awm bawk.

Dawltu lam:

Electric Veng Kohhran hi  member 1635 an ni a. Kohhran Upa 26 leh Rawngbawltu 16 an awm a; Bialtu pastor thuthmun a ni. An Kohhran chhungkaw 300 chuang hret an ni a, an Biak in hi ft.87×50 a zaua ni bawk.  Assembly dawl tur hian budget Rs. 800,000 vel an siam a, nuai sawm vel an tuak chhuak a ni. Assembly atan hian Committee peng 8 aia tlem lo an siam a. Reception Counter  hi Biak in kawt zawn chiah aah siam a ni ang. Official tih loh lirtheia kalte chu LDSC Ground No.II, Biak in thlang lawk ami-ah dah zel tur a ni ang a. Motor lian chi erawh chu Sobji bazar peng bak tlan phal a ni lo ang. Refrehment pawh Biak in thlang lawk, pen 20 vela hlaa awm, JNM Middle School kawt zawlah an buatsaih a ni ang. Assembly chhung hian BCM Office chu Biak in hnuaiah an awm dawn a ni. BCM Officce hi Assembly chhung chuan Serkawn-ah ni lovin, Assemblyna hmun, Electric vengah hian an in suan vek dawn a ni.

BCM Assembly Programme 2012

LUNGLEI TOWN T.K.P. MEET

Mizoram TKP buatsaihin Lunglei khawpui chhung huapa TKP te chuan March 3-4, 2012 hian Rahsiveng Biak inah Leaders Meet Cum Joint Fellowship neih a ni dawn a. March 3, nrinni-ah nilengin Khawpui chhunga TKP Unit tina O.B te pualin Leadership Training neih a ni ang a, thupui pahnih- TKP leh BCM Inrelbawlna tih leh Thalai Hruaitute leh tunlai khawvel tih thupui hmangin Paper present leh Discussion hun hman a ni ang. Resource Person-ah Rev.R. Zohmingliana leh Pu H. Lalhmingthanga, Saiha te an hmang dawn a ni. A tuk, Pasthianni ah Nilengin Programme hman a ni leh ang a, chawhma inkhawmah Organiser, Rev. Samuel Lalremsangan thuchah a sawi ang a, chawhnu Joint Fellowship chu Pu R. Lalrochama leh Nl. Lalbiakdiki ten an kaihruai ang a. Zan inkhawmah Tv.PC. Vanlalrovan thu a sawi bawk dawn a ni.

Detail Programme:

MARCH 3, 2012 (Inrinni)
1st session at 10:00 am-12:00 noon
Hruaitu

Resouce person

Thupui :

Solo

Paper present & Discussion

:

:

:

:

Nl. T.Thangkimi

Rev. R.Zohmingliana

“TKP te leh BCM inrelbawlna”

K.Zomuanpuii, Moria

     
2nd session 1:00 pm – 3:00
Hruaitu :

Resouce person

Thupui

Solo :

:

:

:

:

Pu R.Lalengliana:

Pu H.Lalhmingthanga

“Thalai hruaitu leh tunlai khawvel”

F.Lalremsiami, Zotlang

 

     
MARCH 4,2012 (Pathianni)
(Zing inkhawm at 10:00 am)
Hruaitu

Thuchah

Zaipawl

 

:

:

:

 

Pu Victor Lalrinawma Sailo

Rev. Samuel Lalremsanga

BCM Choir, Pukpui, Moria, Vanhne, Zohnuai, Salem, Sethlun

Solo : Bethsy Lalrinsangi
 
Chawhnu at 1:30 pm- 3:30 pm : Joint Fellowship
Hruaitu

Zaipawl

:

:

Pu R.Lalrochama & Nl. R.Lalbiakdiki

Chanmari, Electric, Bazar, Serkawn, Theiriat

Solo

Group zai

Short speech

:

:

C.Lalmuanpuii, Edenthar

Gospel River Band

MTKP Sr. adviser-te

Skit : TKP Serkawn Unit
Zai hruaitu : Gospel River Band
 
 
Zan inkhawm at 6:30 pm  
Hruaitu :

Thuchah :

Zaipawl :

 

Solo :

:

:

:

 

:

Pu F.Lalromawia

Tv. P.C.Vanlalrova

Rahsiveng, Zotlang, Venglai, Kikawn,
Ramzotlang, Chanmari Vengthlang

 

C.Vanlaldintharpuia, Theiriat

 

Lawngtlaiah Social Concern Awareness Campaign

Lawngtlai khawpui chhung pastor bial 3 huapin nimin, February 25 hian Social Concern Department chuan Awareness campaign an buatsaih dawn a. Headquarters atangin AGS i/c Service, Rev.C. Ngurhnema hovin an kal ang. Resource person atan Rev.Lianchhunga Khiangte, Pu C. Lalbiakthanga, Upa M. Thansiama, Pi Lalnunzami Chawngthu leh Pi Hmingthanzami Chawngthu te an ni ang.  Inrinni Programme bakah a tuk Pathianni khian  Kohhran hrang hrangah hun an hmang chhunzawm ang.

General Secretary Bihar-ah

BCM General Secretary, Rev.H. Lianngaia leh Zemabawk bialtu pastor, Rev. H. Vanlalruata te chu Compassion East India Partnership meeting pawimawh, Bihar khawpui Patna-a February 22-24, 2012 chhunga neihah BCM aiawhin an kal.

Education Sunday

February 26, 2012 Pathianni hi Mizoram Baptist Kohhran Nipawimawh – Education Sunday (Special Sunday) a ni a. He Ni hi Mizoram Baptist Kohhran te chuan Biaik In tinah hmangin Zing inkhawm-ah hemi pual hian thuchah ngaihthlak a ni ang a, Headquarters atanga buatsaih thuchah chhiarchhuakin Tawngtai rualna hun hman a ni ang a, tawngtainaa hriat turte pawh tarlan a ni. Tawngtaiho hun hi Pathian ni zingah emaw Zan lam Inkhawm ah emaw (Tualchhung remchan angin) hman theuh tura beisei a ni. Tin, Lunglei khawpui chhunga Tualchhung Kohhran engemaw zatah hemi puala hun hmang turin Headquarters atangin an kal dawn a ni.

 

Tawngtai rual – Thupui te.

1. Zirnaa thawktute tan: Pathian leh kohhran, zirlaite tan inpea taima taka an thawh    theih nan. Nun entawn tlak neia zirna tha (quality education) pe chhuaktu an nih ngei theihna turin.

 

2.Sikul leh zirlai enkawltute tan:- BCM Education Committee, Mission Board, School tin Managing Committee member te leh zirlai nu leh pa te tan dilsak ila. Zirna kawngah nasa zawka ngaihtuahna, hun, sum leh pai senga tih takzeta hma an laknaturin.

 

3.Pathian ram din:-Kan kohhran enkawl Institution te hi piantharna hmun, kristian nun dinna leh ram leh hnam tana thawktu tha  chher chhuahna hmun a lo nih theihnaturin.

 

4.Zirlaite tan:- Tum mumal tak neia taima taka lehkha an zir theihnante, thil tha lo – drugs & ruih theih thil hrang hrang, HIV/Aids laka an lo fihlima nun mawi tak, thuawih nun an neih theih nan. Rilru sang tak an put theih nan pawh dilsak ila, hna lian leh ropui tak thawka Pathian rawngbawltu an lo nih thein nan.

 

5.Lawmthu sawi:-BCM hi Pathianin zirna kawnga sulsutu leh tangkai taka thawktu atan min hman avangte, thawhpui tha leh duhsaktute min pek thin avangin lawmthukan sawi ang a; lungrual taka hma lamahkan pen zel theih nan A hnenah inhlan thar ang u.

……………………

 

 

MIZORAM BAPTIST KOHHRAN LEH EDUCATION .

BCM in education hmanga rawng a bawlna hi a zau hle a, education department in a huam loh mission leh department hrang hrang ten zirna hmanga hma a laknate nen chuan a budget pumpui 50% ai a tam a hmang daih a ni.

 

1.Hun hmasa:
Mizorama sikul hmasa ber chu 1893 ah hawn a ni a, sawrkar hnathawk leh sipai fate pual a ni; hetiang sikul bawk hi Lunglei leh Tlabung ah 1894 ah din a ni. Sap Upa leh Pu Buanga’n Aizawlah Mission sikul hmasa ber dt 1st April 1894 ah an hawng; 1897 a Mizoram an chhuahsan khan a tawp lailawk a; 1898 ah DE.Jones, (Zosaphluia) a tan veleh nghal a ni.

Sap-Upa leh Pu Buangan 1903 March thla ah Lunglei an rawn thleng a, 3rd 7. 1903 ah sikul an hawng a, zirlai 24 an nei. An hun hmasa lamah thingtlang khuaa sikul hawn an uar a, rin aia a harsat tak avangin ko an thlak a, khawpui leh a chhehvel ah hma an la nasa ta a ni. Pu Kara’n (Rev. HW. Carter) education a enkawl khan thingtlang mamawh chiang takin a hmu a, sikul an din leh ta zung zung a. Mizoram chhim lamah 1932 ah Primary sikul 25 a awm a, 1952 ah chuan 150 lai kan lo nei ta a h ni. Kum 48 zet (i.e. 1904-1952) sawrkar in kohhran kutah kan rama zirna pumpui a dah chhungin hmasawnna nasa tak a thleng. Sawrkar kutah 5 H/S, 60 M/S, 366 P/S hlan a ni.

 

 

2. BCM Schools.
Sawrkar in kan sikul enkawl a lak hnuah zirna pawimawhzia hriain BCM chuan hma a la veleh thuai a, 8th Feb. 1961 ah High School (Serkawn Christian H/S) a din ta a ni. Kan ram leh hnam, kan kohhran tana zirna hlutzia kan hre chiang deuh deuh va, Mission ah pawh kan hmanraw tangkai ber zinga pakhat anih zel avangin hma kan sawn zel a, 2007 ah kan rama Christian College hmasa ber kan lo tan ta a ni. Tunah hian Mission enkawl sikul 58; Education department enkawl 5; English Medium sikul tanpui thin 14 kan nei mek; belhkhawm chuan 77 (Special Sunday bua tarlan aiin 5 in kan tam tawh a ni). Thawktu leh zirlai zat (statistics) chiah hi kan hre thei lo va, dik thaw khat chuan kan dah chhuak thei, hetiangin –

 

Sl no

No of  School & College

Teaching staff

Non-Teaching Staff

Students

1

5

117

29

1700

2

14

120

18

1530

3

58

322

56

7100

Total

77

559

103

10330

 

3. Hmachhawp.
Baptist Higher Secondary School hi Central Board zawm tura kalpui mek a ni a; Mizoram Board pawh la zawm zel a, HSLC level ah Board pahnih zawm neih tum a ni a, tuna Junior Section hi upgrade a ni ang a, central Board zawm a ni ang. Chu chu kan tan chuan ‘model school’ a ni aing a, Teachers’ Training –na tha leh ngelnghet buatsaih a ni ang. HATIM ah hian job-oriented course hawn belh zel a ni ang a, Deemed-University la ni hial tura tan lak tum a ni. Thingtlang khua ah English Medium sikul neih zel tul hle a hriat a ni a; kan kohhran in an din theih chuan tangkai tham deuha tanpui a tum ang. Kan ramah education policy thar tha tak hman a lo ni ta; hei hi Zosap missionary ten zirna min lo pek ang kha a ni a, exams leh results chauh thlir lovin; Pathian leh Kohhran, kan ram leh hnam tana mi hmantlak BCM hian chher chhuah zel a tum a ni.

LC/VC Election-ah BCM-in Chawlh puang

Mizoram Baptist Kohhan chuan February 23,2012 (Ningani) hi Mizoram Village Council/Local Council inthlanni(Election) a nih avangin Kohhran hnuaia thawktute, Mizoram chhunga he Election-in a huam chin te tan Chawlh a puang. Hei hian Institution hrang hrang leh Branch Office te pawh a huam ang. Amaherawhchu, Institution te hi anmahni administration-ah harsatna a awm dawn emaw, laklawh thil-ah Chawlh an remchang lo a, Vote thlak turte tana remsiamna fel tak a awm chuan anmahni inrelbawlna anga an kal remtih sak an ni.

 

Mizoram Baptist Kohhran chuan Democracy ram kan nih ang takin thawktu leh Kohhran mipuite pawh mahni chhia leh tha hriatna fim tak hmanga, Pathian rawn chunga kan khawtlang/ram leh hnam hruaitu thlanna-ah hian tel vek turin a duh a,  Kohhran mipuite leh Kohhrana thawktu zawng zawng te chu vote thlak theuh turin a chah bawk.

Kristian Hospital Ni-Feb 19

Tun Pathianni, February 19, 2012 hi Mizoram Baptist Kohhran Ni Pawimawh – Kristian Hospital Ni (Special Sunday) a ni a. he Ni hi Mizoram Baptist Kohhran te chuan Biaik In tinah hmangin Zing inkhawm-ah hemi pual hian thuchah ngaihthlak a ni ang. Kumin Kristian Hospital Sunday thupui atan  ‘Dam lo te tidamula’ (Mtt.10:8)”  tih thu a ni ang a,  hemi puala thuchah buatsaih chu Kohhran tinah chhiar chhuah a ni ang.


HOSPITAL SUNDAY THUCHAH
– Dr. Lalramzauva, Medical Superintendent

Tidamtu kan Lalpa Isua Krista hmingin Kohhran mipuite chibai ka buk a che u. Kan Hospital rawngbawlna chuan kum 89 a lo tling ve ta reng mai, a kum tam tawh dan atanga chhut chuan a hmasawn dan hi chu muang kan ti deuh vek hlawm awm e, hmasawn leh thanna hi kan mamawh em em lai in tihdam rawngbawlna awmzia dik tak kan hriatthiam a tul hle bawk. Mi ram ang bawkin kan ramah pawh medical hna hi sumdawnna hlawk tak a ni ve ta a, private hospital tha tak tak a lo ding zel a, hengte hian sum an lakluh pawh a tha a hmasawnna pawh a chak, hei hi kan ram mipuite tan thil lawmawm tak pawh a ni. Kan Kohhran hospital hi erawhchu private nen khaikhin theih a ni lo, kan rate a hniam a, mi thahnem tawk tak sum nei hauh lo te pawh kan kep reng an tul bawk a, sum neih loh vangin tumah kan hnar thiang lo va, kan hnar ngai hek lo, chuvangin kan sum lakluh hi private hospital te ang chuan a tam thei lo tih hria ila.

 

 

Tunlai dinhmunah kan ramah sorkar leh private hospital tha tak tak a awm tawh hnu hian Kohhran hian he rawngbawlna kan kal pui zel hi a la tul em, tih pawh mi thenkhat chuan kan ngaihtuah thin awm e, thil chhut tham tak pawh a ni reng e. Kohhranin tihdam rawngbawlna kan kalpui chhan hi kan Lal Isua rawngbawlna chhunzawmna a ni, tih kan hriat reng a tul. Mipuite leh a thawktu te ngei pawh hian hei hi kan chian a tul a, RAWNGBAWLNA RILRU pu lo va eizawnna leh sum hmuhna anga thawh a hlauhawm hle. Damlo enkawl hna hi hmangaihna tel lo chuan hna hahthlak tak a ni, hunbi mumal nen a thawh ve theih lohva englaipawh a inrin a tul fo thin, mi tamtak chuan hei hi kan tlin lo fo reng a ni. Kohhran hoten min tawngtai pui reng tur pawhin kan ngen  che u a ni.

 

 

Kan rawngbawlna hi Serkawn leh Lawngtlai-ah a ni ber a, BCM anga kan ngaihtuah chuan heng Hospital te rawn pan phak lo tan tangkaina kan nei lo, tih mai awl tak a ni. Mipui tam zawkin kan hmelhriata kan chhawr theih nan thingtlang hmun hrang hrangah clinic neiin kan feh chhuak thin a, hei pawh hi a tulna ngaihtuah chuan kan la bial zau tak lo hle, kan theih leh kan tlin tawk chuan hma kan la ve zel e.

 

 

Nursing school kan neih hi Zoram mipuite tana thil hlu tak a ni a, Mizorama nurse training na hmasa ber a ni nghe nghe. He zirna hi Zoram kil tin atangin kan chhawr tawh a Zoram pawn thlengin he schoolah hian zirlai kan nei tawh a ni. Kan nursing school hi Nurse zir chhuah theihna leh mite tana eizawnna tling thiamna pek chhuah na satliah mai a ni lo va Kristian nurse tha tak chher chhuahna tura kan kalpui tlat avangin kan Nursing school chhuak te hi mi pawhin an fak viau thin, duhthusam  chu thleng dik vek lo mahse hemi kawngah hian kan hlawhtling thawkhat viau a ni.

 

 

Medical  Laboratory Technician (MLT) training na kan kalpui mek bawk a, hei hi kan BCM school BHSS nen tangkawpa kalpui a ni, medical lam a nih avangin Hospital lamin kan enkawl tam deuh zawk a, kan mawhphurhna ah kan la deuh ber, hei hi thil thar deuh a ni a, pawl sawm passed tana zir theih  class XI leh class XII zirna peng khat a ni a, kum hnih course a ni. Heta zir chhuak te hi Medical Laboratory ah chhawr theih (qualified) an nih avangin eizawnna tlinga inzirchhuahna kawng hnai tak a ni a, batch hnih  in an passed chhuak tawh a, hna an hmu tawh hlawm a, hemi chunghangah pawh hian kan naute hi hna la tu ten an duh viauva, an hnawng lo, tih report kan dawng thin a kan lawm hle.

 

 

Nauhnuchham enkawlna (BCO) hi medical hnuaiah a la awm rih a, hetah hian nausen, an nuten an thihsan chauh enkawl tura policy nei kan ni, naute 20 -30 inkar kan nei deuh reng a, tunlai khawvel, HIV leh natna dang hluar chhoh zel naah hian he rawngbawlna hi hna pawimawh tak a ni chho zel dawn a, thawktute an hah thei hle a, inenkawldan phungah hma kan sawn ve hret hret a, a bik takin Nurse senior  pakhat full time a a duty hnu hi chuan naute pawh an hrisel tha in an duhawm hlawm hle, hna hautak tak nimahse min ti lawm em emtu rawngbawlna, chhanchhuah hna pawimawh tak thawhna a ni.

Hospital hian zawi zawi chuan hma kan sawn ve a, tunah hian Mizoram chhim lama kan la neih loh zunkawng lam enna khawl, CYSTOSCOPE nei turin hma kan la a, cheng nuai 15 vel senna tur a ni a, Vellore-ah kan in train tawh a, khawl kan chah mek a reilo teah a lo thleng ang. Tun hnai-ah TKP diamond Jubilee lawm nan Pulseoximeter leh monitor  khawl tha tak an rawn donate a kan lawm hle., ICU nei turin ruahmanna siam mek a ni bawk. Dental doctor 2 kan nei a Serkawnah pakhat, Lawngtlaiah pakhat, Dr.Ruata hian Delhi ah zirna sang zawk a bei mek a, Dental service changtlung deuh zawk neih thuai kan beisei a ni. Building hna pawimawh tak tak kal lai a awm nual a, Serkawn a kawngpui an a sak thar hi Hospital Annexe building tih a ni a, kan Hospital foundation day 10th February khan Rev.C.Ngurhneman Pathian hnena hlanna a nei a, hei hi a chhawng hnuai room 5 dawr atan luah tir a ni a(pakhat hi State Bank in ATM dah nan an hmang) a chhawng chung zawk ah guest room pali leh dining hall a awm, Guest room hi hospital mamawh kan la neih theih loh te zinga mi kha a ni a, kan lo nei thei ve dawn ta hi kan lawm hle

 

 

Kum tam tak chhunga mamawh langsar tak, Nurse Hostel chu  kan lo rel tan ta a, kan lawm hle, Tin Hospital tana thil pawimawh tak, inkhawmna (Chapel) kan rel tan mek a, kan phur hle a, student leh staff zawng zawng kan in hnatlan chhawk nghe nghe a ni. Lawngtlai main building hna a kal mek zel a, a building hlui la awmchhun, a tir te a bul kan va tanna Assam type building kha kan thiat zo ta nge nge a, a lunglen thlak hle, BKHP ten Lawngtlai tan sum an thawkchhuak nasa hle a, kan lawm hle. Solar power project kan buaipui mek a, a khawl zawng zawng a rawn thleng tawha, an bun mek, 25KV power pe thei, cheng nuai 115 man a ni a a that viau kan beisei, Central lam atanga hmuh a ni a, ZEDA min buaipui sak a ni.

 

 

Building leh khawl ilo, infrastructure an tih thin lamah hi chuan hma kan sawn ve thei zel a, Hospital tha nei tura hma kan sawn theih rih  lohna chu Doctor thawk tur kan inhmu zo lo hi a ni, hei hi Kohhran mipuiten kan hriat a kan vei tlan a tul hle, mi inpe kan hmu tlat lo va, advertisement kan chhuah leh chhangtu kan hmu lo va kan han sawm deuhte pawhin an duh lo zel rih si, mi inpe kan Kohhran chhungkaw zingah kan hmuh loh reng chuan Hospital rawngbawlna kan kalpui theih loh hun pawh a la awm dawn tih a chiang reng mai, doctor MBBS post pahnih leh specialist post pahnih a ruak sa reng a, hetiang mi inpe thei awm, sawm tur hria te in awm chuan inbengvar chhuah pawh kan tul hle Pathian hnenah pawh  i dil  reng ang u. Ka lawm e.

……………………………

 

 

SERKAWN HOSPITAL SAK DAN
– Rev. Dr. HS. Luaia

 

 

A hming: A hming kan sak dawn hian SERKAWN HOSPITAL tih kan tum a, Nimahsela Bazar veng Upa Vannghaka chuan Serkawn Hospital tih hi a duh lo va, Hospital Serkawn a awm tih tur a ni, a ti a. Nimahsela keinin a sei lu deuh lo maw? KRISTIAN HOSPITAL SERKAWN? i ti ang u kan ti a, kan pu ta a ni.

 

 

    Atirah chuan Assam Type in te tak tea sak a ni a. A chhuat chu thing phel a ni a, In hnuaiah ka Kelin riah an tum thin a ni. Amaherawchu tanpuina kan dawn tak nual avangin concrete a sak kan tum ve ta a. Chutih lai chuan keini lam chuan concrete kan la tih ngai meuh loh avangin Rev. Zairema chu Aizawl atangin a lo kal a. Balu tha min zawnpui a. Tlabungah Tuipui balu tha lai kan zu en a. Chu mi hnuah chuan Darzo Tuipui kaia balu kan han en leh a.

 

 

Tuipui balu kan en hawn lam chuan Tuipui lung pakhat chu Lungtat atan ka hawn a, a hnung lamah kan Jeep-ah ka dah a. Kawng chho a kan kal laiin kan Jeep chu a break a failed ta thut mai a, kham zawna kan kal lai a ni a. Kan hnung tawlh ta a, kan tlak hmain a hnung lama thu chuan Tuipui lung ka hawn chuan a hnung lamah a kam hlauh mai a. Kan dingthei ta a ni. Chu mi lung chu ka la hmang reng a, in hmuh duh chuan ka kawtah ka la dah reng mai.

 

 

Rev. Dr. Zairema hi thil hre tak a lo ni a, min rawn tanpui a ni. Concrete-a kan sak dawn hian a in hlui hi sawn a ngai ta tlat mai a, chu tih laia kan kohhran mistiri hotu chu Pu Lalrawna a ni a, Ani chuan a in hlui chu thiat lova sawn dan a lo thiam hlauh mai a. In sakna dal lovin kalkawng lamah a sawn ta a ni. A mak ka ti hle mai. Hetih lai hian a  hminga hotu ber ka nih lai a ni a, Pathian in min tanpui a, tanpuitu tha tak tak kan nei a ni.
 

 

A tawp berah chuan kei chu Hospital Chaplain ka ni dawn ta tlat mai a, ka ten chhe si a, ka hreh em em a ni. Nimahsela Pathian tanpuiin ka han thawk ta a. Thla hnih vel hnuah chuan ngaiah ka nei ve thei ta a ni, Tun hmain Pastor Zathanga chu Damdawi inah hian damlote tawngtai sak turin a kal fo thin a. A lawmawm hle a ni. Ka han thawh ve chinah chuan Lunglei nen kawp a ngai ta a. Zing lamah Serkawnah ka thawk a, tlai lamah Lungleiah ka kal thin a ni. Lungleiah chuan Nurse ho nen devotions kan zu nei thin a ni. Devotion-a kan hla sak chuan ka rilru a khawih tlat mai a –
Harsatna tawk lo Rawngbawltu awm maw?
Lal Krista tana beitute.
tih kan han sak chuan ka thinlung a khawih nasa hle a. Vawi leh khatah ka mittui a lo liam thut mai a ni. Serkawnah pawh hian tisa natna ni lo va, thlarau lam natna veitu an awm tlat mai. Pakhat phei chu Durtlang Hospital-ah a insawn hial a. Chutah chuan piantharna a va chhar ta hlauh mai a, Serkawn Biak in kawta kan han inhmu chu a hlim em em a ni.

 

 

Hospital hi Ringtu nun siam thatna a ni a, kan Chaplain pawh hi i tawngtaipui thin ang u.

Weekend Programme

Tun Weekend hian Headquarters Programme hrang hrang hetiang hian neih a ni ang:-

 

MTKP :
Tun Pathianni hmang hian MTKP hruaitute chu hmun hnihah Bial inkhawmpui hmanpuiin an feh chhuak dawn a.

 

Phuaibuang Bial Inkhawmpui  neih mekah  Speaker turin  Rev Samuel Lalremsanga, Organiser, MTKP a kal a, he inkhawmpui thupui atan hian ‘Ka khawngaihna i tan a tawk e’ -tih hman a ni. Pathianni zanah an tiak ang.

 Zobawk Bial TKP Inkhawmpui, Trinity Biak in, Zobawk-a neih -ah MTKP Vice President, Tv.PC. Vanlalrova chu Speaker niin Upa R.Lalduhawma, MTKP Senior Adviser leh  Tv C. Lalengzuala, Editor Thalai Entu,  Pu T.Lalhlimpuia-Executive Comtt. Member ten an hman pui bawk.

 

Worship & Music Department:
Worship & Music Department chuan tun Pathianni hmang hian hmun hnihah programme an buaisaih.

Lungsen bial huapin Mahanaim Biak inah February 17-19, 2012 chhung-in  Upa C. Hrangdula hovin Music Training an nei a. Pathianni chawhnu leh zan lam thlengin Serkawn Kohhran chuan Rev.R. Lalbiakliana hovin Worship Seminar an nei bawk ang.

 

Sunday School:
Christian Education Department chuan  February 18, 2012 hian Bawngkawn Pastor bial huapin Chaltlang Biak inah Sunday School Seminar an buatsaih-ah  Director, Rev.B. Lalramhluna’n a hman pui dawn a; Pathianni hian Bial chhung Kohhran hrang hrangah rawngbawlna a nei ang.

 

 

Evangelist-te rawngbawlna
1. Evan R.L.Thianghlimna (Mizoram Evangelical Ministry) te chuan Zawlnuam bial Bawrai Kohhranah rawng an bawl mek a.

 

2. Evan. F. Lalnuntluanga (Gospel For All) te chuan Hnahthial South bial, Maudarh Kohhranah rawng an bawl mek bawk. Evan. K. Lalenga (Chanchin |ha Chhuangtu team) te chuan Saiha Meisatla Kohhranah rawngbawlna an nei mek a.

 

3. Evan.T. Lalengzauva (Revival team) te pawhin Khumtung Kohhranah rawngbawlna an neih chhunzawm zel bawk.

 

BCM Mission Partners Consultation

Feb. 16 – 18, 2012 hian CBCNEI Conference Hall, Guwahati-ah BCM Mission Partners Consultation neih a ni a. Hetah hian North East India region-a BCM in Mission lama a thawhpui Association leh Convention hrang hrang atangin an hruaitute an rawn kal a ni. Mizoram Baptist Kohran aiawhin Rev. Dr. K. Lalrinthanga, AGS, Mission leh Rev. C. Ngurhnema, AGS, Service te an tel a, Mission lama rawngbawlna chungchang leh hmasawn zel dan tur te, thawhho zelna tur leh hma thar lak dan tur te an sawi ho a ni.

 

Tuna BCM-in India hmar chhak lama Mission Pawl hrang hrang a thawhpui te chu hengte hi an ni:-

 

Meghalaya

1. North East Harvet Network (Shillong)

 

Tripura

2. Triura Baptist Christian Union(TBCU)
3. Saisawm Sazai Baptist Association
4. Sadar North Baptist Association
5. Udaipur Baptist Association
6. Subrom Baptist Association

Assam
7. Good News Mission Society
8. Kamrup Asomia Baptist Society
9. Mishing Baptist Church Association

 

Assam-Bengal:
10. Rabha Baptist Union
11. Bodoland Baptist Church Association
12. North Bengal Baptist CHurch Association
13. North West Assam Baptist Church

Arunchal Pradesh:
1. Adi Baptist Union
2. Galo Baptist Union
3. United Galo Baptist Churches Association
4. Dibang-Lohit Baptist CHurches Association
5. Apatani Baptist Association
6. Niyshi Baptist Church Council

Tawngtaipui ngai

BCM Electric Veng Upa C Lalduha.. Kum-80 chu Nilai zan 15 Feb,2012 khan an biak in (BCM Electric Veng ) chhawng hnuai chhukna step tir atangin choka kawngkhar tuidehna bulah a tla thla a, a ana hle. A khup kawi sawh keh in a lu lamah hliam a tuar nual bawk a. A mit ko nasa tak a kak in a hmui chhung lam zawng a kak phei vek bawk a.. A hmui hnuai ah a ko tlang bawk a.. Hmuhdan in a hai hmai zawng2 hi nghing vek in chhung lamah a kum lut vek a.. Tunah hina Lunglei Civil Hospital ORTHO ward ah dah mek ani a.
He Chetsualna thlen lai bian BCM General Secretary, Rev. H. Liangnaia, Pastor Co-ordinator, Rev.Lalthangliana Hnamte leh BCM Puipa dang te pawh an tel a. Kumin Asembly thlenna tur inbuatsaihna leh inkawmbhona neih tura Biak In Hall lam an pan laiin Upa C Lalduha hi a chesual ta a ni.  Nimin khan BCM chuan cheng singkhat-in an kan nghe nghe a ni.
Kum upa lam te an ni tawh a i tawngtai pui hram2 ang u an tan dam chhuah leh te a harsa tawh si a kum upa lam tan chuan.. Amah hi zunthlum nei sa anih avang in treatment pek pawh a buaithlak hle bawk niin an sawi. Kohhran hoten i tawngtaipui ang u.