All posts by admin

Mission News Updates

 

• Ringthar: December thla hian Ramchhung Mission a kan rawngbawlna Chakma hnam zingah ringthar mi 61 Baptisma chang thar an awm. Zohmunah mi 21, Bawlpu 1 a tel a, Phairuangkaiah mi 18 leh Udalthana ah 6, Buddhist Puithiam ‘Bante’ an tih a tel bawk. Longpuighaat-ah Baptisma Ni 13 thawhlehni khan mi 16 in an chang a, an zinga 1 phei chu kum 9 lai Buddhist Puithiam hna lo thawk tawh ‘Bante’ a ni. Heng ho hi kan hriat theih dan tur chuan khawlai-a lukawlh, puan senduk sin kan hmuh thin te an ni. Kumin chhung hian Longpuighaat Circle-ah hian ringthar Baptisma chang 188 zet an awm tawh a ni. Lalpa hnenah lawmthu i sawi mawlh mawlh ang u.

 

•Tawngtai:  Chawngte L Kohhran Mission Committee chuan Dec 16 atanga ni 18 chhung khan Ngharum, Chakma Baptist Kohhranah chaw nghei tawngtai an hmang. An Kohhran hian Longpuighaat Circle-ah Evangelist 1 an ruai bawk

 

•Camping:  Ni 14 atanga ni 17 chhung hian Tuichawng Chakma Kohhranah Chakma Circle Team hmangin Camping neih ani a, He Camping hi Ramhlun N Kohhran Aizawl leh Aizawl East Pastor Bial te thilpek hmang a buatsaih ani.

 

•Work Camp:  Ni 14 atanga ni 17 hian Zohnuai Kohhran te Bolisora-ah Missionary Quarter sa-in Work Camp an nei a, Zan lamah Longpuighaat Chakma Team-in, Pu Jomadona Speaker hovin Audio Visual hmangin Crusade an nei bawk. Ni 17 hian Zohnuai Kohhran BMP President Pu. R.Rohmingthanga Work Camp tura kal a, Accident-a thi ta hriat rengna lung chu an Accident na hmun ah an phun nghal.

 

• Zin chhuak: Rev.Dr K.Lalrinthanga A.G/S i/c Mission te nupa chuan kan Mission Field Andaman & Nicobar Islands ah Krismas hman an tum a, Mission Promoter Pu H.S Lalhmingthanga pawhin Ziro Arunachal West Field-ah Krismas a hmang dawn bawk.

 

• Tunlaiin kan Mission Field a bikin Tripura leh Arunachal Pradesh-ah Krismas Carol ngawrh takin an hmang a, Kohhran in tinah an tawngtai thin ani.

Admin Note:

Chawlhkar hnih lai thanga Delhi-a ka zin avangin BCM News kan up-date lo va, Visitors te hriatthiamna ka ngen a. Tunah chuan dam takin Office ka zawm ve leh ta e.

Rev.HC Vankairinga-Chatuan ramah

Rev.HC Vankairinga, AICS-a Dean of Ministerial Training Programme chelh mektu chuan December ni 11 (Pathianni) chhun dar 1:40 ah khan kal na avangin Lalpa hnenah min lo chawlhsan ta. Amah hi 1957 ah Thingkah khua ah lo pianga Unau 8 zinga a upa ber a ni. 1985-1987 ah ETC Jorhat-ah B.Th a zir a, zirna-ah a tih that em avangin College hotute’n Mature Candidate-in BD zir an remtih sak a. 1990 ah BD zovin, a zirna hmunah hian Junior Lecturer turin an sawm nghal a. Kohhran lamah zirzawm zel a rem tak loh avangin Bial lamah Pastorin a awm a.

1994 khan Diltlang Pastor bial-a rawng a bawl laiin a nupui K.Ropari chuan nau chungah a boral san hlauh mai a, nu thihsan naute leh a u te 2 chu a enkawl ta a. Hun engemaw chen Pastor hna a thawh hnu-ah UBS Pune atangin M.Th zir leh in 2000 kum khan B+ ah a zo a. Kum 2001 khan Kawlthanmawii Kawlni nen innei leh in fapa 1 leh fanu 1 an nei. Kum 2000 kum khan a kal thlak sak (Kidney Transplant) a lo ni tawh a ni.

Amah hi BD. M.Th Degree nei, AICS tun dinhmun a thlen theihna tur a a kil a lung tangkai ber te zinga mi ani a. A thiamna Kohhran hote tan a thahnem ngai tak a hmang thin tu ani. A Vuina Inkhawm AICS Chapel-a neihah hian heng mite hian thu an sawi. BCM, aiawhin Rev.C.Ngurhnema, AICS aiawhin Principal Dr. RL Hnuni, Mizo Theological Association ai awhin President. Rev Dr. Lalchhuanawma, Thlamuanna thuchah Rev. Dr. K. Thanzauvan a sawi a, Tuivamit thlanmualah ropui tak a vui liam a ni ta a ni.

December 21-atangin Office Khar dawn

BCM hnuaia thawktu nitin Office kal te chuan December ni 21 atang hian Krismas chawlh an hmang dawn a, Kumthar January ni 5 ,2012 ah Office kal tran leh in January ni 6 ah thawktute inhlantharna hun hman ani ang. Inhlatharna Programme hi Hqrs Office leh BCM Institutions leh Department hrang hrang Lunglei a mite chuan Sap Upa leh Pu Buanga Hall, Serkawn-ah an hmang ang a, Lawngtlai leh Aizawl a thawktute chuan Executive Secretary Office ve ve ah a huhovin an hmang ang

Headquarters Office-ah chuan January ni 6 chhun dar 12 ah Programme hman a ni ang a.

Hruaitu: Rev.H.Lianngaia, General Secretary

Roll Call : Upa Biakchungnunga i/c Office Superintendent

Solo: Nl Lalrindiki. Nurse Hostel

Thuchah : Rev Dr K.Thanzauva

Zaipawl : Nurse Hostelers

Inhlan tharna tawngtai rual neih a ni ang

Bible Sunday leh School Exam : Dec 4

December 4, 2011 (Pathin Ni) khi khawvel huapa kristiante ni pawimawh “Bible Sunday” a ni. Bible Sunday a nih bakah Sunday School kum tawp Exam Ni a ni bawk avangin Pathianni zing, Sermon inkhawm banah Sunday School Exam-in a chhunzawm nghal ang. Christian Education Director chuan Kohhrante Sunday School exam ngai pawimawha, exam theuh turin a ngen.
……….
Bible Sunday hi a hming chawi chhan ang tak hian Bible Sunday hi Bible lehlin, chhut leh theh darh pawimawhna inzirtina ni atan Kohhran pawl hrang hrangin hun thuhmun kan hman thin a ni.

BCM chuan Kumin Bible Sunday thupui atan “Mittui tla chunga tuhte chuan hlim takin an at ang” (Sam 126:5 & 6) tih kan hmang dawn a. Pathianni zing inkhawm-ah BCM Biak in tinah thusawituten he thupui hi sawi tura beisei an ni. Inkhawm thawhlawm hi Bible Society pual atan hman a ni ang.

Mizoram Baptist Kohhran hian atir te atangin Bible chhutu pawl pawimawhna hi hriain a ngai pawimawh em em thin a. Kan Missionary hmasa Pu Buanga leh Kohhran hruaitu hmasa thenkhatte chuan Bible lehlin hi hnapui pakhatah an neih thin a. Bible khawla chhut pawimawhna hi an hre chiang hle a ni.

India ramin Independent a neih hma chuan British & Foreign Bible Society hian engkim a ngaihtuah a. India ram a lo Independent hnuah India ram Bible Society din a lo tul ta a. North East India Christian Council, tunhma lama Assam Christian Council kan tih huapa Bible Society Auxiliary din a lo tul ta a. Chu mi dinna a tel tur chuan Rev.Dr.C.L.Hminga chu Shillong-ah a zuk kal a. India ram tawng hrang hranga Bible chhut chu India mite mawhphurhna a lo ni ta deuh deuh a, tan lak a tul avangin hetiang hian Auxiliary an din ta a ni.

Rev.Dr.C.L.Hminga lo haw hnu hian Lungleiah Bible Society Branch din a lo ni ta a. Bible Society pawimawhna hi kan Kohhran chanchinah uar taka chhuah a ni thin. Bible chhutu pawl hi an lo chak theihna tur leh Kohhran miten a pawimawhna an lo hriat deuh deuh theih nan kum khata chawlhni vawikhat, December chawlhni hmasa ber chu ruat a lo ni ta a. December Pathian ni hmasa ber hi Khawvel pumah Kohhran pawl hrang hrang ten Bible Sunday-ah hman a ni a. Tun hma zawng chuan Bible Society Sunday tiin Calendar-ah kan chuantir a; kum 2007 Assembly chuan Society tih chu paihin Bible Sunday tiin a thlak fel ta a ni. Kan Kohhran Calendar-a arsi chuang a ni a, hemi ni thawhlawm hi chu mahni awmna Branch Bible Society theuhah thehluh tur a ni.

Kum 2011 hi Bible Society tan kum pawimawh tak a ni a. Kumina Bible Sunday kan hman tur pawh hi Kohhranho ten urhsun leh thahnemngai taka hmang theuh turin kan in ngen hmasa a ni. Sap tawng Bible chhuak hmasa King James Version chuan a kum 400-na hmel a lo hmu ta reng mai a. United Bible Societies chuan chu mi denchhen chuan kumin hi Year of the Translators atan an puang hial a ni.

Bible Society of India pawhin a kum 200-na (Bi-centenary) a hman mek kharna hun pawimawh leh urhsun tak chu ni 21st Feb. khan a hmang tawh nghe nghe a. Bible lehlin, chhut chhuah leh sem darh hna hi Kohhran kuta awm a nih ang tak hian, mi tin kan tangkai theihna lai apianga tangkai taka inhmang leh inphal thar zel turin Pathian hmingin kan inngen a ni.

Non-Mizo Evangelist mamawh

Mizoram Baptist Kohhran hnuaia Non-Mizo Mission Evengelist Contract-a thawk tur mi pathum mamawh a ni a. Hindi-a Pathian thu sawi thei, Pathian kohna hria, Mizoram chhung khawi hmunah pawh rawngbawl tura awm inhuam tan dil theih a ni. A hnuaia hming ziak hnenah hian dil theih a ni.

Dil theih hun chhung : January 10, 2012
Personal Interview : January 12, 2012 (11:00AM)
Interview-na hmun : BCM Hqrs. Office, Serkawn, Lunglei
Hlawh : BCM Pay Rules angin

Sd/-
Rev.Dr.K. LALRINTHANGA
AGS i/c Mission
Baptist Church of Mizoram

Arunachal ramah lo kal la, Minpui rawh

Arunchal Theological College-a zirtir hna thawk turin missionary BD/M.Div. chin BCM Mission hnuaia Contract-a thawk tur duh a ni a. December 31, 2011 thleng dilna thehluh theih a ni. Diltu chuan a awmna Kohhran lehkha leh thiamna cerfificate/mark sheet thil tel tur a ni. Hlawh chu BCM Pay Rules ang a ni ang. January 12, 2012 (11:00AM) ah Mission Board hmaah interview tur a ni.

Sd/-
Rev.Dr.K. LALRINTHANGA
AGS i/c Mission
Baptist Church of Mizoram

BHSS ADMISSION NOTICE

Kum 2012 Session atan Baptist Higher Secondary School, Serkawn-a Class IX & X zir tumte tan admission form siam sa hmangin admission dil theih a ni a, hengte hi hriattur a ni:
Entrance exam (Class IX only)    : December 16, 2011 (Friday) (10:00AM – 12:00Noon)
Subjects        : English & Mathematics (35Marks each)
Personal Interview    : December 16, 2011 (Friday) 12:30PM Progress Report card ken tur)
Result            :  December 19, 2011 (Monday)
Admission        : A tlingte chuan January 9&10, 2012-ah Progress report card leh Tranfer Certificate nen Office-ah Admission lak tur a ni.
Interview for Class X    :  Class X tan seat tlem a awm ang a. Dec.16, 2011 (10:30AM) ah Class IX Progress report card nen interview tur a ni.
Hostel Interview    : Hostela awm duhte tan December 16, 2011 (12:30pm) ah interview neih a ni ang.

 

 

Sd/-
C. LALHMINGMUANA
Principal, BHSS Serkawn

Mission Field thar leh Director thar

BCM Mission Committee-in a lo ruahman lawk tawh angin kum thar 2012 atang hian Mission Field thar, Arunachal far East field chu ataka function turin a buatsaih fel ta a. Pastoral Committee, November 23-24-a neih chuan  Field Director atan tuna Madurai-a M.Th. zir lai, Rev. Lalmuanzuala Sailo chu a ruat fel ta bawk.

Arunachal Far East Field ah hian District panga – Dibbang Valley, Lower Dibang,  Lohit, Anjan leh Challang te a huam ang.

 

Tin, Ramchhunga Chakma hnam zinga kan rawng-bawlna khaikhawmtu bik atan Director hran nei tura ruahman pawh tihpuitlin thuai tum a ni a,  Chakma Mission Director atan hian tuna Tlabung bialtu pastor ni mek, Rev.RC. Lalthanzama chu ruat nghal a ni bawk.