All posts by admin

Missionary 4 la thar

November 1-2, (Thawhlehni leh Nilaini) a Mizoram Baptist Kohhran, Mission Board thukhawm chuan Mission field hrang hranga thawk turin Missionary mi 4 an la thar leh ta.

 

Tuntuma Missionary atana lak tharte hi November 2011 – April 2012 (thla 6) chhung AICS-ah  Missionary Training an nei ang a, Training an zawh hunah Missionary atan tirhchhuah an ni ang: Chungte chu:-

  1. Lalthansanga S/o Tawnleicheuva(L) Khatla ‘S’ (BCM Shalom), Arunachal Theological College-a thawk tur.
  2. C. Lalremruata  S/o Rev. C. Ngurhnema, Venghlui, Azawl – Evangelist, Jharkhand Area-Assam Bengal Field-a thawk tur
  3. Lalzawmliana Sailo, S/o Lalramzauva Sailo, Ebenezer, Zobawk – Music Teacher, Arunachal East Field a thawk tur
  4. C. Vanlalhruaia, S/o Pakunga Chhangte, Edenthar, Serchhip – Music Teacher, Arunachal West Field-a thawk tur  te an ni.

Khawvel Sunday School Ni

November ni 6 (Pathian Ni)hi khawvel Sunday School Ni a ni a, he Ni hi Mizoram Baptist Kohhran chuan kohhran tinah Pathianni zing inkhawm ah Headquarters atanga thupui thlan sa hmangin thuchah gnaihthlak a ni ang a. Hei bakaha hian Tualchhung Kohhran ten tul leh tha an tih angina hemi ni pual progamme hi an hmang  dawn a ni. Kumina Khawvel Sunday School Ni thupui chu ‘Zir La Nunpui Rawh’ tih thu a ni ang.

Sunday School Intan dan. Christian Education, Kristian inzirtirna hi tun hma atangin a awm daih tawh a, Biak ina Pathian thu zirhona hi an kalpuina a rei tawh em em a ni. Amaherawhchu tun laia Sunday School kan tih hi chu 1780 kuma Robert Raikes-an Gloucester, England-a a din a ni. Hei hi a thang zel a, Sunday School a pung zel a, 1785 kumah Sunday School inzawmkhawm pawl hmasa ber, Society for Promoting Sunday School a lo ding ta hial a, a hnu lawkah Sunday School Society tia thlak a ni.

Khawvel hmun hrang hrangah a darh zau zel a, India ramah pawh kum 1800 khan William Carey leh a thiante pathumin Serampore-ah an lo din a. Tin, Mizoramah chuan kum 1896-ah Sapupa leh Pu Buanga ten Aizawlah an din a, chhim lamah chuan kum 1902-ah Tv. Thankunga (a hnua Tirhkoh leh Pastor ni ta) leh a thian ten Sethlun-ah an din a ni.

Khawvel Sunday School Ni. Khawvel Sunday School Ni dintu chu Dr. George W. Bailey a ni. Ani hi America (USA) mi a ni a, khawvel huapa Sunday School rawngbawlnaa mi pawimawh tak a ni a. Kum 1910 khan World Sunday School Association ah President atan thlan a ni a. Ama huaihawtin kum 1907 khan khawvel pum huap Sunday School Ni Rome khawpuiah an lo hmang tawh a, President a nih kum, 1910 ah phei chuan Washington khawpuiah May 22 ah ropui takin an hmang a ni. Khawvel Sunday School Ni hi a remchan dan angin hman a ni thin a, mahse India ramah chuan tuna kan hman lai mek, November Pathian ni hmasa ber hi hman a ni ta reng a ni. BCM pawhin kum 1939 khan All India Sunday School Union kan zawm a, chuvang chuan Khawvel Sunday School Ni hi kan lo hmang ve ta a. A hnuah Christian Education Evangelical Fellowship of India kan zawm leh a, kum 2009 atang khan All India Sunday School Association kan zawm leh ta a ni.

BCM Sunday School Dinhmun. Kum 2010 Assembly report hi tuna kan neih hnuhung ber a ni a, chuta a lan danah chuan kan dinhmun tlangpui chu – Tualchhung Kohhran 407 ah Kohhran 375 ah Sunday School a ding a, Kohhran member kum 4 chin chunglam 107440 ah member 75637 (70.40%) in hming an ziak a. Sunday School puipa 1830 an awm a, zirtirtu 6799 an awm bawk a, zirtu chu 67315 an awm thung a ni. Tin, Sunday School Hall nei Kohhran 184 an awm a, Sunday School Library nei emawzat an awm bawk.
 

Baptist Kohhran Hmeichhe Pawl Tawngtai Ni: November ni 7 khi khawvel huap a Baptist Kohhran Hmeichhe Pawl Tawngtai Ni (BWA Women’s Day of Prayer) a ni a, Mizoramah pawh BKHP Unit tinah he hun hi hman tur ani. Zing dar 10 ah tanin tawngtai rual vawi 9 nei turin programme siam ani a, khawmualpui hrang hrang a hmeichhia te leh MBKHP, Bial leh Unit hruaitute leh Member zawng zawng te tan tawngtai tur ani ang

Pro.Pastor Exam mek

BCM hnuai a thawk lai Probationary Pastor te chuan vawiin, November 3 hian Annual Exam an nei.

 

Tun tumah hian Pro.Pastor 1st Year atangin  mi 5 in an Exam a, 2nd Year ah mi 8 in an Exam bawk. 3rd Year ho erawh chu Project Writing pek an ni a, mi 5 an awm. Heng 3rd Year ho te hi an Passed a nih chuan Assembly 2012 ah nemngheh an ni ang.

MTKP Organiser – Kathmandu-ah

Rev.Samuel Lalremsanga Organiser leh Pu R.Lalrochama Assistant Secretary MTKP te chu November Ni 3 atanga ni 6 chhung a Kathmandu, Nepal-a  Asia Pacific Baptist Youth Federation Leadership Conference hmangin an kal a, karleh thawhtanni-ah an lo let leh ang.

 

APBYF hi Asia ram puma Baptist Thalai inzawmkhawm a ni a, ram 20 zet atangin Baptist Convention / Association engemawzat an tel a ni.  September 4th – 8th, 2012 khian Asia Pacific Baptist Congress vawi 8-na Kuala Lumpur, Malaysia-ah neih a ni dawn a. Mizoram Baptist Kohhran atang pawhin zaipawl tirh tum a ni a. Kohhran hruaitu engemawzat bakah mahni sensova kal tum engemawzat an awm a ni.

ABC Inkhawmpui tiak ta

BCM Rorelna sangber dawttu Area Baptist Council a rual hmun 13-a hman  chu tunkar liam ta  Pathianni hmang khan zawh fel ani.

 

ABC hrang hrang te thurel langsar zingah Assembly 2012 a thlen tur engemawzat ngaihtuah zingah hente hi thu langsar zualte an ni:-

1)      Baptist Higher Secondary School tan BCM-in Bus lei rawh .

2)      BCM Assembly leh thildang a hman tur Hall lian tak Lungleiah buatsaih rawh se.

3)      BCM hian Kan ram India leh Mizoram tan tawngtai khaidiat buatsaih rawh se.

4)      Sual dona kan tih hi chhunzawm zel ni rawh se.

5)      Corruption hluar lutuk tireh turin Assembly-in hma lak ni rawh se.

6)      Mizo tawnga Bible zirna Assembly-in a siam turah hian Missionary training-na hmun siam tel ve ni rawh se.

BCM Building, leh Pastor Qtrs Chawngteah hawn ani.

Rev. Dr Raltawnga Chhakchhuak chuan tunkar liamta Oct. 14 khan Chawngte a BCM Building thar a hawng. BCM Property Committee in Rs nuai sawm

senga an sak BCM building thar hawnna Inkhawm hi Pu Victor Lalrinawma, BCM Property Manager-in kaihruaiin, Rev. R Lalrintluanga, Mission Co-Ordination in Technical Report a pe a. Rev. H Lianngaia General Secretary chuan thuchahtawi a sawi a, RM Chakma Ex-CEM CADC pawhin thu a sawi bawk.

He Building hi feet 84 a sei a vang lam ft.12 niin pindan 7 a then a ni a, pindan tin hi dawr a tan luah tir a ni, kaw khat hi Mission Dept in Damdawi dawr a tan an luah a, thlakhatah dawr luah man hi a vaiin Rs 24000 a ni, he building hi Kamalanagar bazar lunlai a awm a ni a, nakin zel a tan pawh BCM sum hnar thatak a la nih zel a beisei awm hle.

October 14 vek khan Chawngte Pastor Quarters thar chu Rev H Lianngaia, General Secretary chuan a hawng a. He hun hi Rev. H. Lalremtluanga Chawngte Bialtu in a kaihruai a, Upa Lalthansanga Secretary Chawngte Pastor Bial in report pein, Rev Dr Raltawnga’n thuchahtawi a sawi bawk.

Seminar on Worship and Music

Kar hmasa, October 15, 2011 (Inrinni) khan Lunglei Chanmari Biak inah Worship & Music Seminar hlawhtling taka buatsaih a ni.

He Seminar hi BCM Worship & Music Department buatsaih niin hemi ni hian Lunglei khawpui chhung Pastor bial 10 atangin Upa leh Rawngbawltu 260 vel an tel a ni. He Seminar-ah hian thupui pathum zirho a ni a. Chungte chu ‘Pathian chibai buk dan tha’, ‘Pathian chibai buknaa Music Pawimawhna’ tih leh ‘Worship-a kan tih dan tha leh tha lote’ tih a ni a. Resource person-ah Rev.R. Lalbiakliana, Pu Moses Lalrohlua Sailo leh Upa C. Hrangdula te hman an ni.

Capacity Building (SALT II) training on Animal rearing neih ani.

Dt 20-21 October 2011 chhung hian BCM Relief and Development buatsaihin Ranvulh lam training, R & D Hall, Ramzotlang, Serkawnah neih ani. 

He training ah hian Ar vulh, Sazupui vulh, leh Vawk vulh thatna leh a vulh dante, an tan a chaw tha leh a pek dante i zirtirna neih ani bawk. R&D chuan he training hi Simple Agro-Livestock Land Technology (SALT II) tiin a hming an vuah a. SALT II hian atum ber chu Mizorama ran vulh leh a chaw ngaihtuah kawnga mipuite zirtirna leh tanpuina pek ani.

He training hi Baptist World Aid Australia (BWAA) lamin an rawn sponsor ani a. A rawn sponsor tute pawh hi November thla chhung hian ni 12 chamin lokal a hma lak ho tawhna leh a kal lai mekte, kal zel dan turte thlir hona hun an rawn hmang dawn ani.

Ralvawngah General Secretary

Ralvawng Kohhran chuan naktuk, Octoboer 21-23, 2011 hian an Kohhran Centenary lawmna leh Biak in an hawng dawn a. He hun hmanpui hian General Secretary, Rev.H.Lianngaia leh AGS i/c Service, Rev.C. Ngurhnema te an kal ang.

General Secretary, Rev. H. LIanngaia’n Centenary Monument a hawng ang a; Rev. C. Ngurhnema, AGS-in Biak in a hawng thung dawn a ni. Ralvanwg Kohhran Centenary thupui atan ‘Hei leh chen hi Lalpa’n min awmpui’ tih a ni ang. He Centenary lawmpui tur hian an khaw chhuak, hmun danga awm tawh zawng zawngte an sawm a ni.

Office fai ber lawmman dawng

Faina Hapta, 2011 denchhena Office fai thlannaah BCM headquarters Office chuan Lunglei khawpui chhunga Kohhran leh NGO Office fai ber lawmman a

BCM Main Office ground floor
BCM Main Office ground floor

dawng leh ta. Office Fai ber lawmman hian thuziak bakah pawisa fai Rs.2,000 a keng tel. Faina hapta denchhena Office fai thlannaah tun hma pawhin vawi eng emaw zat BCM Office hian fai ber nihna a lo hauh tawh thin a, nikum (2010) pawh khan he lawmman hlu tak hi a lo dawng tawh a ni.