Baptist House chungchang

Bible House, Khatla, Aizawl  tlahniam zel avanga Sorkar lam ruahmanna anga Building thiah mek a nih laiin a bul chiaha Baptist House pawh luah ngam a ni ta lova. Aizawl DC thupêk angin April 3, 2017 khan chhuahsan tan a ni. Aizawl Area TKP member ten hnatlang kovin Baptist house-a awm te thiar chhuah an ni. Rev. Dr. K. Lalrinthanga, Executive Secretary, Aizawl hova thukhâwm chuan he Building-a chengte lo awm lailâwkna tûr ruahman felin hma an la a, a remchan dan ang angina Baptist Centre bakah Biak In Hall ruak remchang te dapin luah tir an ni.

Headquaters hotute pawhin hemi chungchangah hian a tul ang zela hma lain, nimin April 5, 2017 khan Administrative Working Committee, Emergency Meeting an nei a, Er. Pu Victor Lalrinawma, Property Manager, chu Building dinhmun enfiahin Aizawl-ah a phei bawk. Tukin khan General Secretary Rev. F. Ramdinmawia leh President Rev. H. Lianngaia te an phei veleh bawk a ni. Anni hian Aizawla BCM hruaitute nen hmalak zel dan tur te thlir hovin a tul angin Chief Minster leh Sorkar hotu te pawh hmuh an tum a ni.

He thilthleng vanduaithlak tak kan tawh chungchangah Aizawl khawpui chhunga kan Kohhran ten theihtawp chhuahin hma an la a, Aizawl City Coordination Committee ruahmanna angina TKP Unit hrang hrang ten thli tleh leh ruahpui sur hnuaiah hnatlang thawkin Baptist House luahtute leh Office bungrua te an thiarpui a. tha leh zung mai bakah sum leh pain mithahnemngaite leh Kohhran hoten an chhawmdawl bawk a, hemi chungchangah hian BCM hruaitute an lawm hle a. Tin, Sorkar lam hotute leh Khatla khawtlang mipui te, Local Council hruaitute leh YMA te ngihsakna an hmuhin lawmawm an ti hle a ni.

Posted in BCM News.

Leave a Reply

Your email address will not be published. Required fields are marked *