Bazarveng Kohhran, Lunglei-in Platinum Jubilee an lawm.

May 1 & 2, 2022, (Pathianni leh Thawhtanni) khan Bazarveng Kohhran, Lunglei chuan an Kohhran din kum 75-na (Platinum Jubilee) an lawm a. Jubilee Thupui atan I Samuela  7:12 “Hei leh chen hi Lalpan’n min pui” tih an hmang.

Jubillee lawmna hi kawng hrang hrang a hman a ni a, Jubille Dar vuak, Jubillee Lungphun, Jubille Cake Zai, Jubillee Hall Hawn leh Jubillee Inkhawm leh Ruai buatsaih te-in Jubillee lawmna hi neih a ni. Jubillee Hriatrengna Lungphun hi an Kohhran member Pastor Pension Rev. Vanlalhruaia’n a hawng a, Jubilee Hall hi Rev. Dr. C.L. Hminga’n a hawng thung a ni.

May ni 1 Pathianni, Jubilee Inkhawm ah Rev. Dr. R. Zolawma BCM President-in thuchah a sawi a, a tuk May 2, 2022-ah Jubilee lawmna ruai theh a ni.

BCM Bazar Veng hi Rahsiveng Kohhran atangin Dawrkai veng tih  hming puin May 1, 1947-ah din tan a ni a, a din tirh hian member 98 an ni a. April 10, 1949 ah Biak in hmasa ber hawn a ni a. Kohhran thang chho zelin tun dinhmun (2022)ah hian  Kohhran member pawh Permanent member 1715 leh Temporary member 125 vel an awm mek a. Headquarters-a an target pawh kum khat atan Cheng Nuai 172 leh Singnga (172,50,000) lai a lo tling ta a ni.