BCM Assembly karleh Nilaini atangin tan a ni dawn ta

BCM Rahsiveng

Mizoram Baptist Kohhran Rorelna sang ber – BCM Assembly vawi 124-na chu karleh March 4-8 khian BCM Biak In, Rahsiveng-ah neih a ni dawn a, kumin Assembly Thupui atan hian “Din thar lehna” tih hman a ni ang.  Assembly atana inpuahchahna leh inbuatsaihna hrang hrang a kal chho mek a – A dawltu, Kohhran leh Office te pawh an inpeih chhuak thawkhat ta.

March 4 (Nilaini) hi thlenkim Ni niin  Registration tih nan chhun lam hun hman a ni ang a, Zan-ah Palai lawmna Inkhawm leh Assembly hawnna hun hman a ni ang. A tuk, March ni 5 atanga ni 7, (Ningani atanga Inrinni) thlengin chhun lamah Rorel Inkhawm neih thin a ni ang a, Assembly Rorel hi BCM President thar Rev. Dr. K. Lalrinthanga’n a kaihruai ang. Assembly chhungin zantin Pathian Biak Inkhawm neih thin a ni ang a, Pathiani zing Inkhawm-ah Pastor 6 ordain an ni ang a, Pathianni chawhnu-ah Lalpa Zanriah kilhovin Pathianni zan Inkhawm banah Assembly an tiak ang.

Assembly 2020 atan hian Organising Committee bak ah Sub-Committee 12 din a ni a. Inbuatsaihna hrang hrang zo thawkhatin tunkar Ningani khan Headquarters lam atangin Administrative Officer, Office Suprerintendent leh thawktu dang ten an inbuatsaihna kal mek te a hmunah an thlir ho a ni.

Assembly dawltute hian Assembly Palai lo kal zawng zawngte a hmasa bera Reception Counter lama in report turin an beisei a, thlen In tur ruahman lawk vek a nih avangin riak lut ngeia Inkhawmpui rawn hmang turin an ngen a ni. Tin, Lirthei keng te tan Parking na hmun awl an neih tam loh avangin Inkhawmpui Palai leh Kohhran mipui a chhimtu  te chu Driver te in thlah leh in hruaitir mai ṭhin turin an ngen bawk.

Download : Assembly 2020 Programme