BCM-in Charity Programme kalpui dawn

Assembly 2018-in a rel angin BCM Charity Program chu kalpui tan tura inbuatsaih chhoh mêk a ni a. A pawimawhzia hriain hemi atâna charity fund (Sum) tuakna tûrah pawh kan General Secretary leh AGS-te bâkah kan Mizo Celebrities Nl. Pensy B. Lalthangliani, Nl.Bethsy Larinsangi, Tv. Jeje Lalpekhlua, Pu. Lalrindika Ralte (Didika) te pawhin theihtâwp an chhuah mek a ni. A hnuaia mi ang hian ruahmanna pawh siam a ni a, BCM Relief & Development Department chuan  tanpui ngaite tâna rawngbâwlnaah hian Kohhran hote, Chhungkua leh mimal a thei apiang tel tûrin  a sâwm a ni. Tha thawha kan tel thei lo a nih pawhin thilpêk hmangin Department office-ah emaw BCM Charity Fund. SBI  Ac no. 37736797255 ah hian thilpêk a pek theih nghal a ni.

BCM Charity Programme: 

Mathaia 25: 35: Tihtakmeuhin ka hrilh a che u, hêng ka unau tê berte zinga mi pakhat chunga in tih chu ka chunga ti in ni’.

A nihna :

BCM Charity  hi Relief & Development,  Baptist Church of Mizoram enkawlna hnuaia mi harsate leh tanpui ngaite tanpuina tur Program a ni.

Din duhna chhan:

BCM Relief&Development Department hian khuarêl chhiatna leh mihring siam chawp chhiatna (Chênna In kâng angte) tuar hnênah chhawmdâwlna a pe thîn a. A tangkai êm êm lai hian a huam chin hi a zîm deuh hlek nia hriatna a awm a. Kohhran chhûngkuaa natna khirhkhân tuar, eizawnna mumal nei lo te,  Ramtuileilo a khawsa, enkawltu nei mumal lo tanpui ngai kohhran leh khawtlângin theihtâwpa an lo buaipui hi khaw hrang hrangah an awm fo thîn a, Bialtu Pastor leh Tualchhûng kohhran hruaitute atanga tanpui dîlsakna pawh Department hian a dawng fo mai. Amaherawh chu, kan tanpui theihna dânin min phal chin pâwn lam a nih avângin a buaithlâk hle thîn. Tin, Khuarêl chhiatna tam tham deuh a lo thlen hian kan Relief Budget neihsa hi a beitham thin hle mai a, pawnlam atanga tanpuina a remchan tum a nih loh phei chuan a mangan thlak thin viau mai. BCM Charity Fund hi kan siam thei a nih chuan, hemi a  tanpuina sum lo lut te hi Mi harsa zual tanpui ngai kan sawi tak te tanpuina leh chhawmdawlna atan te, khuarel chhiatna alo thlen a, tanpuina kan budget neihsa in a daihloh chang a phuhru tu atan kan hmang thei anga, kan harsatna tamtak a sut kian theih ngei kan  beisei a ni.

A tih tûrte:

  1. Sum tuak:
  • Mi inpe, tanpui ngaite tâna inphal zawng chhuakin hêng atang hian tanpuina lâkkhâwm hna a   thawk thîn ang.
  • A tul leh remchân dâna zirin tanpui ngaite pual Special Program a buatsaih thei ang.
  • Tualchhûng kohhranah a tûl dâna zirin BCM Finance Rules pawm chin angin tanpuina a dîl thîn ang.
  • Tualchhûng kohhranah awareness campaign a nei thîn ang.
  1. Tanpui duhtuten awlsam zâwka an dah theih nân BCM Charity Fund Account a hawng ang. Relief & Development Dept. chu Account vawngtu a ni ang.
  2. BCM Charity Fund hian a tûl dân leh tanpuina tur fund a neih dâna zirin chhawmdâwlna a pe thîn ang.
  3. Department lamin Committee remtihnain, Tualchhûng kohhran, Bialtu Pastor te kaltlangin tanpui ngaite zawn chhuah leh tanpuina pêk hna a thawk thîn ang.
  4. BCM Department dang Audio Visual lam te, a remchân dân angin a thawhpui ang.
  5. Media lamah a theih anga zauvin a puangzâr ang.
  6. Tanpuina hi a tul hmanhmawh dâna zir leh fund awm dân thlîrin pêk thin a ni ang a, tanpuina tûr zât pawh Committee-in a ngaihtuah ang.

 

Tanpuina dawng thei tûrte:

  1. Chhûngkua, eizawnna mumal nei lo, hrisel lohna avânga natna khirhkhân/benvawn Inah emaw Hospital-a enkawl reng ngai te.
  2. Chhûngkua, Pianphung leh rilru lama mi phâk lo enkawl lai nei, eizawnna mumal nei lo te.
  3. Khuarêl chhiatna avânga In leh Lo chân, tanpui ngaite.
  4. Rehabilitation centre leh Orphanage te (Special Occasions-ah)

 

Posted in BCM News.