BCM Chhipphirin kuminah a vawi 9 nan Pathian an chawimawi

Chhipphir khua

BCM Chhipphir chu Missionary Day 2020 Programme atang khan an Kohhranah Hlimna boruak la kal zelin Kohhran zaikhawm an la chhungzawm zel a, hemi boruak avanga mi inphalte thilpek tlingkhawm hmangin awmni khama Pathian fak leh Chawimawina hun an hmang chho mek zel a. Tun tum hi ruai buatsaiha awmni kham vawi 9-na a ni.

He Programme hi tunkar nilai zan atang khan hmang tanin, March 13, zirtawpni tlaiah Tawngtai Bethel neiin, naktuk, Inrinni chawhma-ah Pathian Chawimawi Inkhawm an nei ang a, Inkhawm hi Rbt. C. Lalramchhuanga’n kaihruaiin Bialtu Pastor charge la lai Rev. David Lalmalsawma’n thuchah a sawi ang. Chawhnu lamah zaikhawm programme siamin Pi C. Lalchhani’n Zaikhawm a kaihruai ang a, tlaiah Pathian Chawimawina ruai an kilho ang.

He Chawimawi Programme hi Pathianni zan thleng ruahman a ni a, Pathianni zing leh zanah te Inkhawm awmin zan lam Inkhawm ban leh Pathianni chawhnu-ah te zaikhawm Programme a la awm zel dawn a ni.

BCM Chhipphir-ah hian Kohhran chhungkua 91 awmin member 441 an awm mek a ni. He Chawimawi Programme-ah hian khawchhung Kohhran hrang hrangte bakah an bial chhunga Kohhran hrang hrang te an sawm a ni.