BCM Headquarters Compound-ah AMFU Welfare Foundation bultumin thing tiak phun a ni.

Vawiin, September 1, 2021 khan AMFU Welfare Foundation Chairman leh Director ni bawk Pu Joseph H. Thanzuala’n BCM Headquarters-a  Paulownia thing (Mizovin Thing hlu ti-a hming kan phuah) a pek chu BCM General Secretary Rev. F. Ramdinmawian a phun.

BCM Headquarters Compound-a thingphunna hun tawi BCM Office kawta neihah BCM General Secretary chuan thu tawi sawiin, hetianga Mizoram boruak tha siamna tura AMFU Welfare Foundation ten hmalakna bul tan nana BCM a hmang chu lawmawm a tih thu sawiin mitinin boruak tha leh ram humhimna a tan a thing phun uar turin a chah a ni.

He hunah hian AMFU Welfare Foundation Director leh Chairman ni bawk Pu Joseph H. Thanzuala pawhin thing tha phun tam a ngaih thu leh ram intodelh nana ramhmul damdawi chin uar  a pawimawh thu a sawi bawk.

BCM Office Compound-a thing tiak an phun zawh hian, Baptist Higher Secondary School Compound lamah AWF te hian thing tiak engemawzat an pek chu Principal Pu R. Zosangliana hovin an phun nghal bawk a ni.

Paulownia thing hi kum zabi 3-na lai atangin China ramah chuan an lo hmang takai tawh a. Kum zabi 17-18 velah Europe ramah lakluh niin khawvel ram hrang hrangah an ching chho ta zel ni-a ngaih a ni. Thing hlu leh tangkai tak niin, a hnah, a par, a rah leh a kung te hi hman tangkai theih vek a ni a.

A hnah hian chaw tha a pai tam em em a, Ran chaw leh damdawi hrang hrangah hman a ni. A par a mawiin a rimtui hle a a, Khuai khawi leh sava tinrengin an tlan a, Damdawi leh Cosmetic siam nan an hmang bawk. Thing ian duh leh thang duh tak a ni a, phun atanga kum 7-8-ah zai tlakin a puitling thei a, Kung puitling pakhatin thingzai cubic 35 a chhuak thei a ni. A thing ti a mawiin Furniture leh Ornaments siamna hmanruaah te hman a ni bawk.

Hetiang taka thing tangkai leh hlu a nih avang hian Mizoramah chuan ‘Thing Hlu’ tiin a hming vuah a ni.