BCM-in Black Day zawm ve dawn

Black day poster 2014Mizoram Baptist Kohhran, General Secretary thuchhuah-in a tarlan danin August 10, 2014(Pathianni) hian National Council of Churches in North India(NCCI) chuan India Constitution-ah Christian te chu Scheduled Caste-a dah ve phutin India ram pumah Black Day hman ni se a ti a. Mizoram Baptist Kohhran pawh NCCI member a nih angin he Black Day hi a zawm ve dawn a, Mizoram Baptist Kohhran member zawng zawng ten lo zawm ve turin a chah a ni.  Hetiang hian General Secretary chuan thuchhuah a siam:-

KOHHRAN MITE HRIATTIRNA:  BLACK DAY HMAN TUR THU:

India Constitution-ah kum 1950 khan “Scheduled Caste-te chu Hindu an nih lohchuan Scheduled Caste an ni thei lovang” tiin Aug.10th 1950 khan President-in hming a signed a. Kum 1956-ah siam tha lehin Sikh leh Budist-te chu a huam leh ta a. Scheduled Caste nihna hian Tribal nih hlawkna engemaw zat a keng tel a ni. Hei hi Hindu, Sikh leh Budist-te chauh Scheduled Caste an ni thei tihna a ni.Sakhawdang a bikin Muslim leh Kristiante chu Scheduled Caste an ni thei lo tihna a ni.

He Dan hi thleibik Dan a nih avangin Kristiante tan a huatthlala hle a. Hnam hnuaihnung zawk Dalit-te tan Kristiana inpek harsatna siamtu lian tak a ni. He Dan hi siam tha turin nasa taka beih a ni tawh thin a, vawiin thleng hian sawtna hmuh tur a la awm lo a ni. Hei hian India ram chhunga kan Mission pawh a khawih thei a, tin India Danpui(Secularism) zahlohna pawh a ni abawk Chuvangin he Dan hi Kristiante tan chuan Dan huatthlala tak a ni.

Chuvangin he thil duh lohna entir nan hian vawiin Augast 10th 2014 hi National Council of Churches in India (NCCI) chuan Black Day-ah hman turin a lo puang ta a ni. Kei ni pawh NCCI member kan nih avangin vawiin hi he Dan kan duh loh entir nan member tinin Puan Them Dum bel tur a ni e. Tin Pathian Ni zing inkhawmah he mi pual hian Tawngtaina hman theuh tur a ni e. Puan them dum hi mahni Tualchhung Kohhranin ngaihtuah theuh tur a ni ang.

Sd/- Rev.H.Lianngaia
General Secretary,
Baptist Church of Mizoram

(Related Link): Black Day to protest injustice towards Dalit Christians

Posted in BCM News.

admin