BCM R&D tirh-a Andra Pradesh-a Nurse zir tur mi 7 lak an ni.

September 1, 2021 (Ningani) chawhma dar 10:30 khan Mizoram Baptist Kohhran, Relief & Development Department Committee Meeting, Sap upa leh Pu Buanga Hall, Serkawn-ah neih a ni a. Meeting ah hian Christian Medical Centre, Pithapuram, Andra Pradesh-a R&D tirh-a General Nursing & Midwifery (GNM) zir dil mi 7 te chu an vaiin lak an ni.  Anni bakah hian BCM-in seat 20 a neih te hnawhkhat tura dil an awm chuan lak zel ni se tiin thu an dah bawk.

GNM zir tura an lak tharte chu..
1. C. Lalremruati, Champhai(Venglai),
2. Lalbiakzuali, Kawrtethawveng,
3. Lalchhanchhuahi, West Phaileng,
4.Laltanpuii, Lallen, Mamit,
5.Elizabeth Malsawmsangi, Mualthuam North,
6.Lalnuntluangi, Rualalung
7.Rebek Lalropuii, Chwngte te an ni.

Meeting ah hian Secretary, Rev. R. Lalbiakliana, AGS (Service)-in Relief & Development hmalakna report tlangpui a pe a. AGS Report-in a tarlan danin Myanmar atanga ral tlan  mi 1632 hnenah Relief sum cheng 76,760/- pek a nih thu te, Kangmei Tuar khaw panga hnenah cheng 3,000 theuh tanpuina YMA te hnenah pek a nih thu te, Bungtlang ‘S’ khuaa In kang tuar chungkaw 14 hnenah cheng 3000 theuh pek an nih thu te, IPED Project hnuaiah Kolasib District-a khaw 15-ah Relief leh Covid hri laka invena hman rua  Face Mask leh Hand Sanitizer engemawzat sem a nih thu te, Lunglei khawpui chhung leh khaw pawn 4C  panga (5)-ah tanpuina cheng 10,000/- theuh pek an nih thu te a tarlang a. March thla chhungin Khaw hrang hrang panga-a Farmers Club te hnenah thlaichi sem a nih thu te, Zawlnuam Biak In kang tanpui nan BCM R&D hmingin cheng 10,000/- pek a nih thu te, Tailoring Graduation Day hman a nih thu leh Puanthui zir chhuak mi 15 te hnenah Certificate leh khawl hlan an nih thu a tarlang bawk.

Meeting-ah hian Youth Skill Training hnuaia Puanthui zir dil mi 20 te chungchang ngaihtuah a ni a. Hrileng avangin Puanthui zir dil te Interview neih theih a ni lo va. Heng mi 20 te chungchang hi chu Deparment lamin a tul leh tha an tih angin lo bawhzui mai se an ti.

Transformed Aid International (TAI) leh Canadian Baptist Ministry (CBM) atanga Migrants Support Relief atana Rs. 1,074,172.7, Clothing, Food, Shelter & Psycho-Social Support atana hman tur lo thleng sem chhuah dan tur ngaihtuah a ni a, Relief & Development Office hotu ten ruahmanna lo siam se tih a ni.