BEIRUAL TAN TA

Mizoram Baptist Kohhran chuan kum tina a lo tih thin angin Nizan (September 1, 2011) atang khan Beirual thuzir a tan ta.

Beirual
Beirual

Kuminah hian SIAM THAR LEHNA tih thu zir a ni dawn a, Mi hrang hrang ziak tir an ni. He thupui hnuaiah hian Siam thar lehna awmzia atanga tanin Mimal nun siam thar lehna, Chhungkaw siam thar lehna, Khawtlang nun siam thar lehna, Ram leh hnam siam thar lehna, BCM leh a rawngbawlna leh Mission rawngbawlna chungchang te kan zir dawn a ni. Zirlai pakhatna tih loh a dang zawngah chuan sawiho tur dah zel a ni a. Sawiho tur pawh sawiho chakawm tak tak hlir an ni. Tun hnai kum 2000 leh a hnu lama BCM in Beirual thuzira kan lo zir tawhte chu-
2000 Dinthar lehna
2001 Inthawina nung
2002 Thlarau Thianghlim
2003 Isua Krista Chatuanin, Amen !
2004 Isua Krista khawvel mamawh
2005 Harhna
2006 Mission
2007 Tawngtaina
2008 Pathian Chibai buk
2009 Thilp>k Rawngbawlna
2010 Kohhran
2011 Siam thar lehna

BCM-in Beirual kan hman tan dan

Kum 1918 March thla khan Champhai Hmunhmeltha khua, In 40 vel awmnaah chhim leh hmar infinin Inkhawmpui (Presbytery) an nei a. Palai 1700 zet an kal a; chhim lam atangin Baptist Kohhran aiawhin Sap upa leh Pastor Rohmingliana an tel ve a. Chutih lai chuan Mizoram pumah kristian 12,000 an awm tawh a; ringlo ho chu 10 theuha an inkim a ni. Chuvangin kum tin ringlo pakhat theuh kristianah siam ila, chu mi hunah chuan kan bei rual ang a; ring loho chu hneh vek i tum ang u, tiin Beirual hi an rawt chhuak a.

Mizoram Baptist Kohhran chuan kum 1926 Presbytery-ah Beirual hi neih a rel a, 1927 January atangin beirual hi kan nei tan niin, Rev.V.L.Zawnga chuan a sawi a. A tirah chuan January thlaah neih a ni thin a, mahse khua a vawh thin em avangin September thlaah an sawn a; tun thlengin hei hi kalpui a ni ta zel a ni.

Beirual hi thla khat chhung neih a ni thin a. Thla chanve chhung chu tawngtai nan hman a ni a. Zanriah eikham veleh dar an vua a, tawngtai turin Biak inah an kalkhawm thin a, ina lo awmte pawh inah an tawngtai thin a; chutianga thla chanve an kalkhawm hnuin thla chawhnu lamah an feh chhuak thin a. Zanriah eikham veleh dar an vaw leh a; mualah an kalkhawm thin a, lenna tur insemin in tinah Pathian thuhril turin an insem a, pakhat tal Krista hnena hruai tumin an bei a. Hun an hman zawhah tin mai lovin, mahni hmun theuh atangin mual an pankhawm leh a, tawngtaihona neiin an tin thin a ni.

Hun a lo kal zel a, Mizoram chu Kristian vek kan lo nih tak avangin hetianga tih reng hi a tul ta lo va, tunah chuan Kristian nun inzirtirna hun atan hmangin thla chawhma lam ni 15 chhung chu Thuzir nan hman a ni a; Kohhran tinin Headquarter atanga thuzir tur an buatsaih chu Biak inah a huhovin zir thin a ni a; thla chawhnu lam chu Tualchhung Kohhranin anmahni tha tih dan berin an hmang thin a; Camping leh Crusade nante hman a ni deuh ber.