Beirual thla kan thleng dawn ta

Thla chawhma lam September 1 – 20 chhung hian Tualchhung Kohhran hrang hrangin anmahni remchan dan angin – Crusade/Camping/ House Fellowship/House Church leh Home Visit Programme te an hmang leh dawn a ni. Kumin Beirual Thupuiah  “Pathian thu tak” tih thu mi hrang hrang ziak zir a ni ang.

 

Beirual thuzir Programme leh thupui

Date : Days : Zirlai Zirlai Thupui leh Ziaktu
21. Inrinni zan : Zirlai 1-na Pathian Thutak (Rev. R. Thanmawia)
22. Pathianni zing Sermon
23. Pathianni za: Zirlai 2-na Pathian Thutak – Thianghlimna(Rev. R. Thanmawia)
23.  Thawhtan zan: Zirlai 3-na Pathian Thutak – Nun kawng Entu leh Hruaitu(Rev. R. Lalnunzira)
24. Thawhleh zan: Zirlai 4-na Pathian Thutak – Khawvel Mamawh (Rev. R. Lalnunzira)
25. Nilai zan: Zirlai 5-na Pathian Thutak – Chhungkaw Mamawh (Rev. VL. Nithanga)
26. Ninga zan: Zirlai 6-na Pathian Thutak – Ram leh hnam, khawtlang mamawh (Rev. VL. Nithanga)
27. Zirtawp zan: Zirlai 7-na Pathian Thutak – Kohhran mamawh (Rev. Dr. Lalzarliana)
28. Inrinni zan: Zirlai 8-na Pathian Thutak – Mi tin mamawh ( Rev. Dr.Lalzarliana).
29. Pathianni zing:  Sermon
30. Pathianni zan: Zirlai 9-na Pathian Thutak – Thilsiam dangte mamawh ( Rev. Vanlalmuankima)
30. Thawhtan zan: Zirlai 10-na  Pathian Thutak – Boral mekte tan (Rev. Vanlalmuankima)

BEIRUAL HMAN TAN DAN 

Kum 1918 March thla khan Champhai Hmunhmeltha khua, In 40 vel awmnaah chhim leh hmar infinin Inkhawmpui (Presbytery) an nei a. Palai 1700 zet an kal a; chhim lam atangin Baptist Kohhran aiawhin Sap Upa leh Pastor Rohmingliana an tel ve a. Chutih lai chuan Mizoram pumah kristian 12,000 an awm tawh a; ring lo ho chu 10 theuha an inkim a ni. Chuvangin kum tin ring lo pakhat theuh kristianah siam ila, chumi hunah chuan kan bei rual a; ring lo ho chu hneh vek i tum ang u, tiin Beirual hi an rawt chhuak a.

Mizoram Baptist Kohhran chuan kum 1926 Presbytery-ah Beirual hi neih a rel a, 1927 January atangin beirual hi kan nei tan niin, Rev.V.L. Zawnga chuan a sawi a. A tirah chuan January thlaah neih a ni thin a, mahse khua a vawh thin em avangin September thlaah an  sawn a; tun thlengin hei hi kalpui a ni ta zel a ni.

Beirual  hi thla khat chhung neih a ni thin a. Thla chanve chhung chu tawngtai nan hman a ni a. Zanriah ei kham veleh dar an vua a, tawngtai turin Biak inah an kalkhawm thin a, ina lo awmte pawh inah an tawngtai thin a; chutianga thla chanve an kalkhawm hnuin thla chawhnu lamah an feh chhuak thin a. Zanriah ei kham veleh dar an vaw leh a; mualah an kalkhawm thin a, lenna tur insemin in tinah Pathian thuhril turin an insem a, pakhat tal Krista hnena hruai tumin an bei a. Hun an hman zawhah tin mai lovin, mahni hmun theuh atangin mual an pankhawm leh a, tawngtaihona neiin an tin thin a ni.

Hun a lo kal zel a, Mizoram chu Kristian vek kan lo nih tak avangin hetianga tih reng hi a tul ta lo va. Thuzir tur buatsaihin kristian nun inzirtirna hun atan hman a ni thin a. Hun rei tak chu thla chawhma lam ni 15 chhung chu Thuzir nan hman a ni a; Kohhran tinin Headquarter atanga thuzir tur an buatsaih chu Biak inah a huhovin zir thin a ni a; thla chawhnu lam chu Tualchhung Kohhranin anmahni tha tihdan berin an hmang thin a; Camping leh Crusade nante hman a ni deuh ber. Kum 2014 atang khan thuzir dan pawh tidanglam lehin September thla pum chu Beirual thla atan hmang thovin hun hmasa lamah tualchhung kohhranin anmahni tha tih angin programme an siam a. September ni 21-30 chhung, zirlai 10 thu zir tur buatsaihin biak inah a huhovin zir a ni thin.

Src: BCM Handbook-2010

Posted in BCM News.

admin