Beirual thla kan thleng ta.!

Mizoram Kohhran hrang hrang ten September thla hi ‘Beirual Thla’ atan kan hmang thin a. Mizoram Baptist Kohhran pawhin kum kum danga a lo hman thin angin  September 1 atang hian Beirual Programme an hmang tan dawn ta a. Kum danga kan tih thin dan ang bawkin Beirual thuzir hi thla chawhnu lam, September 21 atanga zir tan turin buatsaih a ni a. Thla chawhma lam September 1 – 20 chhung hian Tualchhung Kohhran hrang hrangin anmahni remchan dan angin – Crusade/Camping/ House Fellowship/House Church leh Home Visit Programme te an hmang leh dawn a ni. Kumin Beirual Thupuiah  “Tûn lai khawvêla Kristiante hmachhawn” tih thu mi hrang hrang ziak zir a ni ang.

Beirual thuzir Programme leh thupui

Date&Days Zirlai Thupui leh Ziaktu
21 Ningani zan 1-na Kristianna leh Inkhawm ngaihpawimawh
– Rev.Lalthangliana Hnamte
22 Zirtawpni zan 2-na Kristianna leh Inthenawm khawvênna
-Rev. R. Zohmingliana
23 Inrinni zan 3-na Kristianna leh Hrisêlna
– Upa Dr. B. laldinliana
24 Pathianni zing Sermon Pathian Thu hmanga Khawvêl hmachhawn
24 Pathianni zan 4-na Kristianna leh Rêlbawlna tha(management)
-Rev. Lalramngheta Chhangte
25 Thawhtanni zan 5-na Kristianna leh Sawrkâr Dân zawm
– Upa A.K. Zama
26 Thawhlehni zan 6-na Kristianna leh Ruihhlo
-Rev. K. Lalnunsanga
27 Nilaini zan 7-na Kristianna leh Sakawlh
-Rev. C. Lalbiakzama
28 Ningani zan 8-na Kristianna leh Electronic Media
– C. Lalhmachhuana
29 Zirtawpni zan 9-na Kristianna leh Neih in ang inneih
– Rev. Lalhmingchhuanga Jongte
30 Inrinni zan 10-na Kristianna leh Yoga
– Rev. Dr. Rodinmawia ralte

Download :Beirual Thuzir Bu 2017

 

BEIRUAL HMAN TAN DAN 

Kum 1918 March thla khan Champhai Hmunhmeltha khua, In 40 vel awmnaah chhim leh hmar infinin Inkhawmpui (Presbytery) an nei a. Palai 1700 zet an kal a; chhim lam atangin Baptist Kohhran aiawhin Sap Upa leh Pastor Rohmingliana an tel ve a. Chutih lai chuan Mizoram pumah kristian 12,000 an awm tawh a; ring loho chu 10 theuha an inkim a ni. Chuvangin kum tin ring lo pakhat theuh kristianah siam ila, chumi hunah chuan kan bei rual a; ring loho chu hneh vek i tum ang u, tiin Beirual hi an rawt chhuak a.

Mizoram Baptist Kohhran chuan kum 1926 Presbytery-ah Beirual hi neih a rel a, 1927 January atangin beirual hi kan nei tan niin, Rev.V.L. Zawnga chuan a sawi a. A tirah chuan January thlaah neih a ni thin a, mahse khua a vawh thin em avangin September thlaah an  sawn a; tun thlengin hei hi kalpui a ni ta zel a ni.

Beirual  hi thla khat chhung neih a ni thin a. Thla chanve chhung chu tawngtai nan hman a ni a. Zanriah ei kham veleh dar an vua a, tawngtai turin Biak inah an kalkhawm thin a, ina lo awmte pawh inah an tawngtai thin a; chutianga thla chanve an kalkhawm hnuin thla chawhnu lamah an feh chhuak thin a. Zanriah ei kham veleh dar an vaw leh a; mualah an kalkhawm thin a, lenna tur insemin in tinah Pathian thuhril turin an insem a, pakhat tal Krista hnena hruai tumin an bei a. Hun an hman zawhah tin mai lovin, mahni hmun theuh atangin mual an pankhawm leh a, tawngtaihona neiin an tin thin a ni.

Hun a lo kal zel a, Mizoram chu Kristian vek kan lo nih tak avangin hetianga tih reng hi a tul ta lo va. Thuzir tur buatsaihin kristian nun inzirtirna hun atan hman a ni thin a. Hun rei tak chu thla chawhma lam ni 15 chhung chu Thuzir nan hman a ni a; Kohhran tinin Headquarter atanga thuzir tur an buatsaih chu Biak inah a huhovin zir thin a ni a; thla chawhnu lam chu Tualchhung Kohhranin anmahni tha tihdan berin an hmang thin a; Camping leh Crusade nante hman a ni deuh ber. Kum 2014 atang khan thuzir dan pawh tidanglam lehin September thla pum chu Beirual thla atan hmang thovin hun hmasa lamah tualchhung kohhranin anmahni tha tih angin programme an siam a. September ni 21-30 chhung, zirlai 10 thu zir tur buatsaihin biak inah a huhovin zir a ni thin.

Src: BCM Handbook-2010

 

Posted in BCM News.

Leave a Reply

Your email address will not be published. Required fields are marked *