BHSS Junior Section-in Lockdown laia zirna kalpui zel dan tur ruahmanna an siam.

Baptist Higher Secondary School, Junior Section chuan Covid-19 avanga lockdown a nih chhungin ‘Google classroom’ hmangin zirna kalpui chhunzawm zel an tum thu leh hemi atan hian naupang nu leh pate puihna an sawm. Naupang fees pek dan tur chungchangah BCM Administrative Committee rawnin ruahmanna  a siam thar bawk.

School-in ruahmanna a siam-ah chuan Zirlai ten School an kal loh chhungin An zirtirtuten Google Class Room hmangin zirtirna an pe reng dawn a, Zirlaite pawhin assignment an neih te he Application hmang hian an thehlut thei dawn a ni.  School kal mumal loh chhung atan tution Fees pawh za-a sawmnga (50%) chauh lak a ni ang” an ti a.  Tution Fee hi pek hun pangngai (Mon, Wed & Fri) ah te School-ah an dawng thei reng a, tin, school-a kal kher ngai lova pek dan tur pawh ruahman mek a nih thu an tarlang.

School thu chhuah chuan Lockdown avanga eizawnna in harsatna a siam chhungkua te chuan Vice Principal hnenah harsatna te kimchang taka ziaka thlen turin an chah a, tin, zirlai Nu leh pa te, fate luhna school duhsak a, School-in harsatna a tawh tur hrethiam chunga, fee pek dan thin pangngaia fee pe duh tan pawh, a ngaia pek theih reng anih thu leh,  hetianga fee dawn te hi eizawnna lama harsatna nei zirlai nu leh pate tanpuina a nih tur thu a tarlang bawk.

Heng bakah hian Nu leh pate chu Naupang te School an kal theih loh chhungin an nungchang leh rilru lam hriselna ngai pawimawh turin a chah a.  Naupang thanlen zelnaa pawimawh em em ‘rilru lam hriselna’ a nih thu tarlangin, an thil tih thin tam tak engemaw chhung an ti thei lova, hemi avang hian harsatna an rilru lamah te an neih theih thu leh, hetiang harsatna hrang hrang awm thei laka naupangte kaihruai turin zirtirtu te kal tlangin school counsellor te a rawn theih dawn thu leh inthlahrung lo turin nu leh pate an chah nghal a ni.