Bible Sunday – December 5, 2021

December 5, 2021 (Pathian Ni) hi khawvel huapa Kristiante Ni Pawimawh “Bible Sunday” a ni a, Mizoram Baptist Kohhran pawhin he Ni hi urhsun takin a hmang thin a,  Headquarters atanga Programme siam angin Kohhran tinin hun hmangin, Pathian Thu hlutna leh pawimawhna te, Bible chanchin leh Pathian thu zirna Sunday School pawimawhna te inzirtir nan hman thin a ni

Kumin Bible Sunday-ah hian Pathianni zing leh Pathianni Zan atan thupui hran siam a ni a, Pathianni zing-ah “Pathian thu thiltihtheihna” (Hebrai 4: 12) tih niin Zan lam-ah “Pathian thu – Mi tin mamawh” (Luka 2:10) tih te chu zirho atan thlan chhuah a ni.

Mizoramah hian Bible Sunday hi Kohhran hrang hrang ah lungrual taka kan thawhhona Bible Society pualin kan hmang thin a. Hemi ni thawhlawm pawh hi Bible Society-ah thehluh a ni thin. Kohhran Pawl inthliarna awm lovin, hemi ni hian Kohhran Biak In tam takah Bible Society hruaitute feh chhuakin Bible Sunday chu Bible Society puala inkhawm nan leh chutiang lam hawia thuchah sawina hun atan hman thin a ni a, Bible avanga lawmthu kan sawina hun a nih rualin he rawngbawlna lam hawia infuih tharna atan Bible Society chawimawina Certificate leh lawmman hrang hrang inhlanna hun atan hman thin a ni bawk.