BKHP Day hman a ni.

May 2, 2022 Thawhtanni kha Baptist Kohhran Hmeiche Pawl (BKHP) din champhaphak vawi 84-na a ni a.  Kumin BKHP Day thupui chu “Inring rengin awm rawh u” (Marka 13:37)  tih a ni. BKHP Day hi Mizoram pumah BKHP te’n urhsun takin an hmang thin a, unit tinin tha an tih ang leh an remchan dan angin Inkhawm bakah intihhlimna te neiin vantlang tana thil tha tih nan te an hmang thin a ni.

BKHP Day hi Unit tinin programme siamin kawng hrang hrangin an lawm a. Unit tam takah awmni khamin nilengin intihhlimna leh Vantlang hna te thawkin hun an hmang a, Chhun lama hun hamng thei lo te pawhin zan lamah Inkhawm programme te siamin hun an hmang a ni. MBKHP hruaitu te pawh in Unit hrang hrang ah BKHP Day hi hmanpui in an fehchhuak a ni.

MBKHP President Pi Pc Lalvohbiki, Vice President Rbt H. Lalkimi leh Secretary Nl. Lalhmingmawii Chongthu te chuan Rahsiveng Unit-ah BKHP Day leh Platinum Jubilee an lawmna-ah telpuiin, Zan lamh President hian Serkawn Unit-ah hun a hmang leh bawk.

BKHP Chhipphir Unit chuan April 30 atang khan Unit Golden Jubilee lawmin, May 2 zanah BKHP Day Programme an hman zawm nghal a. MBKHP Assistant Secretary Pi V. Biaklawmi leh Executive Committee member te Rbt. F. Lalrochami leh Pi Pc  Roduhawmi te  kalin Platinum Jubilee leh BKHP Day an hmanpui a. Pi Lalnunzami Chawngthu Project Manager Chhawmdawlna In chuan Pathianni zing inkhawmah Chhawmdawlna In campaign neiin hun a hmang bawk.

BKHP Din tan dan:

BMS Missionary Pi Zirtîri (EM Chapman) hovin Asssembly hriatpuina leh kaihhruainain kum 1938 khân “Kristian Nu Pâwl” (GA – Girls Auxiliary) din a ni a. Sâp rama GA te thuvawn “Ka Lalpain ti tûra mi ruatsak apiang chu ti tûrin ka inpeih reng e” tih chu thuvawn atân an hmang nghâl a. GA hian Nula chauh a huap avângin kum 1947-ah Nu Pâwl din a lo ni ve leh ta a.

Nu pâwl leh Hmeichhe pâwl (GA) te chu pâwl khatah siam in 20th March 1965 khân Assembly hriatpuiin Baptist Kohhran Hmeichhe Pâwl (BKHP) ti a din a ni leh ta a. GA din atangin a kum zât pawh chhiar ni se ti-a Assembly in a rel angin 1938 chu BKHP din kum atan pawm a lo ni ta a ni.

BCM Statistics 2019-20-in a tarlan danin tunah hian BKHP member 36,489 an awm mek a ni..