BKHP Day leh BMP Day

 

Baptist Kohhran Hmeichhe Pawl(BKHP) leh Baptist Kohhran Mipa Pawl (BMP) te chuan an din champha phak lawmna programme hmang turin an inbuatsaih mek a. BKHP te hian tunkar inrinni (May 2, 2019) hian an hmang ang a, BMP te hian May 4, 2019(Irini) khian an an hmang thung ang.

BKHP Day – May 2, 2019(Ningani)

May 2, 2019(Ningani) hi Baptist Kohhran Hmeiche Pawl (BKHP) Day a ni a. Mizoram pumah BKHP ten urhsun takin an hmang dawn a ni. Kumin BKHP Day thupui atan “Rawngbawlna”.(Kolosa 3:24(b) tih hman a ni ang a. Headquarters atangin Thuchah chhiarchhuah tur buatsaih chu Unit tinah chhiarchhuah a ni ang a, Tawngtai rual thupui buatsaih sa hmangin tawngtairualna neih a ni ang. Hun hman dan tur (Detailed Programme) chu Unit tinin tha an tih angin an siam dawn a ni.

Tawngtairual thupui

1) Bial leh Unit BKHP Hruaitute tan
2) BKHP Member zawng zawng tan
3) MBKHP Chhawmdawlna In a thawktu leh enkawl lai te tan
4) Loisi Editorial Board memberte tan
5) Tawngtai na a hriat tlan kan duh a awm chuan thawhbelh thei a ni ang.

Hriattur Pawimawhte:
1) Inkhawm hruaitu tur leh thuhriltu tur hi Unit BKHP Committee in thlang se.
2) A hun thuah mahni Unit remchan dan dan Chhun/Zan-ah hman theih a ni ang.

BKHP lo din chhoh dan:

1938 March thlaah BMS missionary Pi Zirtiri (EM Chapman) hovin, ‘Kristian Nula Tlawmngai Pawl (G.A) chu Assembly hriatpuina leh kaihhruainain Serkawnah din a ni a, hruaitute chu – Nl. Thenvungi President, Nl. Laltinchhingi Secretary leh Nl. Nuchhungi Treasurer te an ni. Thuvawn atan, ‘Ka Lalpa’n tih tura min ruatsak apiang chu ti turin ka inpeih reng e’ tih an hmang a, hei hi sâp rama G.A. te pawhin thuvawn atana an hman lai a ni. 1939-ah chuan G.A. hruaitute leh mi thahnemngaite chu thingtlangah zinin, G.A. branch din duhte chu an dinpui zel a, 1945 ah chuan khaw 35 lai ah branch a lo ding ta a, G.A. te hian rim takin an thawk a, chhungkaw tanpui ngaite tanpui chu an tum ber pakhat a ni. G.A. hian nula chauh a huam a ni.

Kum 1947 khan, G.A. hian nula chauh a huam avangin nu thahnemngaite chuan Nu Pawl an lo din ve leh ta a, Nu pawl hian inkhawmna te nei hrangin rawngbawlna hrang hrangah hma an la chho ve zel a, chutianga hmeichhe zinga pawl pahnih awm chu Mizoram Baptist Kohhran Assembly hotute chuan fel tawk lovin an hria a, tichuan Nu pawl leh Nula pawl (G.A) chu pawl khatah dahin Baptist Kohhran Hmeichhe Pawl (BKHP) din a lo ni ta a, Assembly hriatpuiin March 20, 1965-ah a lo ding ta a ni. He pawl hian Baptist Kohhran Hmeichhia zawng zawng kum 14 chunglam a duh apiang chu a huap vek a ni. 1971 April thleng khan committee neih phal a ni lova, ‘inrawnkhawmna’ tih a ni thin a, 1971 May thla atangin Committee meeting neih phalsak an lo ni ta a, a lawmawm hle mai. Lalpa chu fakin awm rawh se.

Kum tinin BKHP Day March 20, 1989 thleng khan hman a ni thin a, hmeichhe rawngbawlna kum sawmnga a lo tlin khan May 2, 1988-ah BKHP Golden Jubillee hman a ni a, MBKHP executive Committee chuan khawi zawk nge BKHP Day-ah hman tur tih BCM General Committee-ah a thlen a, BCM General Committee chuan May 2-ah BKHP Day hi hman tawh ni se, G.A. din atangin a kum zat pawh chhiar ni se, a tih angin kum 1990 atang chuan May 2 hi BKHP Day atan hman a lo ni ta a ni.  BKHP chuan kum 75 lo tling tawhin kum 2013-ah Platinum Jubilee hlim takin kan lo hmang  tawh a ni. Lalpa chu fakin awm rawh se. Tunah(2018 BCM Statistics) hian BKHP member zawng zawng hi 33746  an awm mek a ni.

Thutiam:

“Ka Lalpain tih tura mi ruatsak apiang chu ti turin ka inpeih reng e,” tih hi G.A. a nih lai atanga tun thlengin BKHP thutiam a ni.

BKHP din chhan:

BKHP din chhan chu “Pathian ram a lo zau zel theihna tura Kohhran, khawtlang, leh chhungkuaa rawngbawl hi a ni”.

A thil tum te:

  1. Pathian thu hriatna leh rinna kawnga hmasawn
  2. Kristian chhungkaw din.
  3. Pathian thua fate kaihhruai
  4. Chanchin tha hrilhna kawnga theihtawp chhuah
  5. Assembly in Buhfaitham hi enkawl tura a ruat ang a enkawl
  6. A tul ang apiang kohhran leh khawtlang tana thawh.

Baptist Kohhran Hmeichhe Pawl hian G.A. hun lai atangin vawiin thlengin BCM hmalakna chi hrang hrangah hma an la nasa ve em em a, mission rawngbawlna leh damdawiin te, nauhnuchham enkawlnaah pawh theihtawp an chhuah zel a, TLM rawngbawlna leh AICS te, HATIM-ah te pawh theihtawp an chhuah zel hi Lalpa duhzawng a ni tih hre thar leh ila, hmalam i pan zel ang u.

MBKHP in 2000 AD atanga ‘Chhawmdawlna In’ a lo buatsaih te hi Pathian khawngaihna a ni. Thalai tam tak, nu te pawh Chhawmdawlna In-ah an tlulut thin a, taksa leh thlarau damna chang engemaw zat an lo awm ta a, Pathian thu zir mekte pawh Chhawmdawlna In atang hian kan lo nei ta a, nasa lehzualin tawngtai leh thilpek i hlan zel ang u.

BKHP hian India hmarchhakah te, India Baptist Hmeichhe Pawlah leh Asia Baptist Hmeichhe Pawlah te, khawvel Baptist kohhran inkhawmpui lianah te palai an tir ve thei ta hi hmasawnna ropui tak a ni. Tun lai khawvel sual tak leh bawlhhlawh tak karah hian meichher chhi eng zel ila, kan kohhran, khawtlang, leh kan ram siam tha turin kan thlen chin atanga hma sawn zel turin tan la ila, Pathian i au ang u.

Read more: Baptist Women’s Fellowship

………………………..

BMP Day – May 4,2019

May 4, 2019 (Inrinnii) hi Baptist Kohhran Mipa Pawl (BMP) Day a ni a. Kuminah hian IChawlh a nih loh avangin chhun lamah progamme siam a ni hran lo va, zan lam Inkhawm Programme erawh chu Mizoram pumah BMP ten urhsun takin an hmang dawn a ni. Kumin BMP Day thupui atan “Lawm chungin Lalpa rawng bawl ula.
(Sam 100: 2) thu hman a ni ang a.  Hun hman dan tur (Detailed Programme) chu Unit tinin tha an tih angin an siam dawn a ni.

Hun hman dan tur:
BMP ten an duh angin programme an siam ang.

Hriattur Pawimawhte:
1. Kum 2020 BMP Meet neihna hmun tur chu, BMP lo din tanna Thingsai-ah a nih dawn. A hun tur pawh February 7-9, 2020 a ruat fel a ni tawh.

2. Chhungkaw Pa berin sorkar leh mi dang rinchhan lova mahni intodelh a programme buatsaih chung chang a hma kan la hian rah a chhuah tha hle. MBKHP Inkhawmpui pawh Mizoram Chanchin bu-te fakna a lang nawk mai. Kan Target leh Member tin thawh tur te i ngaipawimawh zel ang u.

……………

Baptist Mipa Pawl chanchin tlangpui:

Baptist Mipa Pawl (BMP) hi Thingsaiah May 4, 1980 khan din tan a ni. Chutih lai chuan a hming hi sâp tawngin “Baptist Men’s Fellowship” tih a ni a, a lam a har deuh avangin 1983-ah “Baptist Mipa Pawl” tia thlak a ni. BCM Assembly 1988 chuan BMP hi Kohhran hnuaia Fellowship pakhat ni turin a lo pawm ta a, chuta tang chuan Tualchhung Kohhran hrang hrangah din phal a ni ta bawk a. Assembly chuan BMP Inkaihhruaina Dan ruahman chu a pawm nghal bawk a ni.

BCM Assembly 2006 chuan BMP din  ni atan Thingsaia a din tan  hun 4 May 1980 chu BMP Day atan a pawm a, chuta tang chuan kum tinin BMP Day hi hman thin a ni ta a ni.

BCM Assembly 2011 chuan BMP chu Tualchhung Kohhran bakah Pastor Bial tina din a lo phalsak leh ta zel a, tichuan Pastor Bial tam takah din a lo ni ta zel a, a lawmawm hle. Tunah chuan hmun tam takah Bial BMP Inkhawmpui leh rorelte pawh neih thin a lo ni ta.  Bial hrang hrang atangin BMP ram pum huap inkhawmpui nei tura dilna a lo lut a.  FOD Committee chuan ngun taka a ngaihtuah hnuah, tum khat atan 2014-ah meet nei turin Central Committee-ah thlenin phalsak an ni a. Hlung takin August 8-10, 2014 khan BCM Bazar veng Biak inah ram pum huap BMP Meet a vawikhat nan neih a ni. BMP tan kum chhinchhiah tlak ‘mellung’ a ni reng tawh dawn a ni. Tin, BMP Inkhawmpui hi 2017-ah ram pum huapin neih ni rawh se, a ti a. Central Committee chuan a lo remtihsak tawh bawk a, thlir mek a ni. Nasa takin BMP member-te chuan thlarau leh rawngbawlna lamah hma an sawn zel a, a lawmawm em em a ni.

2018 BCm Statistics in a tarlan dani BMP member hi 15684 an awm mek a ni. Chhungkaw Pa berte an nih avangin BMP hi an pawimawh tak meuh a, kan ram leh Kohhran kalphung leh sukthlek hi kan ngaihpawimawh zawng hian kan hriat loh hlanin thui tak a hril a ni. Kan nupui fanaute hian pain thil tha leh tha lo hriaah min ngai tlat a, inkhawm kan ngaihpawimawh leh an ngaipawimawh ve mai a. Kan inthlahdah leh chuti tho. Kan pawimawh a ni tih hi i theihnghilh lovang u.

BMP Din chhan:

Baptist Mipa Pawl hian dihchhan leh thiltum mumal tak a nei a, chungte chu :-

  • Baptist mipate thlarau nun buatsaih leh tihchak.
  • Kristian chhungkaw din.
  • Kohhran tana kutke tangkai nih.
  • Khawtlang thatna tura thawh.

BMP Thuvawn.

BMP chuan thuvawn a nei a, hetiangin:

“ Kei leh ka chhungte erawh hi zawngin Lalpa rawng a nia kan bawl dawn ni”.  (Josua 24 : 15b).

 

 

Posted in BCM News.

admin