BKHP Day – May 2

BKHP Emblem

May 2, 2020 (Inrinni) hi Baptist Kohhran Hmeiche Pawl (BKHP) din champhaphak vawi 82-na a ni a.  Kumin BKHP Day thupui atan “Rinawmna (Sam 37:3) tih a ni ang. BKHP Day hi Mizoram pumah BKHP te’n urhsun takin an hmang thin a, unit tinin tha an tih ang leh an remchan dan angin programme an siam thin a ni. 

Kuminah BKHP Day hi Sawrkar Chawlh a nih loh avang leh Covid-19 hrileng avanga ram pumah inkharkhip mek a nih avangin eng angin nge hun hman theih dan tur chanchin kan ziak lai hian kan hre thei rih lo a ni. BKHP Day pual thuchah leh Programme BCM AV-in a siam chu zanin (May 1, 2020) hian LPS (12) ah dar 6:00, naktuk may 2  dar 6am leh chhun dar 12 ah te tih chhuah a ni ang a, Zonet (Rinna) channel-ah zanin (May 1, 2020) dar 8 leh naktuk zing dar 8 ah te tih chhuah a ni ang. He bakah hian Youtube BCM Channel-ah dah niin a hnuaia links-ah hian en theih a ni ang.

B KHP din dan:
Baptist Missionary Society (BMS) atanga Mizorama Missionary lo kal te zîngah hmeichhe Missionary engemaw zât an awm a, chûng zînga pakhat Pi Zirtîri (EM Chapman) hovin Asssembly hriatpuina leh kaihhruainain kum 1938 khân “Kristian Nu Pâwl” (GA – Girls Auxiliary) din a ni a. Sâp rama GA te thuvawn “Ka Lalpain ti tûra mi ruatsak apiang chu ti tûrin ka inpeih reng e” tih chu thuvawn atân an hmang nghâl a. GA hian Nula chauh a huap avângin kum 1947-ah nu thahnemngaite chuan Nu Pâwl an lo din ve ta a.

Chutianga hmeichhe zînga pâwl pahnih awm ta chu Mizoram Baptist Kohhran hruaitute chuan fel tâwk lovin an hria a, Nu pâwl leh Hmeichhe pâwl (GA) te chu pâwl khatah siam in Baptist Kohhran Hmeichhe Pâwl (BKHP) a lo din ta a, 20th March 1965 khân Assembly in hriatpuiin BKHP chu a lo ding ta a ni. GA din atangin a kum zât pawh chhiar ni se ti-a Assembly in a rel angin 1938 chu BKHP din kum atan pawm a lo ni ta a ni.

BCM Statistics 2019-20-in a tarlan danin tunah hian BKHP member 35,364 (singthum sang nga zathum sawmruk leh pali) an awm mek a ni.