BKHP DAY(May-2)

BKHP lo din chhoh dan:

1938 March thlaah BMS missionary Pi Zirtiri (EM Chapman) hovin, ‘Kristian Nula Tlawmngai Pawl (G.A) chu Assembly hriatpuina leh kaihhruainain Serkawnah din a ni a, hruaitute chu – Nl. Thenvungi President, Nl. Laltinchhingi Secretary leh Nl. Nuchhungi Treasurer te an ni. Thuvawn atan, ‘Ka Lalpa’n tih tura min ruatsak apiang chu ti turin ka inpeih reng e’ tih an hmang a, hei hi sâp rama G.A. te pawhin thuvawn atana an hman lai a ni. 1939-ah chuan G.A. hruaitute leh mi thahnemngaite chu thingtlangah zinin, G.A. branch din duhte chu an dinpui zel a, 1945 ah chuan khaw 35 lai ah branch a lo ding ta a, G.A. te hian rim takin an thawk a, chhungkaw tanpui ngaite tanpui chu an tum ber pakhat a ni. G.A. hian nula chauh a huam a ni.

Kum 1947 khan, G.A. hian nula chauh a huam avangin nu thahnemngaite chuan Nu Pawl an lo din ve leh ta a, Nu pawl hian inkhawmna te nei hrangin rawngbawlna hrang hrangah hma an la chho ve zel a, chutianga hmeichhe zinga pawl pahnih awm chu Mizoram Baptist Kohhran Assembly hotute chuan fel tawk lovin an hria a, tichuan Nu pawl leh Nula pawl (G.A) chu pawl khatah dahin Baptist Kohhran Hmeichhe Pawl (BKHP) din a lo ni ta a, Assembly hriatpuiin March 20, 1965-ah a lo ding ta a ni. He pawl hian Baptist Kohhran Hmeichhia zawng zawng kum 14 chunglam a duh apiang chu a huap vek a ni. 1971 April thleng khan committee neih phal a ni lova, ‘inrawnkhawmna’ tih a ni thin a, 1971 May thla atangin Committee meeting neih phalsak an lo ni ta a, a lawmawm hle mai. Lalpa chu fakin awm rawh se.

Kum tinin BKHP Day March 20, 1989 thleng khan hman a ni thin a, hmeichhe rawngbawlna kum sawmnga a lo tlin khan May 2, 1988-ah BKHP Golden Jubillee hman a ni a, MBKHP executive Committee chuan khawi zawk nge BKHP Day-ah hman tur tih BCM General Committee-ah a thlen a, BCM General Committee chuan May 2-ah BKHP Day hi hman tawh ni se, G.A. din atangin a kum zat pawh chhiar ni se, a tih angin kum 1990 atang chuan May 2 hi BKHP Day atan hman a lo ni ta a ni. BKHP chuan kum 75 lo tling tawhin kum 2013-ah Platinum Jubilee hlim takin kan lo hmang tawh a ni. Lalpa chu fakin awm rawh se. Tunah hian BKHP member zawng zawng hi 31,874 an awm mek a ni.

Thutiam:

“Ka Lalpain tih tura mi ruatsak apiang chu ti turin ka inpeih reng e,” tih hi G.A. a nih lai atanga tun thlengin BKHP thutiam a ni.

BKHP din chhan:

BKHP din chhan chu “Pathian ram a lo zau zel theihna tura Kohhran, khawtlang, leh chhungkuaa rawngbawl hi a ni”.

A thil tum te:

  1. i) Pathian thu hriatna leh rinna kawnga hmasawn
  2. ii) Kristian chhungkaw din.

iii) Pathian thua fate kaihhruai

  1. iv) Chanchin tha hrilhna kawnga theihtawp chhuah
  2. v) Assembly in Buhfaitham hi enkawl tura a ruat ang a enkawl
  3. vi) A tul ang apiang kohhran leh khawtlang tana thawh.

Baptist Kohhran Hmeichhe Pawl hian G.A. hun lai atangin vawiin thlengin BCM hmalakna chi hrang hrangah hma an la nasa ve em em a, mission rawngbawlna leh damdawiin te, nauhnuchham enkawlnaah pawh theihtawp an chhuah zel a, TLM rawngbawlna leh AICS te, HATIM-ah te pawh theihtawp an chhuah zel hi Lalpa duhzawng a ni tih hre thar leh ila, hmalam i pan zel ang u.

MBKHP in 2000 AD atanga ‘Chhawmdawlna In’ a lo buatsaih te hi Pathian khawngaihna a ni. Thalai tam tak, nu te pawh Chhawmdawlna In-ah an tlulut thin a, taksa leh thlarau damna chang engemaw zat an lo awm ta a, Pathian thu zir mekte pawh Chhawmdawlna In atang hian kan lo nei ta a, nasa lehzualin tawngtai leh thilpek i hlan zel ang u.

BKHP hian India hmarchhakah te, India Baptist Hmeichhe Pawlah leh Asia Baptist Hmeichhe Pawlah te, khawvel Baptist kohhran inkhawmpui lianah te palai an tir ve thei ta hi hmasawnna ropui tak a ni. Tun lai khawvel sual tak leh bawlhhlawh tak karah hian meichher chhi eng zel ila, kan kohhran, khawtlang, leh kan ram siam tha turin kan thlen chin atanga hma sawn zel turin tan la ila, Pathian i au ang u.