BKHP-in BWA Hmeichhe tawngtai Ni an hmang

November Thawhtanni hmasa ber hi khawvel pum huapa Baptist Kohhran inzawmkhawm (Baptist World Alliance, Womens’ Day of Prayer Day (BWA Hmeichhe Tawngtai Ni) a ni a. He ni hi kum tin neih thin a ni. Kuminah pawh November 4 hian khawvel pumah thupui pakhat “Tho la, êng rawh“. (Isaia 60:1) tih thu hmangin awmni khamin an tawngtai a ni.

Mizoram Baptist Kohhran Hmeichhe Pawl (MBKHP) pawhin hei hi zawm ve-in vawiin, Thawhtanni chawhma dar 10:00 atangin BKHP Unit tinin Tawngtai programme hi an hmang a. Tawngtai tum 9 neiin, tawngtai kar lakah BWA hruaitute ziak thuchah, testimony leh Sharing chhiar chhuah a ni bawk. Tawngtai Subject hi khawmualpui 8-a ram hrang hrang leh hnam hrang hrang te, ram hruaitute leh Kohhran hruaitu te, Kristian te leh Missionary te tan leh BWA hruaitute leh Hmeichhe hruaitute pual-in neih a ni.

TAWNGTAI THUPUI

TAWNTAI VAWI-1 NA: SOUTH WEST PACIFIC PUAL

1) Papua New Guinea-a cheng hmeichhiaten an rawngbawlna-ah chakna thar an lo neih a inunauna nen rawng an bawl zel theih nan.

2) Australia rama Baptist kohhran hmeichhe hruaituten chakna leh finna an lo neih theih zel nan leh Kohhrana Pastor-ten hmeichhiate hlutna leh theihna an lo hriat zel theih nan.

3) New Zealand rama hmeichhiaten inpekna thar nena rawng an bawl theih nan leh hmeichhia Pathian thuzir ten hmakhua eng zawk an lo neih ve theih nan. Hruaitu dinhmun cheltu ten an hna chanpualte tha taka an thawh zel theih nan.

4) FIJI a hmeichhe hruaitute tihchak nana workshop an buatsaih atanga khawtlang a chona an hmachhawnte fing taka an ngaihtuah thiam theihnan leh an hmalakna hrang hrang a hlawhtlin theih nan.

5) West Papua rama cheng Baptist hmeichhia kohhran leh khawtlang-ah nihna pawimawh tak tak chelhtuten huaisen taka Lal lsua chanchintha an nunpui theih nan. Tin, West Papua Women’s Fellowshipte tawngtaipui ila an rawngbawlna midangte tana malsawmna a nih theih nan.

6) 2019-2024 atana Baptist Women Union South West Pacific (BWUSWP) hruaitu thlan tharte tan.

  1. TAWNGTAI VAWI-2 NA: NORTH AMERICA PUAL

1) North America a Baptist hmeichhiaten an huang an zauh a, Baptist hmeichhia rawngbawlna kawnga tel ngailote an hui luha, hmeichhia leh naupang chak lo zawkte puihna kawngah nasa zawka an thawhho theih nan.

2) Nihna avanga inrikrapna tuartu hmeichhiate tan, Pathian tanpui dilpui ila.

3) Danglamna leh hlauhna karah pawh an mihring pui politics avangte, khawtlang thil avangte leh inrelbawlna buai avanga an rama pem lutte Isua hmangaihna atanga an lo dawnsawn thiam theih nan.

4) An khawtlanga hmeichhia leh naupang kawng hrang hranga inhnuaichhiahna tuartute tan, Baptist hmeichhiate Pathian hmarua ni a danglamna thlentu an nih theih nan.

5) Tanin a tang hmeichhiate tan, a tam zawkte chu fanau nei an ni. Anmahni leh an fate tan tawngtai sak ila.

6) Hmeichhia kum inanglo tak tak thawkho ten inhriatthiamna leh inpawhna tha nen rawng an bawl tlan zel theih nan.

  1. TAWNGTAI VAWI-3 NA: LATIN AMERICA PUAL

1) Sawrkarin tha taka ro a rel theih nan, dik leh tha zawka dan siam a nih theih nan.

2) Baptist hmeichhiate an hmeichhia pui inzuar thinte, chenna tur neilote, damlote leh khawharte hnenah Chanchin Tha hrilhtu an nih theih nan

3) Hruaitu thar thlarau mi tak an neih theih nan

4) Naupang enkawlna tura an Project siamte a hlawhtlin zel theih nan.

  1. TAWNGTAI VAWI-4 NA: AFRICA PUAL

1) Africa hi Mosolman tamna ram a ni a, Islam sakhua thehdarh tuma nasa taka an beihna karah hian Lal Isua Chanchin Tha hriltu Kohhrante tan tawngtai ila.

2) Africa rama Baptist hmeichhiaten khawtlangah, kohhranah, chhungkuaah Lal lsua chanchintha hi huaisen taka an puanchhuah zel theih nan

3) Africa ramin ei leh barah hmasawnna an lo neih theih nan leh hmeichhiate chawisan an lo nih theih nan

4) Africa ramah Lal lsua chanchintha hi hrilhdarha a lo awm zel theih nan, missionary-te tan thahnemngai takin i tawngtai ang u.

  1. TAWNGTAI VAWI-5 NA: CARRIBEAN PUAL

1) Hmeichhiate zingah tihduhdahna leh nghaisakna a lo tlem theih nan leh Chhungkaw enkawltu pa ten Pathian duh dana rawng an bawl theih nan.

2) Caribbean ramah hian ruihtheihthil leh dan lo anga mihring hmanga sumdawnna a lo reh theih nan leh chung kawnga inhnamhnawihten Pathian an lo hmuh theih nan.

3) Vawiin kan tawngtai hona atang hian hmeichhiaten malsawmna hmeichhiate an dawn theih nan leh Pathian ram zau nana an thawh theih nan.

4) Pathian an rinna ah Kohhrante nghet taka an din theih nan leh an chhehvela an rinna tinghing theitu awm thin mahsela huaisen taka Isua tan an tan ngam zel theih nan.

  1. TAWNGTAI VAWI-6 NA: ASIA PUAL

1) Asia rama Pastor leh Kohhran hruaituten hmeichhe pawl-te hmalakna an thlawp tlat theih nan. Hmeichhiate tihchak leh tihhmasawn kawnga tun aia nasa a ke an pen theih nan.

2) Asia rama Baptist hmeichhiaten thawhhona tha neia inlungrual taka Pathian rawng an bawl theih nan

3) Baptist hmeichhe hruaituten damna leh hriselna tha nena hmathlir tha tak nei chunga Pathian rawng an bawl zel theih nan.

4) Asia ah remna leh dikna a awm theih nan Sawrkar hruaitute tan tawngtai ila. A bik takin Myanmar, South leh North Korea ram tan dil ila, remna leh inhriatthiamna tundina a lo awm theih nan.

5) India rama hmeichhia hnuichhiah leh dinhmun chhe taka awmte tan. Tin, Pakistan, China leh Myanmar ah Kristian tihduhdahna a lo kian theih nan.

6) Asia ram thenkhat lirnghing, tuilian leh thli avanga harsatna tuartute tan, Pathian venhimna dilpui ila.

7) Asia ram hrang hranga cheng hmeichhia leh naupangte tihduhdahna, retheihna, nghaisakna leh dan lo anga mihring hmanga sumdawnna kawngah venhim an lo nih theih nan. Sawrkar leh NGO –ten an himna tur chak zawka an ngaihtuah theih nan.

8) Asia rama Baptist hmeichhe inzawmkhawm pawl (Asian Baptist Women Union) rawngbawlna a lo chak zel theih nan leh hruaitu naupang zawkten tun aia nasa zawka Pathian rawngbawlna ah ke an lo pen theih nan.

  1. TAWNGTAI VAWI-7 NA: EUROPE PUAL

1) Ringtute zingah midangte rawngbawl sak hlimawm zia kan lo hriattheih nan.

2) Pathian tan phurna thar kan neih theih nante, hmeichhiaten nitin Lal Isua kan hmangaih theih nan.

3) Baptist Hmeichhiate hi kan fate tan nu entawn tlak kan nih theih nante leh thang thar ten Thlarau Thianghlim hruaina chang a khawvel thil nilo a Lal Isua nen hun an hman theih nan.

4) Innghaisakna leh tihduhdahna a lo tlêm theih nan

5) Khawvelah remna leh muanna a lo awm theih nan leh chhan hrang hrang avanga retheihna awmte a lo tlem theih nan.

8) Hmun hrang hranga, a bik takin- Middle East ramte leh Europe ram thenkhata râl tlante tan Pathian awmpuina leh thlamuanna i dil sak ang u

  1. TAWNGTAI VAWI-8 NA: BWA HMEICCHIATE LEH BWA PUAL

1) Baptist hmeichhe inzawmkhawm pawl anga kan rawngbawlna leh keimahni tualchhung theuhah chak zawka kan kal theihna turin dil ila.

2) July 2020-a Brazil-a BWA hmeichhe pawl Inkhawmpui lo awm tur tan, hlawhtling taka neih a nih theihnan a buaipuitu zawng zawngte tawngtai pui ang u.

3) BWA hmeichhe tawngtai Ni kan hman hi a hmangtute tan malsawmna a nih theih nan.

4) BWA hmeichhe Pawl hruaitute President- Ksenija Magda, Interim Executive Director- Moreen Sharp and Secretary treasurer ni bawk Kathy James ten finna leh chakna thar an lo neih theih nan

5) Kum 2020-2025 chhung atana Pathianin BWA hmeichhe Pawl hruaitu thar tha tak tak President, Secretary treasurer ni bawk leh Executive Director min pek theih nan

6) Baptist World Alliance a kan president Paul Msiza leh kan General Secretary Elijah Brown ten finna leh chakna an lo neih theih nan

BAPTIST WORLD ALLIANCE

BAPTIST WOMEN’S WORLD DAY OF PRAYER 2019

Thupui: Tho la, Eng Rawh (Arise, Shine)

Khawvel pumpui hmeichhe inzawmkhawm pawl (Baptist World Alliance Women’s Department) hi khawmualpui 7 atanga ram 151 intelkhawmte kan ni. Kumin November 4, 2019 a kan tawngtai hona tura kan hriat tur leh tawngtaipui tur hrang hrangte ruahmanna siamtu te hi Carribean rama Baptist hmeichhe inzawmkhawm pawlte an ni.

  1. THUCHAH TAWI: Yvonne Pitter (President Caribbean Baptist Women’s Union)

Thupui : A rawng kan bawl hian Lal Isua a engchhuak thin

November 4, 2019 khawvel pumpui a Baptist hmeichhiate tawngtai hona niah hian khawvel hmun hrang hranga cheng Baptist hmeichhiate Lal Isua hminga kal khawmin tawngtai honate neiin a thute kan zir ho leh dawn a ni. Kum nga chhung “Tho la eng rawh” tih thupui kan hman chu kumin ah hian “Rawngbawlna” tih hmangin kan zial fel thei ta. He thupui hmang hian Baptist hmeichhiaten kawng hrang hrangin an nunah Lal Isua eng chu tarlanin a awm a; chu eng chuan an chenpuite bulah danglamnate, inlungrualnate, diknate, intluktlannate, a thlen a ni. Caribbean Baptist hmeichhiate hi chuan hmeichhia chaklo zawkte leh naupang chunga diklo taka nghaisakna awm thinte leh mihring hmanga diklo taka sumdawnna awm thinte hi kan duhlo in kan do tlat a ni.

Kum 58 zet chu Baptist hmeichhiaten November thla apiangin kohhran pumpui huapin tawngtai hona te, chawnghei tawngtaite, kartawpah tawngtaia intuaitharna hunte kan lo hmang tawh thin. Hmun thenkhatah phei chuan November thla chhung hian Programme hmang thinte pawh an awm a ni.

Bible ah pawh hlim tak leh an theihna zawng zawnga Pathian rawngbawl thin leh chibai buk thinte kan hmu a, an nun atangin entawn tur tha tak tak kan nei awm e. Midangte rawng kan bawlsak hian Pathian rawngbawl kan ni tih kan hriat hi a va pawimawh em. Midangte rawng kan bawlsak hian malsawmna hetiang hian kan hmu thei:

  1. Thlarau thilpek kan dawnte kan hmuchhuak thin (1 Korinth 12)
  2. Kan nunah Pathian thilmak (miracles) tih kan hmu thin (Johana 2)
  3. Isua anna kawngah min tanpui thin a. Mahni aia midangte kan ngaihpawimawh hian Isua anna kawng min zirtir thin a. Tin, midangte ah Isua hmel kan hmuh thiam na hian midangte tanpui duhna min neihtir thin a ni. (Matthaia 24:40)
  4. Pathian thuawihna atanga rawng kan bawl hian hlimna leh muanna kan chang thin (I Petera 4:10-11)
  5. Rawngbawlna hian kan ringtu puite nen inzawmna leh lungrualna min pe thin a, chu chu Pathianin Kohhran hote awmdan tura a duh pawh a ni (Hebrai 10:24-25)
  6. Kan rinna tihpun in a lo awm thin. Kan nawmna hmun atanga kan penchhuah hian kan theihnate midangte tan leh Kohhran tan tihlanin a lo awm thin .
  7. Midangte rawng kan bawlsak hian Pathian awmpuina leh hruaina a tharin kan dawng thin. Midangte kan tih phur hian anmahni ah damna leh beiseina thar a thlen thin a, chu chuan keimahni pawh min ti phur thar thin.
  8. Midangte rawngbawl sak hi kan thlarau tan a tha a ni. Mahni kan inpek (volunteer) hian kan rilru leh taksa tan a tha tih zirchhuah a ni a, chu chuan rilru hahna leh rilru hrisello a ti kiam thei a ni.
  9. Midangte rawng kan bawlsak hian kan talent leh tui zawngte kan hre thei a chu chuan mahni inrintawkna leh chakna min pe thin.

Ringtute hian rawngbawl tur hian chhuanlam kan siam fo thin; “hun ka neilo,” “min mamawh lo,” “keichu engmah midang tana tangkai tur thiam thil ka nei ve lo,’ te kan ti thin. Amaherawhchu hei hi hria ila “Pathian hian mithiamte chauh hi a ko lo: A kohte chu a thuam mai zawk a ni.” Bible ah hian Pathianin a kohte, mahni lam in en a tlinglo inti em em si mahse Pathian hmanraw ropui tak ni ta te chanchin kan hmu a, chung zinga mi tlemte tarlang ila: 1. Mosia – hruaitu ni sa leh thusawi mi a nilo, mahse Pathianin Israel-te an saltanna ata hruaichhuak turin a hmang.

  1. Davida – an unau ah a naupang ber nimahse Goliatha milian tak a hneh a, Israel Lal-ah a lo awm ta nghe nghe anih kha
  2. Paula – Lal Isua nen an in tawh hma chuan ringtute tiduhdahtu a ni thin a, nimahse, Lal Isua nen an intawh hnu kha chuan kohhran phuntu leh dintu a lo ni ta zawk a ni.

Pathian hian nangmah kal tlangin a inpuangchhuak duh mai ni loin nangmahah hnathawh a duh a ni.

Ka unau duhtakte u he ni kan hmannaah hian Pathianin malsawm che u sela, Tho a, rawngbawlna hmanga engchhuak turin duhsakna ka hlan a che u.

  1. THUCHAH: Ksenjia Magda (BWA Women’s President 2015-2020)

Tunhnai la rei vaklo ah khan hmeichhe pakhat nen kan titi a, a buai thute, midangte buaipui reng renga a khawsak thu leh ama tan pawh hun a neih mang loh thu sawiin a phunnawi nasa mai a. Hei hi hmeichhe tam tak harsatna chu a ni reng a ni. Hetiang vang hian hmeichhiate zingah midangte tana malsawmna ni tur leh rawngbawlsak tura infuih hi a harsa hle reng a ni. Chutia a titi ka ngaihthlak lai chuan ka rilruah thil pakhat a lo lut a, midangte tanpui theia a awm chu rawngbawlna a ngai lovin phurritah a la a ka hriat thu ka hrilh nghal nghe nghe a, he thu ka hrilh hnu hi chuan amah pawhin thlirdan tharin a thlir ve ta in ka hria.

Kan Bible hian roluahtu leh bawih dinhmun a tarlang a (Galatia3:23- 4:9; Johna 15:14-17). Bawih chuan a pu rawng a bawlsak a, a mamawh leh duh engmah a sawi ngailo. A pu duhzawng tih chu a hna pawimawh ber a ni. Pathian hian bawiha awm turin tumah hi min siam lova, amaherawhchu keimahni zawk hi bawih a awm turin kan in siam fo thin. A awmzia chu tu emaw sal/bawih kan ni kher lovang amaherawh chu thil eng emaw kan in bawih tir a, Pathian aiah thildang kan pathian chang a awm fo thin. Kan duham luatnate, mahni hmasialnate hian min bawih chang a va tam thin em. Heng avang hian a chang chuan kan nitin nunahte, thiltihahte leh hnathawhna ahte kan nguiin kan chau ngawih ngawih thin. Rawngbawlna kawngah phei chuan a pawi em em a, midangte tanpui theilo khawpin min siam thin. Midangte tanpuia buai em em a kan inhriat lai hian heng zawhnate hi inzawt ila: Engvangin nge ka tih? Engvangin nge thil ka tihfai reng bik? Tunge ka hlauh le? Engnge hlawhchhuah ka beisei a, midangte hian min hmangaih bik se ka ti em? Engnge kan chhanna ni ang le? Lal Isua hnungzui tura kan inpek hian Pathian roluahtute kan ni tih hi kan inhriat a pawimawh hle mai. Roluahtu kan nih angin kan Pa rawng chu rinawm taka bawl tur kan ni a, hnathawktu anga kan awm a ngai a ni. Fapa tlanbo chanchin a fa upa zawk ang khan kan hlawh chhuah kher ngai loin engkim hi kan ta a ni (Luka 15). Paulan I Korinth 3:21-23 ah tihian a sawi “Chuvangin, tuman mihringte chhuang suh se. Engkim hi in ta ani vek si a; Paula emaw, Apollova emaw, Kipha emaw, khawvel emaw, nunna emaw, thihna emaw, thil awmsa emaw, thil lo la awm tur emaw, a zavaiin in ta vek a ni; nangni pawh Krista ta in ni a; Krista pawh chu Pathian ta a ni.”

Pathian fanute kan nih avangin rawng kan bawl hian hlawhchhuah neih kher tum lo ila, engkim hi kan ta a ni tih hre chungin rinawm takin i thawk zel ang u. Pathian hnathawhpuite kan ni a, kan mamawh ang zelin min tanpui thin. Rawngbawlna hmang hian Lal Isua tan kan engchhuak thei a ni. Pathian tana rawngbawl tura kan inpek zawh poh leh a thiltihtheihna a lo lang chhuak thin, chu rawngbawlna chuan chakna thar min pe zel dawn a ni.

Chuvangin, ka unau duhtakte u he zawhna inzawt chung hian rilru leh thinlung taka rawngbawl chunga eng chhuakin he khawvelah hian danglamna thlen turin huaisen takin I penchhuak zel ang u.

  1. BWA hmeichhe tawngtai ni hi engnge a nih?

He tawngtai ni hi khawvel hmun hrang hranga Baptist hmeichhiate a huhoa Pathian kan pawl theihna hun a ni a. He hunah hian thil pahnih pawimawh tak tak theihnghilh loh tur a awm a chu chu tawngtaina leh thilpek hi a ni. Lungrual taka khawvel hmun hrang hranga Baptist hmeichhiate tawngtaina hian thil ropui tak a thlen thei a ni. Lal Isua ah pumkhat kan ni ang hian he kan tawngtai na hian inlungrualna leh inzawmkhawmna min pe a ni.

Vawiina kan thawhlawm tlingkhawm hian tanpui ngaite a tanpui bakah vawiin hun kan hmanna atana mamawhte a phuhruk a ni. Baptist Hmeichhiate Lal Isua hminga kan kalkhawmna hian remna (Shalom) a thlen thei a, Lal Isua tana kan theihna theuh sawr chhuak tura infuihtawn tur kan nihzia i hre thar ang u.

  1. Bible Study: Sylvia Henry, Jamaica atangin

Thupui: I rawngbawlna kha hlenin êng chhuak rawh (Mathaia 20:20-28)

“tu pawh in zinga hmasa ber nih duh apiang chu in chhiahhlawhah a awm bawk tur a ni; Mihring Fapa hi rawngbawlsaka awm turin a lo kal lo va, rawngbawl tur leh mi tam tak tlan nana a nun pe tur zawka a lo kal ang khan,” a ti a.

Thuhma

Lal Isua khawvela a lo kal chhan chu a Pa hnathawh chhunzawm turin a ni. A thil tum ber chu thlarau bote a hnena hruai leh midangte rawngbawlsak turin a ni. Zebedaia nupui chuan a fapate te Isua hnenah hetiang hian a dil a, “Heng ka fapate pahnih hi I ramah, I ding lamah pakhat, i vei lamah pakhat an thut theihna turin thu pe ang che,” a ti a. Lal Isua zirtirte pawh hian rawng an bawlna kawngah a chang chuan ropuinate dawng thin se an ti ve ngei ang. Amaherawhchu, Lal Isuan chung chu rawngbawlna dik tak a ni lo tih a sawi chiang hle a ni. Ropuina hi chan tha leh kan dinhmun luah atanga teh tur a nilo. Ropui tur chuan midangte tan Lal Isua avangin kan nung anga, midangten hlawkna an hmu ang. Lal Isua ngaiha ropui tur chuan mahni inphat in nitin Kraws pu chungin midangte tan kan nun a ngai a ni.

Lal Isua khawvela a awm lai khan mahni inphatin midangte tan a nun pumpui a hlan tih kan hre theuh awm e. Hmangaihna nen midangte rawng a bawlsak thin a, damlote tidamin, a chhelai siamthatu a ni a, thlarau lama mitdelte tan mit varna a thlen thin. Thuawih takin A pa rawng a bawlsak thin. Keini pawh hi Lal Isua nun entawnin kan rawngbawlna hi Pathian tihna leh hmangaihna atangin ni sela tichuan midangten mithmuhah Lal Isua eng chi engtute kan lo ni thei dawn a ni (Matthaia 5:15 “Miin khawnvar halin hrai hnuaiah an dah ngai lo, a dahnaah an dah zawk thi; tichuan, in chhunga mi zawng a en thin”).

Rawngbawl tura koh kan ni

Rawngbawl tura min kotu chu Pathian a ni a. Khawvelah hian Krista aia palai niin kan nun leh chetzia in rawng kan bawl tur a ni. Chhandam kan nih avanga rawng hi bawl tur kan ni; Lal Isua hnungzuitu kan nih chuan a rawngbawl hi kan tihawm leh tikmakmawh a ni. Chuvangin lawm chungin Lal Isua rawng i bawl ang u.

Pathian atanga malsawmna kan dawn hrang hrangte hmang hian midangte tan malsawmna kan ni thei theuh a ni. Damlote tlawhin, chenna in nei lote, silh leh fên tur nei lote tuamhlawmin midangte tan Chanchin Tha kan ni thei a ni. Amaherawhchu, he rawngbawlna hi Pathian ta a nih avangin phut let kan nei tur a ni lo. Lal Isuan, “heng ka unau te berte zinga mi pakhat chunga in tih chu ka chunga ti in ni” (Mathaia 25:40) a tih ang khan, he rawngbawlna kaltlang hian, Pathian Thlarau Thianghlim tanpuinain midangte hnenah enna kan pe thei a ni.

Lal Isua anga rawngbawlin

Johana 13:1-5 kan chhiar chuan zirtirte ke silsak in rawngbawl nun Lal Isuan a entirna ropui em em kan hmu. Thil nihphung pangngai ah chuan zirtirtu ke chu a zirtir zawkten an silsak thin a, Isua erawh chuan a zirtirte ke a silsak zawk tlat. Hei hian rawngbawlna kawngah tlâwmna leh inpekna pawimawhzia min zirtir a. Tin, A hnungzuitute hi hmasial lo a midangte mamawh phuhruk tura koh kan nihna leh hna thawh chakawm loh mite min hriatpui loh thawk tura inhuam a tulzia min zirtir bawk a ni.

A zirtirte ke a silsak atang hian rawngbawl na chu chhiahhlawh nun a nihzia min zirtir bawk a ni. Lal Isua khan hmangaihna leh midangte ngaihsakna nen Pathian rawng a bawl a, tih tur tih hlawhtlin nan maia rawngbawl a nilo. A rawngbawl chhan zawk chu A pa a hmangaihna atangin a ni a, chu chuan midangte a kal kan tir thei lo a ni. Lal Isua nen kan inzawm tlat avangin rawng i bawl zel ang u.

Rawngbawlna: Lal Isua tana ênchhuahna

Pathian hian theihna leh malsawmna kawng hrang hrang min pe a – thlarau thilpekte, keimahniah theihnate, sum leh paite leh tawn hriatte; Samari mi tha (Luka 10:25-37) ang leh Petera leh Johanate (Tirhkohte 3:1-8) ang khan kan theihnate midangte tan hmangchhuak tur kan ni. Lal Isua hminga rawng kan bawl hian kan nuna Pathian thiltum kan tihlawhtling mai nilo in kan rinna nunchhuah puiin Pathian thawhpuite kan ni tihna a lo ni bawk a ni. Nitina Lal Isua anga kan nun hian Pathian thatna leh ropuina keimahniah a engchhuak thin a ni.

Lal Isua anga rawngbawl hi a Pathian Thu em em a, danglamna a thlen thin. Kan chhehvelah kan hmeichhe pui diriamnate, hnuaichhiahnate, enhrannate leh hliamte tuarin an awm mek a , thenkhat chu hrehawmna leh harsatna avangin bangbo leh mal ngawih ngawiha inhria in an awm mek a ni. Heng kan unaunute hian an hrehawmna ata chhuaka an nunah beiseina kawl en hun nghakin an thu ve ngei ang. An tan hian keini ho hi beiseina petu kan ni thei a ni tih hriain an tan auchhuak ve ila, an nunah danglamna thlentu ni turin i engchhuak ang u.

Rawngbawl naah hian a chang chuan nuam kan tih leh kan lo tlei em em na hmun chhuahsan a ngai thei, tin kan tan pawh a nelawm lohin hlauh tur leh venthawn turte pawh a tam thei bawk. Vantlangin a endawng leh a thinhrikte bulah pawh a ni thei, mahni inpumpek/inphat rawngbawlna chuan mihring a thliar ve ngai lo. Midangten Lal Isua hmangaihna leh a eng an lo hmuh ve theihna a nih phawt chuan mahni hrehawm pawisa lo in midangte tan rawng i bawl zel ang u. Eng chu thim zingah a tangkai em em si a.

Inpêkna thar nen Lal Isua êng tihlana a lo awm zel theih nan i êng chhuak ang u.

  1. Bible study 2: Julie Barclay,Trinidad leh Tobago atangin

I rawngbawlna hmangin tho la êng chhuak rawh

“Nimahsela, thil zawng zawng tawpna chu a hnai tawh a; chuvangin in tawngtai theih nan rilru fel tak puin fimkhur rawh u. Eng dang zawng aiin inhmangaih tawn uar rawh u; hmangaihna in sual tam tak a khuh si thin a. Phunnawi lovin inmikhual tawn ula; mi tinin thilpek in hmuh ang zelin Pathian khawngaihna tinreng enkawltu thate angin, chung chuan rawng inbawl tawn theuh rawh u. Mi tu pawhin thu a sawi chuan, Pathian thute angin sawi rawh se; mi tu pawhin rawng a bawl chuan, Pathianin chakna a pek ang zelin bawl rawh se; chutichuan Isua Krista avangin Pathian chu thil engkimah chawimawiin a awm thei ang, ropuina leh rorelna chu chatuana ama ta a ni si a” (I Petera 4:7-11)

Thuhma

Khawvela kan awmchhung hian Kohhrante hian kawng hrang hrangin tihduhdahna leh nekchepna kan tawk thin. Tihduhdahna tih hian a ngial ngana kan tawrh thin a awm a chumi bakah kan beisei loh lam daih atanga kan tawrh thin a awm thei bawk awm e. Chuvangin Kohhrante hi fimkhur leh ngaihven renga kan awm a tul a, kan hmelmate hian sakeibaknei ang maiin an eitheih tur zawngin min veh reng si a. Lal Isua en tlat chunga tawngtaina nen inring renga kan awm a ngai takzet a ni.

Petera lehkhathawn hi Rom lal Nero-a tihduhdahna hnuaia Kristiante an awm laia a ziak a ni a. Khang hunlai khan ringtuten tihduhdahna nasa tak tuarin, tam takin an rinna avangin an nunna an chân a ni. He lehkhathawn hi ringtute chu tuarna leh harsatna kârah pawh dingnghet zêl tur leh chhel taka tuar hrâm hrâm tura fuihna a ni. Tihduhdahna karah pawh beiseina nei tlat tur leh inhmangaih tawn turin a fuih a, chu chu puitlin lam an pan theihna tur a ni tih a hrilh bawk a ni.

Kan lâwmmante thlir chunga rinna nêna rawngbawlin

Petera hian he a lehkhathawnah hian Lal Isua tuarna in bul a tan a, Lal Isua pawh khan an tan a tuarsak angin ringtute pawh A tan an tuarsak ve a ni tiin a fuih a. Khâng hunlaia ringtuten an tawrhna kha Petera hian hrechiangin a thlamuan hlawm a, an rinnaa an dinngheh zêl theih nan leh Lal lsua lo kal hnaih tawh zia a sawi a. Chumi atana lo inbuatsaiha inthlamuan tawn turin ringtute a chah a ni. Jakoba 5:7-8 ah tiang hian kan hmu, “Chutichuan, unaute u, Lalpa lo ka hma loh zawng chhel takin awm rawh u. Ngai the u, lo neitu chuan ruah tui tla hmasa leh hnuhnung chu a hmuh hma loh chuan chhel takin lei rah hlu tak chu a nghak thin. Nangni pawh chhel takin awm rawh u; in thinlung tinghet rawh u; Lalpa lo kalna chu a hnai tawh si a.” Hei hian ringtute chu he lei ram mi kan nih lohzia leh kan kumhlunna tur a nihloh zia min hriattir. I Thessalonika 4:16-17 ah Lalpa lo kal lehna thu hetiang hian kan hmu bawk, “Lalpa ngei chu au thawm nen, vantirhkoh chungnung ber aw nen, Pathian tawtawrawt ri nen, van atangin a lo chhuk dawn si a; tin, Kristaa thi tawhte chu an tho hmasa ang a, chumi hnuah chuan keini nunga lo la awm rengate hi, boruakah Lalpa hmuak turin, anmahni rualin chhum zingahte khian lak chhohvin kana wm ang; chutichuan kumkhuain Lalpa hnenah kan awm tawh ang.”

Fim tak leh Mahni inthununin

Ringtute hi a chang chuan khawvel thilte hian min tibuai awlsam em em a chu chuan Lal Isua lam min entir theilo fo thin. II Timothea 2:4 ah Paulan ti hian a sawi a, “Sipaia awm tura thlangtu chu a tihlawm theih nan sipai tu mah, indo lain tun dam chhung khawsaknate hian a intihnawk ngai lo va.” Rawngbawlna ah hian khawvel thil kan intihbuai tir hian Lal Isua tan kan nung theilo in kan in ham buai fo thin. Chuvangin rawng kan bawl hian nakina kan lawmmman tur thlir chungin fimkhur tak leh mahni inthunun chunga kan hlenchhuah a pawimawh em em a ni. Kan thawhrimnate hi Lalpa ah a thlawn dawnlo a ni tih hre chungin rawng i bawl tlat ang u.

Lal Isua anna kawng zawh chung zelin

A tlangpuiin keimah leh ka fate tan tum kan nei thin, chumi tihlawhtling tur chuan theihtawp kan chhuah thin. Chutiang chiah chuan Ringtute pawh hian khawvela kan awmchhung hian Lal Isua rawngbawlna entawn chunga Amah an hi kan tum pawimawh tak a ni tur a ni. Paula chuan Philippi 3:14 ah ti hian a sawi a, “Krista Isuaa Pathian chung lam koh chhan lawmman hmu turin, tiam chin lam chu ka pan talh talh a ni.” Hei hi kan tum pakhat niin kan tihhlawhtlin turte zinga pawimawh tak a ni. Kan nun hian Lal Isua ze mawi tarlang sela, amah anga awm a, rawngbawl a, nitina puitlin lam pan tur kan nihna i hre thar ang u. Ringtute hian kan lawmman thlir chungin rinawm tak leh chhel taka rawngbawl tur kan ni.

Hmangaihna leh inlungrualna nen

Ringtute hi hmangaihna leh inlungrualna nen rawngbawlho tur kan ni. Chu hmangaihna atanga inlungrualna chuan inngaihdam tawnna min neihtir thei a ni. Matthaia 18:22 ah Peeran Isua hnenah “ka unauvin ka chungah thil tisual sela, vawi engzat nge ka ngaihdam ang?” tih a zawhna chhan na chu “ ‘Vawi sarih thlengin,’ ka ti lo a che, ‘Vawi sarih hmun sawmsarih thleng,’ ka ti zawk che a ni” tiin Isuan a chhang a nih kha. Lal Isua hi kan Lal leh Chhandamtua pawmtu kan nih chuan ngaihdamna thinlung kan nei tur a ni.

Thilpek kan dawn angte hmangaihna nen hmangchhuak turin

Thlarau Thianghlim tanpuinain kan rawngbâwlnaah Lal Isua hmêl kan ti lang tur a ni. Hmangaihna leh duhsakna nena rawng kan bâwl loh chuan miten Lal Isua hmel keimahniah an hmuthei loin Pathian keimahniah a inpuangchhuak thei dawn lo a ni. Paulan Rom khuaa mite hnena lehkhathawna a sawi ang khan hmangaihna leh induhsak tlatna nena rawngbawl tur kan ni. Mahni inngaihlu lo in thilpek kan dawn ang zelte hmangchhuak tur kan ni tih min hriattir a (Rom 12). Heihi rawngbawlna ah hian a pawimawh em em a ni.

Petera’n ringtu tihduhdahna tuartu te kha chhel tak leh rinawm taka an rinnaa ding nghet turin a duh a. Tin, inhmangaih tawna lungrual taka awm turin a fuih bawk a ni. Kan tun dinhmun hi han en ta ila inhmangaihlohna te, inlungruallohna te, mahni hmasialna te, midang hriatthiam theihlohna te, mi chanchin a chhe zawnga sawina te leh inhuatna te hi a va tam ta em! Petera lehkhathawna kan hmuh ang hian ringtute chu inhmangaih leh induhsak tawn tur kan ni; Lal Isuan min duhsak bik leh min hmangaih ang khan. Lal Isua thihna leh thawhlehna hi mi tin tan a ni. Thufingte 10:12 a kan hmuh angin hmangaihna pawimawhzia leh hmangaihnain thil a tih theihzia hriain i inhmangaih tawn theuh ang u “Huatnain inhauna a chawk chhuak a, Hmangaihna erawh chuan bawhchhiatna zawng zawng a khuh thin.”Hmangaihna nen inlungrual takin Ringtuten rawng i bawl ang u.

Pathian chawimawi

Chaklo tak chung leh harsatna kara kan lo ên chhuah hian keimahni hmangin Pathian a inpuangchhuak thin. Hmangaihna nena rawng kan bawl hian Isua eng kan pechhuak a Pathian chawimawiin a awm thin. Ka unaunu duhtak te u, vawiinah hian inpekna thar nen Lal lsua tan i eng chhuak theuh ang u, kan thawhrimna hi a thlawn dawn si lo a.

  1. Testimony: Lindley Cedeno, Trinidad (Ngawlveina atanga Lal Isua chhanchhuahna a chan dan)

Trinidad thingtlâng khaw pakhat Moruga an tihah lo piangin naupang hlimthei tak ka ni thin a. Ka nu sakhaw mi tak zirtirna hnuaiah Roman Catholic kohhranah Pathian biakna neiin kan inkhawm ve thin a. Pathian hnena tawngtai hi ka nu chuan a ngaipawimawhin a nunah hmun pawimawh tak a chelh a ni. Zinga kan thawh vela kan hriat hmasak ber thin chu ka nu in, “Papa God” tia a tawngtai ri kha a ni.

Kum 12 mi lek ka nihin ka nu chu a na vak ta maia, vanduaithlak tak main min boralsan ta nghe nghe a. Ka nu thihna chu ka tuarin na ka ti em em mai a, kum rei tak chhûng chu chu tawrhna chuan ka nunah harsatna min thlen a ni. Primary School-te ka han zawh chuan Secretarial college-ah te ka han kal ve leh lawp lawp a. Amaherawhchu, kum thum hnuah chuan ka zirnate chu bansanin mahni inenkawlna turin hna ka zawng ta zawk a. Ka hna thawh hmasak ber chu Lawngchawlhna hmuna in tihfai leh a tul anga naupang enkawl a ni a, a hahthlâk hle a ni. Min chhawrtu chu mi tha tak a ni lo a, ka chungah a tha vak lo, chu chuan ka nu ka ngaihna leh khawharna chu a belhchah leh bawk a ni. Thian kei aia u deuh zawk hnen atangin intihhlimna leh lâmna hmuna kal tura sâwmnate ka dawng a, chu mi hmunah chuan kalin ruihhlo tih leh zu inte ka lo chîng tan ve ta a. Ka hnate chu ka lo bansan ta hial a, kum 18 ka nihin fanu ka nei a, ka fanu pawh chu keiman enkawl hlei thei lo in ka thiante bulah ka hnutchhiah tawp a. Tichuan ruihhlo chi tinreng tih chhunzawmin ka nun ka hmang chho ta a ni. Ka pianna khua Moruga ah chuan nun pangngai neih leh nan tiin ka let leh a chutah chuan mipa tawngin thla riat hnuah chuan kan innei ta nghe nghe a.

Amaherawhchu, kan inneihna chu a hlawhtling lo a, ka pasal chuan ngaihzawng dangte min neihsanin kum hnih chauh kan innei tihah kan inthen ta a ni. Chumi hnuah chuan ka hnathawhna hmun ngai lawngchawlhna hmunah chuan kir lehin hnate zawngin, keimah ka inenkawl ve nan kan thawk leh lawp lawp a. Ka nun ngaiah chuan kîr lehin thil tha lo tak takte ti leh in zu mai bakah ruihhlo chak zawkte tih chingin, mipat hmeichhiatna kawngahte tlânin ka nun chu khawlo takin ka lo hmang chhunzawm leh ta a.

Nun beidawng taka ka awmlai chuan, ka ngawlveina leh nunkhawharna ata min la chhuak turin ka nu tawngtaina thin kha ka hrechhuak a, “Papa God” tiin Pathian ka au ta a. Ka ngawlveina leh ka nun rahbi tleu mek lak ata min chhanchhuak turin Pathian ka au a ni. Ka tawngtainate a thlawn lo a, Pathian chuan lo ngaithla in ka nun min thlak thleng sak ta, Lalpa chu fakin aw rawh se. Taxi khalhin ei ka zawng leh a, keima pualin inhmunte ka nei ve thei ta hial a. Pathian biakinah kal chakna neiin chawlhni vawikhat chu Saint John London Baptist kohhranah ka va inkhawm ve a. Pastor thuchah hmangin Pathian pawlna ka dawng a, sual nih inhriatna chiang takin ka chang a Lal Isua hnenah ka nun ka hlan let thei ta. Chumi atanga thla khat hnuah chuan Baptisma ka chang ta a. Tin, kum khat hnuah ka pasal nen pawh chuan innei lehin ani pawh chuan Pathianah nun thar changin a nun chu Pathian tan a lo hlan ve ta a. Amaherawhchu, ka pasal chuan thluaka thisenzam chat (stroke) vangin February 2016 khan min boral san nghe nghe a ni.

Pathianin ka nunah chuan danglamna mak tak min thlensak a, Saint John Baptist kohhranah chuan theih ang anga Pathian tan rawngbawl vein tawngtai rawngbawlnaah te inhmangin kawng hrang hrangin ama tan ka hunte ka hmang ve a. Ka nun min zuahsakin a rawngbawl min phalsak ve avang hian Pathian chu fakin awm mawlh rawh se.

Hei hi ka thuchah duh che u chu a ni, Pathian hian ngawlveina leh harsatna atang hian min la chhuak thei a ni, theih loh hi atan chuan a awm lo a ni tih hi.

  1. Testimony: Magdalene Mary Haynes (Grenada)

Grenada tuipui kama lo piangin ka nu leh ka unaunu-te nen kan chengho a. Ka piantirh atangin ka hmui hi a sawi a, hemi ka hnar leh hmui hi a inpawtsawi tihna a nih chu (hei hi sap tawngin cjustify palate an ti) Hemi a nih avang hian tawng lamah pawh harsatna neiin ka tawng fiah vak thei lo a ni. Sikula min fiam changte hian hrehawm ka ti theiin ka khua a harin mal ngawih ngawiha inhriat changte ka nei thin a. Chumi avang chuan thenrual zinga awm pawh nuam tih loh chang ka nei thin. Ka hmel lan dan chu hrehawm ka ti em em a Pathian pawh ka dem nasa a “Engngati nge kei kher? Engvangin nge ka lo pian? Engatinge hetianga ka pian bik? Pathian hian min hmangaih ve tak tak em?” tih zawhna hi a chhanna ka zawng ruai thin.

Ka nu chu kan unau min enkawl nan a thawkrim thei hle a, min fuih nasa hle bawk thin a. Roman Kohhrana seilian ka ni a, rinna thu hi ka la thutakin Pathian rawng hi nasa tak leh theih ang anga bawl ka duh thin. Ka nun pumpui chu Pathian rawngbawl nana hlana Roman Kohhranah Sister nih ka tum thin a. Amaherawhchu ka nu leh pa an inneih loh avangin chu chu ka ti hlawhtling thei ta lo a ni. Ka nunah Pathian thil tumte thlir chungin kohhrana thil tihna hrang hrangah-te telin Pathian thute chhiar leh ngaithlain ka hunte ka hmang ve thin a. Mak tak maiin Pathianah harhtharna Grenada Baptist IMPACT Crusade atanga changin kum 17 mi niin Grenada Baptist Kohhran Sunday inkhawmnaah chuan ka nun chu Lal lsua tan ka hlan thar ve leh ta a ni. Kha mi nia thuchah ‘Lal lsua beram vengtu tha’ tih khan min hnehin amahah chuan kan him reng a ni tihte nen. Thil pakhat ka hmuhchhuah tak chu, tha inti hle mah ila ‘misual chhandam ngai ka lo ni’ tih hi a ni.

Mak tak leh ropui taka siam leh din ka nihnate leh vui tur ka lo ni lo a ni, tihte hre thar lehin ka lawm hle a ni. Lal lsua tana ka nun ka pek hnu kum hnihna-ah chuan Sunday School zirtirtuah-te min ruatin ka tan chuan hmasawnna nasa tak leh chona nasa tak a ni, ka hmui dik loh avanga tawng lamah harsatna ka neih thin avangin. Ka unau nu pawhin a nun chu Pathian tan hlanin piantharna a chang ve ta nghe nghe a. Ka unaunu chu ringtu ka neih hmasak ber niin ka chhungte zingah chuan ka rawngbawlna min tawiawmtu hmasa ber a ni ta nghe nghe a ni.

Kan kohhranah chuan hruaitu nihna pawimawh tak takte chelhin naupang lampang rawngbawlnaahte ka pui ve thin bawk a, tunah tak chuan kan kohhranah rawngbawltu hna ka chelh mek bawk a ni. Pathianin pasal tha tak min pe in fa duhawm tak tak pathumte mai bakah kohhranah thawhpui tha tak takte min pe bawk a ni. Philippi 1:21 a kan hmuh ang khan harsatna leh tawrhna karah Pathian hmangaihna ka nunah a lo lang ta zawk a ni.

Lalpaa ka unau duh takte u, midangte tana malsawmna ni theuh turin ka sawm duh che u a ni. Pathian khawngaihna leh hmangaihna avangin malsawmin ka lo awm ta a ni.

Posted in Uncategorized.

admin

Leave a Reply