BMP Day vawi 42-na hman a ni.

May 4, 2022 (Nilaini) kha Baptist Mipa Pawl (BMP) din champha phak vawi 42-na a ni a. Kumin BMP Day hi MBMP in hun hman dan tur a ruahman angin Zuk leh hmuam that loh zia inzirtirna lam hawia hun hman a ni a. BMP Day puala Inkhawm-ah pawh hemi thupuia hmang hian Thuchah ngaihthlak a ni.

BMP Day hmanpui hian Mizoram BMP Hruaitu, Office bears te chu unit hrang hrangah kalin hun an hmanpui a, ka hriat theih chinah MBMP President Rbt Chawngrolura leh Secretary Rev. H. Lalfakzuala te chuan chhun lamah Ebenezer Unit, Zobawk-ah hun hmanpuiin, zan lamah Galili Unit, Ramthar,Lungleiah Finance Sewcretary Pu Vanlalpeka nen hun an hmang leh a, President  leh Assistant Secretary Pu Lalawmpuia ten Bazar Unitah Zan Inkhawm-ah hun an hman pui a, Senior Adviser Upa Dr. Joseph Lalrindika Chawngthu pawhin Farmveng Unit-ah BMP Day hi a hmanpui bawk.

BMP Day hi Mizoram BMP in hun hmang dan tur a duan bakah unit hrang hrang ten remchang an tih ang leh tha an tih angin Programme siamin an hmang a, Unit thenkhatah zing karah  hnatlang neiin chhun lamah programme hmang thei te chuan Inkhawm leh Intihhlimna hun atan an hmang a, Unit tam zawkah zan lamah inkhawm programme an hmang hlawm a ni. BMP Day thawhlawm hi Bial kaltlangin Headquarters(MBMP) ah thawn tura tih a ni a, Kristian Hospital Poor Patient Fund atan hman a ni ang.

Baptist Mipa Pawl (BMP) hi kum 1980 May ni 4 khan Thingsaiah din tan a ni a. BCM Assembly 1988 chuan BMP hi Kohhran hnuaia Fellowship pakhat ni turin a pawm a, Tualchhung Kohhran hrang hrangah BMP Unit din phal a ni ta nghal a. Assembly 2011 in Tualchhung Kohhran bakah Pastor Bial huapa din a phalsak leh a, tichuan Pastor Bial tam takah din a lo ni ta zel a ni. Tunah chuan hmun tam takah Bial BMP Inkhawmpui leh rorelte pawh neih thin a lo ni ta a ni.

Planning Commission vawi 5-na ruahmanna ang in kumin 2021 atang hian Mizoram Pum huapa inthlunkhawmna “Mizoram BMP” chu kalpui tura ruahman a ni bawk a, Secretary hran neiin, Rampum huapa Rorelna pawh neih thin a ni tawh dawn a ni.

2021-2022 BCM Statistics in a tarlan danin tunah hian BMP member 16,179 an awm mek a ni.