BMP Meet 2020 kham lo takin an tiak ta

Lunglei: February 10,2020:

Baptist Mipa Pawl (BMP) Meet, 2020 February 7-9 chhunga Thingsai-a neih chu Pathianni zan khan kham lo takin an tiak ta. He Meet-ah hian Mikhual riak lut chin 2884 awmin, khaw chhehvel atanga kal, in ziak lut lo engemawzat an awm bawk a, mikhual 3000 chuang zet an kal khawm a ni.

He BMP Meet ah hian  ‘Isua zuitu rinawm’ tih chu kawng hrang-a thenin BCM Puipa te – Rev. PC. Liandula (President), Rev. Dr. C. Vanlaldika (AGS-Mission), Rev. Dr. K. Lalrinthanga(President Elect) Rev. R. Lalbiakliana AGS-Service) leh Executive Secretary pahnih Rev. Dr. R. Lalthanmawia (Aizawl) leh Rev. R. Lalnunzira (Lawngtlai) ten an sawi thin a. Meet chhimtute leh TV-a lo thlirtuten hlawkthlak an ti hle.

Meet neih chhung hian khawm apiangin BMP Zaipawl leh Group zai tha tak tak bakah Solo leh Live Band te a awm ziah bawk. Heng BMP Zaipawlte bakah hian BCM Choir, Aizawl leh Lawngtlai Area Baptist Choir te, leh BCM Thingsai pastor Bial Zaipawl ten zaiin Meet an hmanpui bawk.

Inkhawmpui tiak zan-ah BCM President Rev. Pc Liandula’n Thupui kharin thuchah a sawi a,  BCM General Secretary leh FOD Director ni bawk Rev. F. Ramdinmawia’n leh BMP Meet Organising Secretary Upa Lalfakawma Chawngthu ten report tlangpui pein Lawmthusawina (Vote of thanks) an sawi bawk.

Organising Committee leh FOD Director ten an tarlan danin BMP Meet atan hian Budget nuai 19.5 dah a ni a, BMP member tinin Inkhawmpui dawlna atana an thawh kahwm atangin nuai 5 hmuh a ni a, FOD Budget atangin nuai 5 hmuh a ni bawk. A bak zawng hi a dawltu bial te thawh chhuah leh mimal, Pawl leh Kohhrante tanpuina atanga hmuh a ni a, Meet tiak zan thleng khan Rs. Nuai 22.5 vel hman ral a ni thung.

He meet-ah hian inkhawm apiangin thawhlawm lakkhawm a ni a, Inkhawm chhunga thawhlawm tlingkhawm chu Rs. 3,15,051/- a ni a, hei hi Kohhran ding thar Biak In sa laite tanpui nan hman a ni a ni ang.

He BMP Meet ah hian BCM puipate an tel kim vek bakah Bialtu MLA leh Health Minister Upa Dr. R Lalthangliana pawhin Inrinni zan atangin a telpui bawk. Meet Programme zawng zawng LPS leh Zonet Cable -ah te Live a pek chhuah niin Youtube Channel – Zoen Network-in Youtube-ah Live stream a pe chhuak bawk.BMP meet Tiakni-ah.. Pandal thiah hnatlang neih nghal a ni

Posted in BCM News.

admin