BMP Meet, 2020 thupui tur thlang fel

Mizoram Baptist Kohhran, Fellowship Organisations Department(FOD) Committee chu October 30, 2019 chawha dar 11:30 khan Sap Upa leh Pu Buanga Hall, Serkawn-ah an thukhawm a. Mizoram Baptist Mipa Pawl (BMP) Meet vawi 3-na, February, 2020-a Thingsai-a neih tûr thupui atan “Isua zuitu rinawm” tih chu an thlang fel a ni.

Meeting hi Rev. F. Ramdinmawia, General Secretary-in a kaihruai a, FOD Director a nihna angin report tlangpui a pe nghal bawk.

Tun tuma FOD Meeting hian BMP Ministry kalpui zel dan tur te relin, Headquarters-ah Budget  ruahman ni se an ti a,  TKP leh BKHP te Budget Ceiling nuia 10-a siam thin chu nuai 15-ah tihsan ni se tih a ni bawk a, Kum 2021 BMP thuzir tur atan “Thurin leh Inkaihhruaina” tih chu thlan fel a ni bawk.

He Meeting hian kum 2020 BMP Meet Programme Sub.Committee-in an duan lawk chu thlir-in chanvo nei tur hrang hrang te ruat fel nghal a ni a, thuchah sawi turin Rev. Pc Liandula – BCM President, Rev. Dr. C. Vanlaldika – AGS Mission, Rev. R. Lalbiakliana- AGS Service.Rev. R.Lalnunzira, Executive Secretary, Lawngtlai, Rev. Dr. R. Lalthanmawia, Executive Secretary, Aizawl, Rev. F. Ngursailova, Thingsai Bial te an ni ang. Bible Study hruaitu turin Rev. C. Lalhmangaihzama, Tuiphai Bial, leh Rev. Zirsangliana Ralte, Cherhlun Bial te ruat an ni bawk. Lalpa Zanriah(Sacrament) buatsaih turin Rev. Dr. K. Lalrinthanga, President Elect ruat a ni bawk. Heng bakah hian Zaipawl, Group zai leh Special Item hrang hranga chanvo nei turte pawh ruat fel nghal a ni bawk.

Ram pum huap BMP Meet hi kum 3 danah neih thin a ni a, kum 2014 khan Lunglei Bazarveng Biak Inah nghah a ni a, kum 2017-ah Zobawk ‘S’ Pastor bial-in Zobawk Playground-ah an lo dawl tawh bawk a ni. Kum 2020 BMP Meet hi February 7-9, 2020 ah Thingsai-ah neih a ni dawn a ni.

 

Posted in BCM News.

admin

Leave a Reply