BUHFAITHAM PATHINNI

(April Pathian ni hnuhnung ber)

Tham tan kum leh hman tan dan:

Buhfaitham tan kum hi F.W.Savidge (Sâp Upa) report-a a lan dân chuan kum 1915-ah an tham tawh a, Presbytery minute-ah chuan kum 1919 hi a lanna hmasa ber niin a sawi. Kum 1973 Assembly chuan Buhfaitham rawngbawlna hi kohhran kutah a dah a, BKHP ten an khawn a, Kohhranin a buaipui thin. Kum 1982 atang phei chuan Assem[bly-in BHKP kutah mawhphurhna zawng zawng a lo dah ta a. April Pathian ni hnuhnung ber hi Buhfaitham Pathian ni-a hman a ni ta a ni. Sum tling khawm te chu Tualchhung Kohhran kaltlangin Ram thim (Mission) lamah chhûn luh thin a ni.

Buhfaitham lo chhuah dân:

Kum 1908-ah Khasi rama nu pakhat rilruah chuan chaw chhum apiangin buhfai vei khat lek lekin dah ila, Kristian tinin kan tih chuan nasa takin hna a thawk thei ang tih rinna a lo piang a. Chutiang chuan a ti ta nghâl a. Rei lo tê chhûngin Kohhran pawhin a thatzia an hre ta a. Khasi ram pawh a luanchhuak ta thuai a ni. Chu chu Mizoram hmâr lamin an la chhawng a, chhim lam pawhin kan lo ti ve ta thuai a ni. (Mizoram Baptist Kohhran Chanchin pawimawh lâkkhâwm Part 1 page 36)

A hmanna:

Buhfaitham hi a tîr lamah chuan Kohhran sumpuiah hman a ni thîn a. Kum 1919 Presbytery chuan Buhfaitham zînga mi hi hmeichhe Tirhkoh hlawhah hmang ila an tih angin hman a ni ta a. Hmeichhe tirhkoh an awm loh hnuah sumpuiah a lût leh a, a tûl ang anga hman a ni.

Kum 1947-ah Nursery School din a lo ni ta a, zirtîrtute hlawhah hman a ni leh a. Nursery school pawh chu kum 1968-ah a tâwp ta a. Hemi atang hi chuan Z.B.M pualah hman a lo ni ta a ni. Buhfaitham pawisa hi tûn thlengin ramthim rawngbâwlna tangkai tak a ni ta zêl a ni. Assembly-in BKHP-te kuta a dah angin a man zât siam leh a sum lâkkhâwm a tum a, Kohhran-ah a sum chu thehluh nghâl zêl a ni.

Sum hmuh dân:

Presbytery minute-ah kum 1919 hi a lanna hmasa ber ni mah se pawisa a lang lo va. Kum 1920 atangin pawisa zât târlan a ni. Hetih hun laia pawisa chhiar dân chu chêng-ana-pai (Rs a p) tiha ziak a ni a. Hei hi kum 1952 thlenga hman a ni.

Kum 1920-1921 thlenga BCM pum puia pawisa hmuh zât chu Cheng 446 ana 10 pai 9 a ni. Kum 20 hnuah chuan hma kan sâwn ta deuh a, chêng 1,162 ana 11 pai 8 a ni a. Kum 1952 atangin hma kan sâwn ta viau a, chêng sîng chuang fê a ni ta a. Kum 1972-1973-ah chuan Nuai chuang daih a lo ni ta a. Kum 1979-1980-ah chuan maktaduai chuang fe a lo ni leh ta a. Mite thinlungah Pathian ram tûlna a lo lang zêl a. Kum 2017-2018-ah phei chuan Rs 66,894,786.00 a lo tling ta a ni. A va ropui êm!.

Mizoramin Pathian malsâwmna kan dawng nasa hlê. Kum 2014-ah BCM Mission chuan kum 75-na a lawm ta a. Kum 2015- a ral meuh chuan Missionary, local worker-te nen sângkhat aia tam kan lo nei ta. Missionary tam zâwk tîrchhuak tûr chuan sum tam leh zual a ngai a, Buhfaitham-ah hian chhûng tinten tan kan lâk lehzual chuan Missionary tun aia tam kan tîr thei ngei ang.

“Amah atang leh, amah avâng leh amah atân thil zawng zawng a lo awm a ni si a. (Rom 11:36) Tirhkoh Paul’an a tih angin engkim min petu Lalpa hnênah kan Buhfaitham hi lâwm takin i hlân ang u. Chhûng tinten he Ramthim rawngbâwlna pawimawh tak hi kan tu leh fate hnênah pawh hrilhin tûna nu leh pate kan awm tawh loh hnu pawha an ngaih pawimawh zel theih nân “Lalpa pual” Buhfaitham Bêl/Bûr i hûng theuh ang u. Rawngbâwla kal chhuak thei lote pawhin mahni inchhûngah hahdam takin Ramthim-ah rawng kan bâwl a ni tih hre thar lehin tan i la sauh sauh ang u.