R&D-in Kangmei tuar te leh Myanmar atanga Zohnahthlak raltlante chhawmdawlna a pe.

Tunkar Nilaini, April 28, 2021 khan BCM Relief & Development Department chuan Bungtlang ‘ S’ khuaa in kang chhungkaw 12 te tanpuina pe-in, April 24 khan Myanmar atanga Zohnahthlak raltlante hnenah chhawmdawlna an hlan bawk..

Tunkar Nilaini, April 28, 2021 khan BCM Relief & Development Department   chuan Bungtlang ‘ S’ khuaa in kang chhungkaw 12 te  tanpuina  thilpek a hlan

BCM aiawha thilpek an kente hi YLA Bungtlang south hruaituten an lo dawngsawng a, Bungtlang ‘S’ Bialtu Pastor, Rev. Ramnghakmawia’n telpuiin, BCM R&D staff  te leh Pu FC Lalhualhima, Production Assistant, BCM AV, Lawngtlai area ten an tawiawm bawk.
Thilpek hlanna Program hi YLA Bungtlang ‘S’ hruaituten an kaihruai a,  ASG-Service,  Rev. R. Lalbiakliana (R&D Committee Secretary) chuan Chhiat tawk te thlamuan na thu leh BCM in a tuarpui thu sawiin, Kohhran-in a tih theih tawk, Tawngtaina leh thilpek tlem te kenga a hmun ngeia tlawh tura tih an nih thu te a sawi hnuah, Pu Lalrinawma, Relief & Development Department Director-in Kangmei tuarte hnena BCM-in thil a tih sak thin dan tlangpui  leh tun tuma an thil ken sak te a sawifiah  bawk.

Kangmei tuar chhungkaw 12 te hnena pek hi Buhfai Kg 50 bag 12, Silpouline-12, Thosilen-12, Blanket-14 leh pawisa fai chhungkaw 1 tan Rs. 3,000/-  zel hisapin, chhungkaw 12 tan Rs. 36,000/- an hlan a ni.

April 24 khan  Myanmar atanga kan Zohnahthlak raltlante chhawmdawlna pe-in Rev. R. Lalbiakliana, AGS – Service, Nl. Lalfawnvel, Project Incharge, R&D leh Pu C. Lalengkima,Production Assistant, Audio Visual Production leh Pu Lalruatliana, Driver te Phawngpui ‘S’ Bial, Phawngpui ‘N’ Bial, Thingsai Bial leh Cherhlun bial-ah feh chhuakin Bial hruaitute kaltlangin Myanmar ral tlante hnenah chhawmdawlna hetiang hian an hlan.

Phawngpui ‘S’ Bial-ah  Raltlan chhungkaw 48 awmin mihring 695 an awm a, tanpuina cheng 15,000/- an hlan a, Phawngpui ‘N’ Bialah Raltlan mi 656 awmin tanpuina cheng 20,000 pek an ni a, Thingsai Bialah raltlan mi 185 an awm mek a, tanpuina cheng 20,000/- pe-in, Cherhlun Bialah raltlan chhungkaw 22, mihring 96 awmin tanpuina cheng 21,760 an pe bawk.

Hetihian, raltlan zawng zawng hi mi 1632 niin tanpuina an sem zawng zawng hi cheng 76,760 a ni.