BWA Day : February 3

Tunkar Pathianni February 3, 2019 hi Khawvêl puma Baptist Kohhran Inzawmkhawm Pâwl – Baptist World Alliance (BWA) Day a ni a. Mizoram Baptist Kohhran pawhin he Ni hi urhsûn takin kan hmang leh dawn a ni. Pathianni Chawhma inkhawm-ah kumin BWA Day atana thupui thlan sa “Hnam tina mi zirtirahte siam u la” (Mat 28:19) tih thu hmangin thuchah ngaihthlak a ni a ang.Headquarters atanga BWA Day puala thu chah chhiar tur buatsaih pawh chhiarchhuah a ni bawk ang. Hemi ni Inkhawm thawhlawm chu BWA Pual a ni ang a, BCM Headquarters kaltlangin BWA Headquarters, Washington, USA-ah thawn a ni ang.

Mizoram Baptist Kohhran hian kum 1978 ah BWA hi kan zawm ve a full member kan ni. Tunhma deuh kha chuan BWA Day hi February thla Pathian Ni hnuhnung berah hman a ni thin a; kum 2005 atang khan May thla Pathian Ni hmasa berah sawn a ni a, 2016 Administrative committee chuan BWA Headquarters lamin a hun an sawn leh tak avangin February Pathianni hmasa ber hi BWA Day-a hman tur in a lo rel leh ta a ni.

BWA Din tan dan:

Baptist World Alliance (BWA) hi khawvel pumpuia Baptist Kohhran te insuihkhawm a ni a. Kum 1905 khan London khawpui a Exeter (Ekzeter) Hall-ah din a ni. Tichuan London khawpuiah July 1905 khan Inkhawmpui hmasa ber chu neih a ni ta. Kumin  2019 hi BWA kum 114-na a ni

BWA-ah hian Ram 125 chuang atangin Kohhran hlawm (Convention/Union) 239 kan awm a. Tualchhung Kohhran 168,491  leh baptisma chang member maktaduai 47.5 (47,500,324 ) zet kan awm a ni.

BWA hian khawvela chhiatna lo thleng thin- Lirnghing,Tuilian,Thlipui,Tam, Indona vanga tuarna hrang hrangah te, Rorelna dik lo avanga mipui tuarna leh retheihnaah te, Natna leh Hri leng avanga tuarnaah te tanpuina hna a thawk thin a, Mahni awmna hmun leh ram theuha nasa taka thawk tur leh Khawvel hmun danga kan Baptist unaute nena thawkhoa chutiang kawnga tanpui ngaite tanpui hna thawk tur te; Ram rethei leh hnufual zawkte tana hmasawnna (development) hna thawh te hi kan hmalakna ki-pui tur a ni a. Lal Isuan “ka ril a tamin nangnin ei tur mi pe a; ka tui a halin in tur mi pe a; mikhual ka nihin mi thleng a; saruak ka nihin puan mi sintir a; ka dam lohvin mi kan a…Heng ka unau te berte zinga mi pakhat chunga in tih chu ka chunga ti in ni” a tih kha. Mihringte rawngbawlsak hi Pathian rawngbawlna a ni (Service to man is service to God).

BWA Day Puala BCM G.S Thuchah

Read More about BWA

Posted in BCM News.

admin