BWA Day hmang dawn

Tunkar Pathianni February 2, 2020 hi Khawvêl puma Baptist Kohhran Inzawmkhawm Pâwl – Baptist World Alliance (BWA) Day a ni a. Mizoram Baptist Kohhran pawhin he ni hi Kohhran Ni pawimawh (Special Sunday)-ah dahin BWA pualin Tualchung Kohhran tinah Pathianni zing inkhawmah hun hman a ni ang.

Pathianni Chawhma inkhawm-ah thupui thlan sa “Ram chu Lalpa ta a ni” (Sam 22:28) tih thu hmangin thuchah ngaihthlak a ni ang. Headquarters atanga BWA Day puala thu chah chhiar tur buatsaih pawh chhiarchhuah a ni bawk ang. Hemi ni Inkhawm thawhlawm hi BWA Pual a ni ang a, BCM Headquarters kaltlangin BWA Headquarters, Washington, USA-ah thawn a ni ang.

Mizoram Baptist Kohhran hian kum 1978 ah BWA hi zawm in member kan ni a. BWA Inkhawmpui lian kum li dana neih thin, Baptist World Congress chu kumin hian Rio-De-Jeneiro, Brazil-ah nghah a ni dawn a, July

22-26 hian neih a ni dawn a, khawmpui thlengtu tur Bazil Baptist Convention lam pawh an inpuahchah nasa hle. BCM pawh in BWA member a nih angin he Congress-ah hian Council palai a tir leh dawn a ni.

Baptist World Alliance (BWA) hi Kum 1905 khan London khawpui a Exeter (Ekzeter) Hall-ah din a ni. Kumin  2020 hi BWA kum 115-na a ni. BWA statistics hnuhnung ber 2017 in a tarlan danin BWA-ah hian Ram 125 atangin Kohhran hlawm (Convention/Union) 239 an awm a. Tualchhung Kohhran 168,491  leh baptisma chang member maktaduai 47.5 (47,500,324 ) zet an awm a ni.

BWA hian khawvela chhiatna lo thleng thin- Lirnghing,Tuilian,Thlipui,Tam, Indona vanga tuarna hrang hrangah te BW-Aid hmangin chhawmdawlna hna thawkin tanpuina pawh a pe thin a, Ram rorelna dik lo avanga mipui tuarna thlenna hmunahBWA-Human Rights Wing hmangin an aiawhin a dinpui bawk a, retheihnaah te, Natna leh Hri leng avanga tuarnaah te tanpuina hna a thawk thin a ni.