BWA Former G.S, Denton Lotz – Ropuina ramah

Baptist World Alliancen(BWA) a General Secretary leh nihna pawimawh tak tak lo chelh tawh Rev. Dr. Denton Lotz chu April 24,2019  khan kum 80 mi niin ama chenna in, Forestdale, Massachusetts, USA-ah a thi. Amah thlahna (Vuina) inkhawm hi April 26, (Zirtawpni) chhun dar 12:00-ah Tremont Temple Baptist Church, Boston, Massachusetts, USA-ah neih a ni ang.

Rev.Dr.Denton Lotz hi kum 1939-ah Flushing, New York, USA-ah a piang a, unau pali zinga naupang ber a ni. Kum 1956-ah Northpoint High School atangin High School a zo a, Chumi zawhah University of North Carolina, Chapel Hill, atangin Bachelor of Arts a zir zo leh a ni. Kum 1961-ah United States Marine Corps a zawm a, 1963 thleng a thawk a ni. He hna a thawh chhung hian Okinawa –ah awmin hna a thawh that avangin kum hnih chhung lekin Second Lieutenant a kai hman a ni.

Pathian kohna a dawn avangin Sipai atangin a chawl a. Kum 1965-1966 ah Harvard Divinity School -ah President hna thawkin he hna vuan chung hian Pathian thu a zir pah a. 1966 kumah Theological degree lain hemi kum vek hian Binkley Memorial Baptist Church, Chapel Hill, North Carolina-ah Minister atan ordained a ni. Hamburg University-ah zir chhunzawmin kum 1970-ah Doctor of Theology (D.Th) degree a nei leh ta a ni.

Doctorate degree a neih hnu hian rawngbawlna kawng zau zawk-ah a lut chho ta zel a. Switzerland –ah Baptist Theological Seminary-ah Professor hna thawkin Missions leh Homiletics subject a zirtir a, chutih lai chuan Eastern European pastors leh Kohhran hruaitute pualin Summer Institute of Theological Education (SITE) programme a buatsaih sak thin a ni.

Kum 1980-ah BWA ah lut tanin Mission and Education hna bakah Relief and Development a chang chho a, chumi hnu-ah BWA Youth Department Director ah ruat a ni leh a. Kum 1988-ah BWA General Secretary nilai Gerhard Class chu vanduai thlak takin Car accident-ah a thih avangin General Secretary lailawk atan Denton Lotz chu ruat chhoh zui niin, hemi hnu lawkah  BWA Annual Council 1989 chuan General Secretary nghet-ah a thlang chhunzawm ta a ni. BWA General Secretary hna hi kum 20 zet thawkin, 2007 khan a chawl (retired) ve ta a ni.

BWA General Secretary a nih chhung hian hnathawh langsar tak tak a nei a. Human Rights lamah te, Relief and aids lamah te, Education leh Mission lamah te bung thar tam tak BWA hian a kai a. Mi thiltithei leh mi chak, midang hneh thei mi a ni a. USA Sorkar hruaitu/ President te hial pawhin an zah a kai pha a.  Khawvelin Evangelist ropui bera kan chhiar Billy Graham leh United States President hlui Jimmy Carter te nen inthian tha tak niin, a rawngbawlna an ngaisang hle a ni.

 

Billy Graham chuan kum 2007-a BWA General Secretary atanga Denton Lotz  a chawlh dawn khan “Hruaitu ropui leh chak, rinna nghet tak i nihna hian min hnehin min tanpui nasa hle a ni” tiin a uina thu a lo thawn hial a ni.

Rev. Dr. Denton  Lotz thihna hi Mizoram Baptist Kohhran chuan channa nasa takah a ngai a. BWA thiltih leh Meeting hrang hrangah BCM aiawh palai te lo ngaihsaka, lo ngaipawimawh em em thin a ni a. BWA-leh Baptist Church of  Mizoram inzawmna nghet tak a neihna kawnga rahbi pawimawh tak lo chhut sak tu a ni. Mizoram Gospel Centenary lawmna, 1994-ah pawh USA atanga hun chep leh kawng harsa tak chunga Lunglei a lo thlenni te kha kan hre reng dawn a. BWA chhungkaw tan leh Pathian ram tana a inpekna leh a rawngbawlna hlu tak te, hruaitu ropui a nihna te hi BCM chuan a theihnghilh ngai dawn lo a ni.

A kalsan a npui fanau leh tute, Kohhran ho te Lalpan thlamuanin awmpui zel rawh se.

Posted in BCM News.

admin