BWA Hmeichhe tawngtai Ni

November 6, 2017 (November Thawhtanni hmasa ber) hi khawvel pum huapa Baptist Kohhran inzawmkhawm (Baptist World Alliance)-a Nuho (Women’s Fellowship) ten kum tin tawngtairual an neih ni a ni a. Mizoram Baptist Kohhran Hmeichhe Pawl (MBKHP) pawhin hei hi zawm vein Thawhtanni chawhma dar 10:00 atangin BKHP Unit tinin Tawngtai programme hi an hmang dawn a ni. He Tawngtai rual thupui atan hian “Tho la, êng rawh“. (Isaia 60:1) tih a ni ang.

Tawngtai hi tum 9 neiin, a kar laka khawvel huapa an hruaituten thuchah, testimony  leh Sharing an ziak ngaihtlak leh Bible Study te neih a ni bawk ang. Hetiang hi programme tlangpui chu a ni:

KHAWVEL PUMPUI BAPTIST HMEICHHE TAWNGTAI RUAL NI

A hun : Dt. 6th November, 2017(Thawhtanni) at 10:00 Am

THUPUI :  THO LA, ENG RAWH (Isaia 60:1).

 Hun hman dan tur :

1 Tanna & hla sakhona : Chairman (Hla sak chhungin thilpek lakkhawm nise).
2 Thuchah pakhatna : President, Africa rama Baptist Hmeichhe Pawl
3 Tawngtai vawi 1-na : America hmar lam rama chengte tan
4 Thuchah pahnihna : President, Khawvel pumpui Baptist Hmeichhe Pawl
5 Tawngtai vawi 2-na : Europe khawmualpuia chengte tan
6 Bible Study     : “Thola Eng rawh.” (Isaia 60:1) 
7 Tawngtai vawi 3-na : Africa rama chengte tan
8 Thu chhiar : Engtin nge tun aiin hma kan lo sawn theih zawk ang?.
9 Tawngtai vawi 4-na : Caribbean thliarkara awmte tan
10 Hla sakhona : Chairman emaw thlangtu ruat
11 Tawngtai vawi 5-na : Asia khawmualpuia chengte tan
12 Testimony 1-na : Harsatna kara rinna
13 Tawngtai vawi 6-na : Pacific chhim thlang lama chengte tan
14 Testimony 2-na : “Thil hote atanga rinawmna nena nunthar neih”
15 Tawngtai vawi 7-na : Latin America rama chengte tan
16 Tawngtai vawi 8-na : Tul hrang hrang atan
17 Sharing : Minute 2/3 mi 2 emaw tan
18 Tawngtai vawi 9-na : Khawvel pumpui Baptist Hmeichhe Pawl Hruaitute tan leh Khawvel pumpui Baptist Kohhran Pawl Hruaitute tan.
19 Hla sak hona leh tawpna : Chairman

 

TAWNGTAI VAWI 1-NA : America hmar lam rama chengte tan.

Tawngtai thupui : 

  1. America hmar lama Baptist Hmeichhiate an rama raltlan (refugees) ho tan malsawmna an lonih theih nan.
  2. America hmar lama tualthahna awm thin leh hmeichhia an chanchin hriat loh a bote, police pawhin an la zawn hmuh lohte leh an chhungte tan.
  3. An rama cheng Baptist hmeichhhiate lungrual tak leh thawhhona tha nei chunga Pathian ram an din zel theih nan.
  4. Hmeichhia la naupang lam leh tleirawlte tihluihna hmanga ramdanga thawnchhuah chungchangah a lo fihlim theih nan.
  5. Baptist hmeichhia la naupang zawkte leh upa zawkten an thinlungte hawng a, inhriatthiamna zau zawk an neih theih nan.
  6. Pathianin tih tura a ruatsak ang taka Baptist hmeichhhiate’n tun aia nasa zawka an chenna khawvel cherau tawh lutuk venna kawngah hma an lak a, thing leh maute tichhe mai mai lo a, an pawimawhna hria an venhim lehzual theih nan.

 

TAWNGTAI VAWI 2-NA : Europe khawmualpuia chengte tan.

Tawngtai thupui :

  1. Europe ram hi tihtur hmabak tam takina hmuak a. Muslim ram thenkhat Middle East, Arap-ho ram te, Syria leh a bul vela ram thenkhatte chu harsatna hrang hrang avangin thim takah an la cheng a ni. Pathian hnenah i auchhhuahpui ang u.
  2. Lusun fa te, nupui/pasal sunte leh naupang nu leh pa nei tawh loten thlamuanna Pathian hnen atanga an neih theih nan.
  3. Kristian tam tak tihduhdanna tuartute tan Pathian thlarau thianghlim awmpuina leh chakna thar an neih zel theih nan.
  4. Lal Isua thisen hlu chhuak khan an lalram an din zel theih nan.
  5. Pawisawi lo nunaute leh mi tam tak nunnain an ram buai avanga an tur phah thin hi a lo tawp theih nan. Heng zawng zawng tul lo taka thleng thin hi ti tawp turin Pathian hnenah i dil ang u.
  6. Europa rama kristiante’n inpekna nena rawng an bawl theih nan.

 

TAWNGTAI VAWI 3-NA : Africa rama chengte tan.

Tawngtai thupui :

  1. An rama Baptist Hmeichhe Hruaitu hmasa kalchhuak tate avangin lawmthu sawi ila, Hruaitu tharte’n finna an lo neih zel theih nan tawngtaipuui ang u.
  2. An ram Hruaitute tan dik tak leh fel taka ram an hruai theih nan.
  3. Africa rama Baptist pawl hrang hrang Hruaitute bakah General Secretary tan tha taka an mawhphurhna an hlenchhuah theih nan.
  4. An ramah hnathawh tur neilo tam takten hna thawh tur an lo neih theih nan Pathian hnenah hnathawh tur dilpui ang u.
  5. An ramah ei leh bar lama hmasawnna nasa tak a lo awm theih nan.
  6. Africa hmar lam Muslim tamna ramte tan i tawngtaipui ang u.

 

TAWNGTAI VAWI 4-NA : Caribbean thliarkara awmte tan.

Tawngtai thupui :

  1. He rama thalai tam tak hna hmu lote’n hna an lo hmuh a, Pathian tan tangkai taka an inhman theih nan.
  2. He thliarkara Hmeichhe tam zawkten Pathian kohna thar an lo chan a, Lal Isua tan anlo enchhuah ve theih nan.
  3. Hmeichhia, a bik takin la naupang lamte’n rawngbawlna lamah phurna thar an lo neih theih nan.
  4. Hmeichhe tam tak hmeichhiat/mipatna lama tihduhdah leh nghaisak tuartute tan, an harsatna atanga chakna thar Pathianah an lo neih theih nan.
  5. He rama sorkar department hrang hrangten inlungrual taka ram hmasawn nana hma an lak theih nan.
  6. He rama Kristian hmeichhiaten nasa lehzuala an eng an enchhuah tir theih nan.

 

TAWNGTAI VAWI 5-NA : Asia khawmualpuia chengte tan.

Tawngtai thupui :

  1. Asia ramah Thlarau Thianghlim hnatawh a lo thlen theih nan.
  2. Indonesia rama kristiante inlungrual taka an thawhho theih nan.
  3. Sri Lanka-a kristiante sakhaw dang ang bawka thlamuang taka an awm theih nan.
  4. Nepal-a Baptist Kohhrante’n an awmna tur in an sak theih nan.
  5. Asia rama Baptist Hmeichhe inkhawmpui vawi 13na 2018-a lo awm tur chhim tum ten an kalna tura an mamawhte an neih theih nan 2018-2023 chhunga hruaitu thlanna tur atan.
  6. Bhutan rama kristiante tan.

 

TAWNGTAI VAWI 6-NA : Pacific chhim thlang lama chengte tan.

Tawngtai thupui :

  1. Papua leh Papua New Guinea rama sorkar kal dik loh vanga tuartu hmeichhia leh naupang tam takte tan.
  2. Papua rama Baptist Hruaitute zingah hmangaihna leh inremna tha lehzual an neih theih nan.

Australia rama Baptist Hmeichhiate tan, a bik takin thalai zinga an rawngbawlna leh Hmeichhia harsatna tawktute tan malsawmna an lo nih theih nan.

  1. Fiji thliarkara cheng thli na tak (Cyclone Winston) tuartute tan chenna tha leh ei tur an neih theih nan.
  2. Australia New Zealand-a hmeichhiaten rawngbawlna lamah nasa zawka hma an lo sawn theih nan.
  3. Thingtlang lama cheng hmeichhiate pawisa harsatna avanga hmeichhiate intawhkhawmna a kal ve thei lo mi tam takte tan Pathianin an mamawhte a hriatpui a, a tanpui theih nan.

 

TAWNGTAI VAWI 7-NA : Latin America rama chengte tan.

Tawngtai thupui :

  1. Latin America rama Baptist hmeichhiaten an thalaite hmasawnna turah ruahmanna tha taknena hma an lak zel theih nan.
  2. He ramah Chanchintha hrilh darha a lo awm zel theih nan leh Baptist hmeichhiate Pathianin a tihchak zial zel theih nan.
  3. He rama Pastor-te leh Kohhran Hruaitute tan.
  4. He rama tleirawl leh naupangte tisa leh thlarau lamah Baptist hmeichhiaten an tanpui theih nan.
  5. Kum nga dang lo awm leh tura he rama Baptist hmeichhhiaten an hmachhawp an tihhlawhtlin theih nan.
  6. He rama Baptist Hmeichhe Hruaitute tan finna leh chakna thar dilsak ang u.

 

TAWNGTAI VAWI 8-NA : Tul hrang hrang atan.

Tawngtai thupui :

  1. America hmar lampang Texas, New York leh New Jersey-a Spanish tawng hmangtu Missionary-te an mamawh Pathianin a pek theih nan.
  2. Khawvel pumpuiah remna leh muanna a lo awm theih na tura kristiante’n nasa lehzuala tan kan lak theih nan.
  3. Khawvel pumpuiah Kristian nih hlutna a lo pun zual zel theih nan Pathian tanpuina i dil ang u.
  4. Khawvel hmun hrang hranga Kristiante’n chakna thar nena rawng kan bawl theih nan leh harsatna karah midangte tana beiseina petu kan nih theih nan.

 

TAWNGTAI VAWI 9-NA : Khawvel pumpui Baptist Hmeichhe Pawl Hruaitute tan leh Khawvel pumpui Baptist Kohhran Pawl Hruaitute tan.

Tawngtai thupui :

  1. Khawvel pumpuia Baptist Hmeichhe inzawmkhawm Pawl President Ksenija Magda, Secretary leh Treasurer ni bawk Kathy James leh ram hrang hranga kan hruaitute tan.
  2. Executive Director Moreen Sharp tan. He hna pawimawh tak a chelhna-ah hian Pathian awmpuina, finna leh chakna a neih theih nan.
  3. Kum 2020-a khawvel pumpui Baptist Hmeichhe Hruaitute inhmuhkhawm Brazil khawpui Rio de Janerio-a lo awm tur tan. Pathian hruainaa he inhmuhkhawmna hi a lo hlawhtlin theih nan leh khawvel pumpuia Baptist hmeichhia sanghnih tal an kalkhawm theih nan.
  4. Khawvel pumpui Baptist inzawmkhawm Pawl President Msiza lahe General Secretary Neville Callam tan leh khawvel hmun hrang hranga Baptist mi zawng zawng tan.

 

……………………………………..

 

 

KHAWVEL PUMPUI BAPTIST HMEICHHE PAWL

(BWA-WA) TAWNGTAI THUPUI 2017

 

Thupui : “Tho la, Eng rawh,” (Isaia 60:1)

 

Chibai bukna- 1

Midangte tana kan enchhuah hian khawtlang a siam thain khawtlang nuam kan lo neih theih phah thin’.

Kristaa kan Baptist unau zawng zawngte, in hnenah remna leh thlamuanna lo awm rawh se. Pathian fate kan nihna anga khawvel hmun hrang hranga chengte kan intawngtaisak tawn thei hi kan vannei hle a ni. Inngaitlawm tak leh tih tak zeta Pathian kan zawn chuan A awmpuina hi kan chang zel dawn a ni, hei hi kan tawngtaina pawh a ni. Pathianin Hmeichhiate min kohna hi harsatna kawng hrang hranga tawkte tana ding ngam turin min ko a ni. Tun kum 2017 a khawvel hmun hrang hranga Baptist Hmeichhiate tawngtaina ni tura programme hi Africa rama Baptist hmeichhiate buatsaih a ni a. Tun kuma kan tawngtaihonaa kan innghahna leh kan duhber chu Pathianin min koh chhan ang taka Pathian hnathawh mak tak hi hmu thar leh theuh ila tih hi a ni. Lal Isua hi midangte rawngbawksak leh enna pe tur leh danglamna kan mimal nunah leh khawtlangah thlen turin a lokal a. Chutiang bawkin, Pathian fate kan nihna angina Lal Isuan eng tura min duh angina kan eng chhuak ve tur a ni. Pathian thuin a sawi angina, “Chuvangin unaute u, Pathian khawngaihnaah hian, inthawina nung leh thianghlim, Pathian lawm tlak ni turin in taksa chu inhlanah ka ngen a che u; chu chu in rawngbawlna awm reng a ni si a,” (Rom 12:1). “Boralte zawnga chhandam turin Mihring fapa hi a lokal a ni reng a ni,” (Luka 19:10).

Nun thlakthleng,danglamna tih awmzia tak tak chu, ‘Nun thara nun, nun danglam neih,’ tihna a ni. Lal Isua Lal leh Chhandamtua kan pawm hian Pathian fatea vuah kan lo ni ta a, chung mite chu Pathianah nunthar neitute an lo ni ta a ni. Pathian rawngbawlpuitu tura nun danglam neitute an lo ni ta a. Lal Isua kan nuna tarlan zel anih theih nan leh Thlarau Thianghlimin ti tura min duh anga huaisen taka penchhuak zel chung leh A thua inchawm zel chungin Lal Isua-ah hian i awm reng ang u.

He nun thar, nun thlakthleng nun hi keimahniah chauh a tawp tur a ni lo va. He nun thar, nun danglam Lal Isuaa kan neih hi kan chhhungkua-ah leh khawtlangah lang chhuak theuh rawh se. Lal Isua Thlarau Thianghlim awmpuina hi khawvel mamawh a ni. Heng zawng zawngah hian, Lal Isua zara ka unau duhtakte u i engchhuak ang u. Kan lo enchhuah hian keimahni hmangin Pathianin kan khawtlanga thin a ni.

Kristaa in unau,

Joina Dhula

President, Africa rama Baptist Hmeichhe Pawl

 

 

Chibai bukna- 2

Thil hrang hrang kan hmaa lo awmte hi i hmachhawn ngam ang u. Hmeichhiate tan eng chhuak tura penchhuah hi thil harsa lutuk a nilova, harsa lutukah i ngai lovang u. United Nation (U.N)-a mithiam, zir mite chuan, ‘kum 2020 velah chuan hmeichhiate dinhmun chawikan anih a, dinhmun sang zawka kan dah ve thei anih chuan khawvel hian dollar maktaduai 28 laiin hlawkna a neih phah dawn a ni,’ an ti a. Mahse, tuna kan dinhmun en hian kan tum ram thleng tur chuan kum 140 vel kal kan la mamawh dawn a ni.

Hmeichhiate dinhmun kan dah hniam em avang hian khawvel hian a thlen tur hmun hniha thena hmun khat chauh a la thleng thei niin a lang. Hmeichhiate chu enkawlna tha pek lohvin a tam zawk chu an lo thanglianin zirtirna tha an dawng lova, pasal nei a, fate nei tur angah chauh beisei an ni thin. Hei hi Kohhrante leh Kristiante tih dan tur a ni lo a ni. A bik takin Baptist Hmeichhiate hi chuan Lal Isua’n heng kan tawrhna zawng zawngte hi Korss-ah min hnensak tawhin Thlarau Thianghlim hmangin nun thar min pein beiseina nung min pe bawk a ni. Hetiangin Bible-ah kan hmu, ‘Tisa a chak loh avanga Dan in a tih theih hauh loh chu Pathianin a rawn tit a; mihring tisa sual ang puin A Fapa ngei chu sual thawi nan Pathianin a rawn tir a; tisaa sual awm chu thiam loh a chantir ta; tisa dana awm tawh lo, thlarau dana awm tawhte, keimahniah hian Dan in a phut chu hlena a awm theih nan,’ (Rom 8:3-4).

Nupui nih a, fate han neih a, Nu nih hi engmah a pawina a awm lo. Bible-in min hrilh angina inhmangaih tawn tur Krista-ah chuan kan ni. Nu nihna hi malsawmna pakhat a ni a, Pathianin Hmeichhiate hi tha a tih em avangin a siam a. Pathian chuan kan theihna hrang hrangte hi hmang chhuak theuh turin min duh a ni. Ringtute hi hmeichhia kan ni emaw ni lo emaw indawhtawn tur kan ni. Bible-in a sawi angin, ‘Krista tihtute in nih avangin intulut tawn rawh u. Nute pawhin Lalpa thu an awih angina mahni pasalte thu an awih tur a ni,’ (Efesi 5:21). Hetih laiin hmeichhia tam tak chu tihduhdahna leh hmusitna kawng hrang hrangin mipate lakah an tuar mek a. Vanduaithlak takinhmeichhia la naupang, tleirawlte an nute leh an pite leh anmahni rualpuite lak atangin tihduhdahna kawng hrang hrangin an tuar thin a, inhnialte pawh a chhuak fo thin a ni. Heng zawng zawng hi sual hnathawh keimahnia bet tlat vang a ni. Hengte hian min phuarbet tlatin Pathianin talent tha tak midangte tana malsawmna ni tura kan hnena a dah hi kan hmang chhuak thei thin lo a ni. Hmeichhe tam zawkte chuan an tawrhna an ngawihbo puiin mite hriatpui loh hian harsa takin nun khawchhuahna kawng an lo zawh mek bawk a. Lal Isua hi tuinung lui a nihzia an hre thin lo. Chumi avang chuan khawvel ti eng chhuak turin an lo penchhuak thei thin lo a ni. Lal Isua hi tuinung lui chu a ni. Bible-a kan hmuh anga Lal Isua leh Samari hmeichhia tuichhunchhuah bula an inbiak ang khan, (Johana 4).

Hetiang hi a ni tur a ni lo. Lal Isua’n Hmeichhiate hi eng chhuak a, khawtlang siam nuam turin min ko a ni. Lal Isua din Kohhrante hian Lal Isua’n tih tura min pek a chanve pawh hi kan la ti zo lo a ni. Chumi avang chuan, rawngbawlnaah hian hmeichhiate tih tur tam tak a awm a. Bible-a hmeichhiate Hmeichhiate hian  Pathian ropui nan an talent-te nasa taka hmangin hnam leh khawtlang an tidanglam a ni. Chung hmeichhiate chu kan sawi lang tlemin Pulpit atangte hian an rawngbawlnate chu kan fak tam lo hle a. A chhan ni ber awma lang chu kan dahhniam tlat vang a ni. Paula rawngbawlnaa Hmeichhe tangkai tak takte kha han ngaihtuah nawn leh teh. Foibi te, Priskili leh Akuila-te rawngbawlnate kha, (Rom 16). Zawlnei Debori tel lovinIsrael-hovin hnehna an chang thei lo ang khan(Roreltute 4:4ff). Lidia tel lovin Philippi Kohhran a ding thei lo a, Lal Isua Nu Mari tel lovin Lal Isua a piang thei lo. Samari hmeichhia avangin Samari ramah Chanchintha a thleng. Pathianin hmeichhiate hmangin khawtlang a tidanglam thei a ni.

Ksenija Magda

President,

Khawvel pumpui Baptist Hmeichhe Pawl.

 

 THUCHAH

Engtin nge tun aiin hma kan lo sawn theih zawk ang ?

 Hemi ni hi kawng hrang hranga hman dan a awm thei a. Nileng emaw, chawhma leh chawhnu chauhahte kan remchan dan anga zir zelin, Lal Isua hminga khawvel hmun hrang hranga Baptist Hmeichhiate tawngtai tura kal khawm kan nih phawt chuan a eng pawh hi a tha vek a ni. Hemi ni hmang tura kan inbuatsaih hian, ‘Hemi ni hi ka tan chuan hun tha tak a ni,’ tiin ngaihtuah la, hemi ni kan hman hian i nunah eng thu nge a sawi tiin inbuatsaih ang che. Hemi nia kan tawngtai hian kawng hrang hrangin khawvel hmun hrang hranga cheng Hmeichhiate inpawhna tha tak a siam thei a ni.

 

Thilpek/thawhlawm chungchang :

 Hemi nia kan thawhlawm tlingkhawm hi keimahni ram theuh Kohhran Hmeichhiate inrelbawlna bakah Baptist World Alliance Women’s Department-in rawngbawlna hrang hrang a neihnaa hman tura ruahman thin a ni. Hemi nia kan thawhlawm tlingkhawm hian Hmeichhiate rawngbawlna kawng hrang hrangin a puih thin avangin a pawimawh hle a ni. Heng kan thawhlawm tlingkhawm theuhte hmang hian rawng kan bawl thei a, kan pek tam lehzual theih nana malsawmna nei thei theuh turin tan ila ang u.

Hemi nia kan thawhlawm tlingkhawm zaa sawmnga (50%) hi Khawvel pumpuia Baptist Hmeichhe Pawl-in hemi ni atana kan inbuatsaihna hrang hrang atana hman thin a ni. Tin, Hruaitute thil tul hrang hrang avanga inhmuhkhawmna mamawh atan mai bakah mi harsate tanpui nan leh Khawve pumpui Baptist Hmeichhe PawlinWebsite kan neihte hmanga Chanchin hrang hrang kan inhriattirna mamawh leh senso atan hman thin a ni.

Tin, zaa sawmnga (50%) dang chu heng atante hian hman thin a ni :

  • Keimahni ram bik Hmeichhiate inrelbawl nan leh mamawh atan.
  • Keimahni bik, hemi ni kan inbuatsaihna atan leh hmeichhiate rawngbawlna hrang hrang keimahni ram bik mamawh atan.

Kan chhinchhiah atan – Khawvel pumpui Baptist Hmeichhe Pawl hi mahni inpekna, hlawh hran nei lo (volunteers) anga thawh a ni a. Executive Director leh part time Bookkeeper chauh hi hlawh nei anga kan chhawr chu a ni. Heng nihna pahnihte hi chu regular anga thawk an ni. Mimal tinte leh group hrang hrangte tawngtaina nena Khawvel pumpui Baptist Hmeichhe Pawl Executive Director hi theih tawpa lo tanpui tur leh a hlawh/lawmman atana fund kan neih zel theihna tura lo tawngtai reng turin kan insawm theuh a ni e.

 

Bible Study

“Thola Eng rawh.” 

R.A. Lateju. Executive Director, Missionary Union of Nigeria Baptist Hmeichhe Pawl.

‘I lo enchhuah hian nangmah hmangin Pathianin mite nunah thu a sawi thin a ni.’ Johana 4:39-42 – “Hmeichhiain, ‘Ka thiltih apiang min hrilh thei vek,’ a tih avang khan chumi khuaa Samari mi tam takin Isua an ring ta a. Samari mite Isua hnen an lo thlen chuan an hnenah cham turin an ngen a, chu khuaah chuan nihnih a cham ta a. A thu an hriat chuan midang tam tak pawhinan ring ta a. Tin, Hmeichhe hnenah chuan, ‘tunah zawng I thu kan hriat avanga ring kan ni ta lo, keimahni ngeiin A thusawi kan hria a, he mi hi khawvel chhandamtu a ni ngei a ni tih kan hre ta,’ an ti a.

Thuhma :

 Kan nun Lal Isua hmanga tihdanglama a lo awmna hi kan khawtlang nun siam thatna tura hmanraw pawimawh tak pakhat a ni. Paula chuan Rom khuaa kristianho hnenah chuan he khawvel dan anga awm lo turin leh an rilru ngaihtuahnate leh an taksate chu Pathian lawmzawnga awm turin a hrilh a, (Rom 12:2). Chutianga Pathian lawm tlaka awm tur leh eng chhuak turin a chah a ni.

Lal Isua’n hmeichhiate nunah thu a sawi nasain danglamna nasa tak a thlen a. Samari hmeichhia nena tuikhura an inhmuh pawh hian he Hmeichhe nun hi a tidanglamna nasa hle a ni, (Johana 4). Nun khawhar tak leh beidawng taka a lo hman thinna kha Lal Isua’n thlak sakin nun thar pein beiseina nung a pe ta zawk a ni. Chutianga a nun lo danglam ta chuan thawhchhuah tirin Lal Isua Chanchintha chu a tlangau pui ta zawk a, (Johana 4:29). Lal Isua Chanchin tha  a tlangau pui hnu chuan Samari khuaa mi tam tak chu Lal Isua chanchin hriat chakin an lo kal a, he hmeichhia ang bawk hian an nunah danglamna awmin Lal Isua chu an ring ta vek a ni. Heti hian an sawi nghe nghe a, “I sawi avanga ring ringawt kan ni ta lo, Amah chu kan mit ngeiin hmuin A thu kan ring ta a ni,’ tiin (johana 4:39-42).

He hmeichhia atanga zir tur kan neihte :

  1. Lal Isua nen an inhmuh atang khan a nunah danglamna nasa tak a thleng nghal a. Lal Isua hnen atang lo hi chuan nun thar a chhar theih loh a ni. He Samari hmeichhia pawh hi Lal Isua nena an inkawm atang chauh in a ni nun thar dang lam a neih ni. Lal Isua nen hian intawhna tak tak i nei tawh em? I la nei lo a nih chuan i engchhuak thei dawn lo a ni. A hnaih laiin Lal Isua chu pan la, hmuh awla A awm lai hian pan rawh.

 

  1. Pathianin kan zawhna tam takte he hmeichhia ang hian min chhansak thin (Johana 4:11-15). Hetah pawh hian Lal Isua chhannate hian he hmeichhia hi a tibuai ve deuh niin a lang. Chutiang bawk chuan kan zawhna tam tak hi chu Pathian tanpuina kan dil chuan a chhanna chu Pathian thu hmang tein kan hmu thei a ni. Paula pawhin Timothea hnenah khan Bible-te zir nguna, hnathawktu tha ni turin a fuih a nih kha (2 Timothea 2:15). Pathian thu hi eng ang taka hrechiang leh bel nge i nih le? Engtia tam nge Bible thu hmanga i zawhnate chhanna hmu turin lo bei ve teh?

 

  1. Pathian chu kan nun tidanglam tua hman : He Samari hmeichhia hian Beroia khua amite ang hian Lal Isua chanchin hriat belh zel a duh a (Tirhkohte 17:10-12). Tih tak zetin Pathian thu a ngaithlain a zir bawk a. Mi thianghlim anga awm lovin a sualnate puangin Pathianah rinnain a innghat tlat a. Engtia rei nge i sual i lo zep ruk tawh? Chu chu Pathian hmaah i thup thei em? Chu chu theih loh a ni. Pathian chuan engkim a hre vek a. I sualnate chu tifai turin leh siamtharna leh damna famkim chang turin Pathian chu pan la, Lal Isua chu nangmah tanpui turin a inpeih reng a ni.

 

  1. Chatuan hremhmuna kal turte hnenah chhandam kan nih thu min hriattir a. He Samari hmeichhia pawh hi chhandamna nun thar, nun danglam a neih avang hian a hlim em em a. Lal Isua thu hi tlangau puiin midangte pawh Lal Isua hnenah a hruai lut ve a ni. Mi tam takin a thu an ngaithlain a nuna thilmak leh danglam tak thleng chu an hmu a ni. Lal Isua Chanchintha thu hi i puangchhuak ang u. Zirtirte thuah chuan, ‘A thu an hriat lohva hrilh an nih loh chuan engtin nge an rin theih tehlul ang? Rinna hi hriatna atanga lo awm a ni, (Rom 10:14-17 NIV). Midangte chhandamna thu hrilh tura chhandam i ni. Lal Isua chanchintha hi midangte hnenah puangchhuak rawh. Lal Isua hi nangmah kal tlangin lo eng chhuak se, midangten Lal Isua chu nangmahah a awm a ni tih hre rawh se.

Chhandam i nih atangin ringlotu engzat hnenah nge Lal Isua chanchintha thu hi i puanchhuah tawh le? Tun hunah hian Lal Isua chanchintha thu hi mi pakhat tal hnenah hriattir tum rawh. I nun atang khan mi engzatin nge Lal Isua hi hmuh chak awm? Tho la, eng chhuak rawh.

  1. Nun danglam tura en chhuah : Lal Isua ringtute hi Eng ang kan ni, khawvel eng kan Hmeichhiate hi Pathianin eng chhuak turin min duh a. Lal Isua Lal leh Chhandamtua kan lo pawm atang khan Lal Isua zarah Enna kan lo nei ta. Nangmah hmangin mitten Lal Isua an hmu thei a ni. Lal Isua’n nangmah hmanga enna pekchhuah a duh a ni. Lal Isua’n Samari hmeichhia hmangin mi tam tak A hnenah a hruai a nih kha. A thuhretu rinawm nge rinawmlo nih i duh zawk? I engte i pekchhuah loh chuan Lal Isua zuitu rinawm i ni thei lovang.

Kawng hrang hranga Lal Isua tana kan enchhuahna turte :  Lal Isua chhandamna i lo neih atang khan i lo engchhuak ta a; tichuan, miten nangmahah Lal Isua an hmu thei ta ani. Lal Isua hnenah kal ila, tihdanglamin i awm ang u. Hengte hi kan en dan tur kawng hrang hrang chu a ni :

  1. Pathian thatzia hriat tum rawh. Lal Isua hnathawhpuitu nih tum rawh, (Rom 10:14-17). Pathian hmangaihna thu leh a ropuina nangmaha lang kha puangchhuak rawh. Khawvel hi Lal Isua hnathawh leh A hmangaihna hriattir rawh.
  2. I nuna harsatna lo thleng thinte kha nangmah tichaktuah ngai rawh. Harsatna i nuna lo thleng thin hi huaisen takin hmachhawn ngam rawh, (Rom 8:26-28). I harsatnaah khan tawp tum lo la, Pathian ring chungin hmachhawn ngam rawh.
  3. Tawngtai chungin Pathianah awm reng rawh. A hunah pawh a hun loah pawh tawngtai rawh. Tawngtaina hian harsatna karah pawh Thlarau Thianghlim awmpuina leh tanpuina a pe dawn che a ni, (Kolossa 4:2-4).
  4. Midangte thlamuantu leh tichaktu nih tum rawh. Entawn tlak ni turin hma la rawh, (Rom 2:21-24).
  5. Lal Isua chanchintha hrilh darh a nih theih nan harsatna pawh tuar huam rawh. I hun tha kha chanchintha hrilh nan hmang rawh, (Kolossa 4:5-6).
  6. I chunga thil thalo titute chu ngaidamin Pathianah awm reng rawh, (Kolossa 3:13).
  7. Lal Isua i Lalpa thu ang zelin awm rawh, (Kolossa 3:22-25).
  8. Midangte tanpuitu nih tum rawh. Lal Isua’n min hmangaih angina midangte hmangaihtu nih tum rawh, (Rom 5:8; Kolossa 3:23-25).
  9. Midangte fuihtu nih tum rawh, (1 Timothea 4:12).
  10. Lal Isua chanchintha hrilhin midangte chakna thar pek tum rawh, (Rom 19:14-17).
  11. Pathian thu anga awm a, fimkhur takin awm tum zel rawh, (2 Korinth 10:6).
  12. Lal Isua’n min hmangaih anga hmangaih vein leh tihtakzetin A rawngbawl rawh, (Deuteronomy 6:5-9; Rom 6:16-18).
  13. Pathian hriatna lamah leh rinnaa hmasawn zelin, Pathian thu ngun taka zir a, ngaihtuah chungin nitin Pathian nen awmdun thin rawh, (Kolossa 3:16).
  14. Intlansiakna bei chungin Pathian duhzawngin awm tum rawh, (Philippi 1:21).
  15. Midangte ngaichang thin rawh, (Hebrai 13:1-3).

Thu tlangkawmna :  Lal Isua’n heti hian a sawi, “Khawvel eng in ni … In eng chu mi mithmuhah eng rawh se; tichuan, in pa van ami in lo chawimawi theih nan,” (Mathaia 5:14-16 NIV). Engin kan kalna turte min hmuh fiahtir angina Lal Isua eng hian kan thiante bulah leh chhungte hnenah leh kan hnathawhna hmunah te, khawtlangahte danglamna a thlen thei a ni.

 

Testimony 1

 Africa rama mi pakhat chanchin : “Harsatna ka tawhte hi ka rinna min tichaktu anih theih nan Pathian hnenah tawngtaiin ka dil a.”

(Esther Sandra Grant hi Umadzi WA Amayi Malawi Africa khawchhak lam laili taka mi a ni a, a chanchin kaltlang hian Baptist Hmeichhiate’n kan harsatna karah pawh kan rinna hloh lo turin min fiah a duh a ni.)

Hmeichhe pasal sun tawh ka ni a, ka pasal chuan lung natna avangin ni 11 October, 2007 khan min boralsan tawh a. Ka tan chuan tawrh a harsa em em mai a, ka khawvelhi a tawp ni maiin ka hria. Fa panga kannei a, palite chu USA a compani pakhata thawktu mi 105 ina sikul an dinah an kal a. Ka pasal thih hnu chuan nun hi harsa hle in ka hria. Chung harsatna leh lungngaihna ka tawh zawng zawnga min kalsan lo turin Pathian hnenah nasa takin ka tawngtai a.

Ka pasal thi ta chu Stuart M. Grant niin English mi Malawi a awm thin a ni. Lung lam harsatna a nei a ni tih chu a hma daihin kan pahnihin kan hre tawh a. Doctor-in a sawi dan chuan Stuart-a chu zai vat ngaiin a sawi a; mahse, chu chu South Africa ramah chuan an tih theih loh thu min hrilh a. Tin, a zai nan pawisa tam tak a ngai dawn a ni tih min hrilh bawk a. Ka pasal kum 70 lai mi ni tawh chuan Doctor hnenah chuan a upat tawh avangin chutianga pawisa tam tham tak ngaihtuah leh hman a tum loh thu a sawi a. Kei leh kan fate tan chuan chung zawng zawng kan tana a inhuamna chu tawrh a har hle mai. A bik takin a fate a hmangaihna leh an zirlai zir zo zawk tura a duhna chuan min hneh hle mai. Doctor chuan an zai loh chuan ka pasal chu chawlhkar thum chauh a dam tawh dawn a ni tih a hrilh ta nge nge a. Mahse, ka pasal chu Lal Isua ringtu nghet tak a nih avangin thih kha a hlau lo reng reng a. A thih hma chuan thil chinfel ngai nia a hriatte chingfel ve in ni 11 October, 2007 khan ka kut vuan reng chungin, mal min sawm chung leh khawvel a chhuahsan dawn ta tia sawi chungin min kalsan ta a ni. Chumi lai chuan kei pawh chuan ka khawvel hi tawp ta angah ka ngai a; mahse, maktak main Pathian khawngaihna leh awmpuina ka chang hle a ni.

Ka tih hmasak ber chu Stuart-a pasal atana min pek avangin Pathian hnenah lawmthu sawiin, A man a la let leh ta a ni ka ti a, ka rinna chu a thi lovang tiin  ka tawngtai bawk a. Mi tam tak a vuinaah chuan an lo kal a, a tam zawkte chu lusunna tak tak leh a nat zia hrethiam lote pawh an ni. Thenkhatte chuan ka hlimna chu a tawp taah an ngai a; mahse, Pathianah rinna ka nei tlat a ni tih an hre lo a ni. Thian pakhat chuan ka pasal thihna chu channa nasa takah a ruat a; mahse, thenkhat chuan he thihna hian mite thinlungah thu nasa takin a sawi zel dawn a ni tih an sawi bawk a. Chung zawng zawng karah chuan Pathianin ka rinna ti chakin chakna thar min siamsak a. Pathian hmangaihna en chhuah tir ve turin chakna thar Pathian chuan min pe a ni.

Tun hma zawng aiin ka rinna chu chak zawkin ka hria. Pathianin ka tawrhna atangin hmeichhiate thlamuan turin min siam a ni. Tunah chuan Umodzi WA Amayi National Executive Commmittee niin, Central East Region Umodzi WA Amayi-ah Treasurer ka ni. Hemi ni khawvel pumpui hmeichhiate tawngtaina ni c(Women’s Day of Prayer) chungchangah hian Executive Committee Member niin, Rinna a hmeichhiate (Women in Faith) tih pawlah Executive Member ka ni bawk a. Remna siamtute tih pawlah te, khawtlang thatna lampang ngaihtuahtu pawlah te Committee member ka ni bawk a ni. Ka hmeithai puite chakna thar nei turin ka fuih bawk a, hna ropui tak thawk ve in ka in ngai thei ta a ni. Tin, kan primary school Mackenzie khua a mi pawh a tha chho zel a ni.

Ka rinna ka vawng nung rengin ka hnathawhnaah pawh hlawhtlinna ka chang zel a ni. Ka fapate pahnih pawh an zirnaah hlawhtlingin an zo ve tawh a, sumdawnna lampang an buaipui mek a ni. Pathian khawngaihna zarah ka fate pali chuan University atangin an zirlaite an zo vek tawh a, ka fa naupang ber pawh tun kumah engeneering degree a hmu ve tawh dawn a ni.

 

Ka Baptist unau puite harsatna karah pawh tawngtai fan fan turin ka sawmduh che u a. Pathian ram a lo zau zel theih nan hlau loin penchhuak la, Lal Isua’n a awmpui zeldawn che a ni tih ring ringhlel suh ang che, (Luka 22:24-32).

 

Testimony 2

 Africa ram atang bawkin : “Thil hote atanga rinawmna nena nunthar neih.”

Ka hming chu Gazani Thipe a ni a, Sebina Botswana rama awm ka ni a. Kum 2001 khan Lal Isua hi Lal leh Chhandam tuah ka lo pawm ve a. Beiseina puan in (Tent of Hope)tih pawl Brazil-a miten Crusade an lo neihna atanga piangthar ka ni. Othilia, la naupang tak, tleirawlte hi kan inah lo kalin Crusade-a kal ve turin min sawm a. Tichuan, chumi tlai chuan crusade chu ka va chhim vet a a. Thusawitu (Speaker) thusawi chuan min hneh em em mai a, thlamuanna mak tak mai neiin Pathian thu hriat chak lehzualna ka lo nei ta a ni.

Chumi crusade chhung chu Beiseina puan in term (Tent of Hope Ministry)-te chuan Pathian thu an hrilh mai bakah thil hrang hrang zirtirna te an nei bawk a. Puanthui leh thil thui par te, ei tur siam dan te, Bible study-te an neihpui bawk a. Nitinin crusade chu ka chhim ve ziah ta mai a, thildang tih aiin Pathian thu ngaihthlak chu ka thlang thin a. Tichuan, Sebina-a Baptist Kohhran a lo din pawhin member hmasa ber ka lo ni ta a ni. Kum 2002 khan baptisma ka chang nghe nghe a. Kohhranho in  room pakhat Pathian biak nan leh inkawmkhawm nan te, thingtlang tih changkan nana thawktu pawl committee na hmun atan te in an luahna kan luah ve a. He pawl hming hi ‘Village Development Committee Houses’ tih ani a; mahse, hun a lo kal zel a, kan room luah man pek turte kan lo nei ta lova, chumi avang chuan a hnu lawkah member tam zawkte chuan Kohhran chu an chhuahsan ta mai a, tlemte chauh kan lo awm ta a ni.

Chumi hnu chuan hmeichhia pawh pathum chauh inkhawm tura kal kan lo ni ta mai a. Ka in chu kohhranhote inkawmkhawm nan leh Pathian biak nan hmang turin ka thawh a. Pastor pawh awm lovin keiman a tirah chuan ka kaihruai mai a. Tichuan, kum 2004 khan Brazilian Mission-te chuan Sebina-ah Kohhran an lo din ta a. Chutih hun lai chuan mipa pahnih Kohhran min enkawlpui turin ka nei a, Groseone leh Logan-te an ni. Zirlai an nih avangin school chawlh lai chauhvin min pui thei a. Logana min puitu pakhat zawk chu thuhriltu hlawhtling takah a lo chhuak ta a, lawmawm ka ti takzet a ni. Logana chu ni 25, June, 2016 khan Sebina Baptist Kohhran Pastor atan nemngheh a ni nghe nghe a ni. Kohhran pawh chu member 50 laiin a lo thang ta mai a. Pathian hnathawh ropui hengte kan hmuh theih avangin Pathian hnenah lawmthu ka sawi a ni. Ka theih tawpa tan  la a, hmalak zel pawh ka tum a ni.

Pathian chu a thutiamah a rinawmin, hmeichhiate rawngbawlna pawh mal a sawm zel a. Harsatna karah pawh chhel taka thawk zel turin infuih tawn theuh ang u. Lalpa chu fakin awm rawh se, A thutiamah a rinawm si a.

 

2017 hma chhawp hrang hrangte Africa ram atangin : 

 Hmachhawp hming : Thingtlang lama hmeichhiate hmasawnna pek.

Khaw hming                   : Liberia

Pawl hming                    : F.C. Barnes Industrial, Academy of the Liberia                                         Baptist WMU

Hma latu hming             :  Olivia B. Hill.

He hmalakna in a tum ber chu Liberia khawthlang lam panga Hmeichhe naupang leh tleirawlte tanpui a ni, a bik takin Bomi-a chengte leh Monsterrado thingtlanga chengte tan. He hmalakna hian zirna lamah hmasawnna a pek bakah hriselna tha pek a tum bawk a. Thingtlanga cheng hmeichhiate inchhungkhur vawn dan leh thlaichin dante he hmalakna hmang hian zirtir a ni bawk.

Tun hnaia kan hmuh chhuah dan chuan zaa 68 (68%) hmeichhiate an sikul kalna tihtawp sakin an chhungte pui tura tih an ni. Hmeichhe tam takte chu Hmeichhe fel tak leh nu fel tak, inchhungkhur enkawl tur ringawta zirtir anni a. Tin, Hmeichhe tam tak chu naupang tein pasal an neihtir thin. He hmunah hian thawh tur chi hnih a awm thei a, chungte chu –

  • Hmeichhe naupangte chu school kal chhunzawm zel tura fuih.
  • Hmeichhe naupangte chu an zirna tur fee tumsakin, lehkhabu te, thawmhnawte a thlawnin ngaihtuahsak ila. Tin, zirna sang zawk an thlen theih nan zirna sang zawk awmna hmun dinsak ni ta sela. Tin, nu la naupang deuhte chu training tha tak pek theih ni se.
  1. Hma chhawp hming :  Tihluihna naupang kum tlinglo chhawrna duhlohna entirna

Khaw hming                  :  Malawi

Pawl hming                    :  Tisule Foundation.

Hma latu hming             :  Patricia Annie Mzumara.

Naupang paruk zela pakhat ang hi Malawi-ah hian tihduhdah leh nghaisak tuar ang an ni. Enkawlna tha, zirtirna tha leh ngaihsaktu tha an neih loh vangin HIV Aids natna kai theihna hi an tan chuan a sang hle a ni. A bik takin hei hi Malawi-a Africa ram pakhat Katonga District, Tanzania atanga kilometer 45 vela hla a awm a ni. Naupangte tihluihnaa pasal neihtirte leh kum tling lo ram danga sumdawn nana hralh dote hi hmalakna pawimawh tak pakhat chu a ni.

He pawl hian naupang harsatna hrang hrang tuartute chu chhanchhuaha puih a tum a. Naupangte hi kan ram hruaitu turte an la ni a; chuvangin, an pawimawh hle a ni. Hengte hi kan do loh chuan harsatna min la siamsak thei a ni.

  1. Hma lakna hming :  Alabaster Jars (Hriak rimtui)

Ram hming           :  South Africa

Hmalatu pawl      :  First City Baptist Church

Hma latu hming   :  Donnae Thomas.

Hei hian a tum ber chu hna la neilo te, inleh lo chenna tur tha neilote leh harsatna kawng hrang hrang tuartute tanpui a ni. A bik takin tunah hian he pawl hian Thawhlehni-a kan programme siam lo chhimtute tan hna a thawk mek a. Tin, hmeichhia harsatna hrang hrang avanga hmeichhiat mipatna lama mahni inzuar thinte chhanchhuahna kawngah he pawl hian hma a la bawk a ni.He pawlin a tum ber chu Lal Isua Chanchintha la hrelote hnena hriattir hi a ni. Eiturte semin Pathian thu an puangchhuak pah thin a ni.

  1. Hma chhawp hming :  Bhutan Baptist Hmeichhe Pawl din.

Ram hming           :  Bhutan

Pawl hming          :  Asian Baptist Women’n Union

Hma latu hming   :  Precy Caranongan leh Zirsangliana Ralte.

He pawlin a tum ber chu Bhutan-a Baptist Hmeichhe Pawl din a ni. Bhutan-a hmeichhiate training tha pek leh thawhhona tha neie tura tan lak hi he pawl thiltum pawimawh tak pakhat a ni.

Posted in BCM News.

Leave a Reply

Your email address will not be published. Required fields are marked *